ԳԻՐՔ ՍԱՂՄՈՍԱՑ 141 - Գրաբար Աստվածաշունչ (1895)ՍԱՂՄՈՍ ՃԽԱ (ՃԽԲ) 1 Իմաստութիւն Դաւթի. աղօթք, ի ժամանակի զի էր նա յայրի անդ։ 2 Ձայնիւ իմով ես առ Տէր կարդացի, ձայնիւ իմով զՏէր աղաչեցի։ 3 Սփռեցից առաջի Տեառն զաղօթս իմ, եւ զնեղութիւնս իմ առաջի նորա պատմեցից։ 4 Ի նուաղել յինէն հոգւոյ իմոյ, դու, Տէր, ծանեար զշաւիղս իմ, ի ճանապարհ յոր եւ գնայի՝ թաքուցաւ ինձ որոգայթ։ 5 Հայէի յաջմէ եւ տեսանէի, եւ ոչ ոք էր որ ճանաչէր զիս. կորեաւ յինէն փախուստ իմ՝՝, եւ ոչ ոք էր որ խնդրէր զանձն իմ։ 6 Աղաղակեցի առ քեզ, Տէր, եւ ասացի. Դու ես յոյս եւ բաժին իմ յերկրին կենդանեաց։ 7 Նայեաց, Տէր, յաղօթս իմ, զի ես խոնարհ եղէ յոյժ. ապրեցո զիս ի հալածչաց իմոց, զի հզօր եղեն քան զիս։ 8 Տէր, հան ի բանտէ զանձն իմ, գոհանամ զանուանէ քումմէ. ինձ սպասեն արդարք քո մինչեւ՝՝ հատուսցես ինձ։ |