ԳԻՐՔ ՍԱՂՄՈՍԱՑ 43 - Գրաբար Աստվածաշունչ (1895)ՍԱՂՄՈՍ ԽԳ (ԽԴ) 1 Ի կատարած. իմաստութիւն որդւոցն Կորխայ. Սաղմոս Դաւթի։՝՝ 2 Աստուած, ականջօք մերովք լուաք, զոր հարքն մեր պատմեցին մեզ. զգործն զոր գործեցեր յաւուրս նոցա, յաւուրսն առաջինս։ 3 Ձեռն քո խլեաց զհեթանոսս, եւ զնոսա տնկեցեր. չարչարեցեր զժողովուրդս եւ հաներ զնոսա։ 4 Զի ոչ թէ սրով իւրեանց ժառանգեցին զերկիր, եւ ոչ բազուկ նոցա փրկեաց զնոսա. այլ աջ քո եւ բազուկ քո եւ լոյս երեսաց քոց, զի հաճեցար դու ընդ նոսա։ 5 Դու ինքն ես Թագաւոր իմ եւ Աստուած իմ, որ հրամայեցեր զփրկութիւնս Յակոբայ։ 6 Քեւ զթշնամիս մեր հարցուք, եւ անուամբ քով արհամարհեսցուք զյարուցեալսն ի վերայ մեր։ 7 Ոչ թէ յաղեղն իմ յուսացեալ եմ, եւ ոչ սուր իմ կեցուցանէ զիս. 8 այլ դու փրկեցեր զմեզ ի թշնամեաց մերոց, եւ զատելիս մեր յամօթ արարեր։ 9 Աստուծով պարծեսցուք զօրհանապազ, եւ անուան նորա խոստովան եղիցուք յաւիտեան։ 10 Բայց արդ մերժեցեր եւ անարգեցեր զմեզ, եւ ոչ ելեր, Աստուած, ընդ զօրս մեր։ 11 Դարձուցեր զմեզ յետս քան զթշնամիս մեր, եւ ատելիք մեր յափշտակեցին զմեզ։ 12 Ետուր զմեզ որպէս զոչխար ի զենումն, եւ ընդ հեթանոսս ցրուեցեր զմեզ։ 13 Վաճառեցեր զժողովուրդս քո առանց գնոյ, եւ ոչ գոյ թիւ աղաղակի մերոյ՝՝։ 14 Արարեր զմեզ նախատինս դրացեաց մերոց, ծաղր եւ այպն կատականաց այնոցիկ որ շուրջ էին զմեւք։ 15 Արարեր զմեզ յառակս հեթանոսաց, ի շարժել զգլուխս ժողովրդոց։ 16 Զօր ամենայն նախատինք իմ առաջի իմ են, եւ ամօթ երեսաց իմոց ծածկեաց զիս։ 17 Ի ձայնէ նախատորդին եւ չարախօսի, յերեսաց թշնամւոյն եւ հալածչի։ 18 Այս ամենայն եկն ի վերայ մեր, եւ մեք զքեզ ոչ մոռացաք եւ ոչ ստեցաք ուխտի քում, 19 եւ ոչ դարձաք յետս սրտիւք մերովք. դու դարձուցեր զշաւիղս՝՝ մեր ի ճանապարհաց քոց. 20 խոնարհ արարեր զմեզ ի տեղի չարչարանաց՝՝, եւ ծածկեցին զմեզ ստուերք մահու։ 21 Թէ մոռացեալ իցէ մեր զանուն Աստուծոյ մերոյ, կամ ձգեալ իցէ զձեռս մեր յաստուածս օտարս, 22 սակայն Աստուած խնդրէ զայս, զի Նա քննէ զգաղտնիս սրտից մերոց։ 23 Վասն քո մեռանիմք զօրհանապազ, համարեցաք որպէս զոչխար ի զենումն։ 24 Զարթիր, ընդէ՞ր ննջես, Տէր. արի եւ մի՛ մերժեր զմեզ ի սպառ։ 25 Զմէ՞ դարձուցանես զերեսս քո ի մէնջ, մոռանաս զաղքատութիւն եւ զնեղութիւնս մեր։ 26 Խոնարհ եղեն մինչեւ ի հող անձինք մեր, եւ յերկիր կցեցան մէջք մեր։ 27 Արի, Տէր, օգնեա մեզ, եւ փրկեա զմեզ վասն անուան քո։ |