ԳԻՐՔ ՍԱՂՄՈՍԱՑ 137 - Գրաբար Աստվածաշունչ (1895)ՍԱՂՄՈՍ ՃԼԷ (ՃԼԸ) Սաղմոս Դաւթի։ 1 Խոստովան եղէց քեզ, Տէր, բոլորով սրտիւ իմով. առաջի հրեշտակաց սաղմոս ասացից քեզ։ 2 Զի լուար զբանս բերանոյ իմոյ,՝՝ երկիր պագից ի տաճար սուրբ քո, եւ խոստովան եղէց անուան քում վասն ողորմութեան եւ ճշմարտութեան քո. մեծ արարեր յամենայնի զանուն սուրբ քո՝՝։ 3 Յորում աւուր կարդամ առ քեզ վաղվաղակի լուր ինձ, եւ բազում արասցես զօրութիւնս յանձն իմ։ 4 Խոստովան եղիցին առ քեզ ամենայն թագաւորք երկրի, զի լուան զբանս բերանոյ քո. 5 եւ օրհնեսցեն զճանապարհս քո. մեծ են փառք Տեառն։ 6 Բարձր է Տէր, զխոնարհս տեսանէ, զբարձունս ի հեռաստանէ ճանաչէ։ 7 Թէ գնացից ես ի մէջ նեղութեանց, կեցուսցես զիս. ի բարկութենէ թշնամւոյն ձգեցեր զձեռն քո, եւ փրկեաց զիս աջ քո։ 8 Եւ Տէր հատուսցէ ընդ իմ. Տէր, ողորմութիւն քո յաւիտեան. զգործս ձեռաց քոց մի՛ անտես առներ։ |