ԱՌԱԿՔ ՍՈՂՈՄՈՆԻ 6 - Գրաբար Աստվածաշունչ (1895)1 Որդեակ, եթէ լինիցիս երաշխաւոր բարեկամի քում, մատնեցեր զանձն քո թշնամւոյ. 2 զի որոգայթ բուռն են առն շրթունք իւր, եւ ըմբռնի բանիւ բերանոյ իւրոյ։ 3 Արդ արա, որդեակ, զոր ինչ ես պատուիրեմ քեզ՝ եւ կեցցես. զի անկար ի ձեռս չարաց վասն՝՝ բարեկամի քո. արդ պնդեա եւ մի՛ լքանիր, յորդորեա եւ զբարեկամն զոր առեր յերաշխի՝՝։ 4 Մի՛ տար քուն աչաց, եւ մի՛ նինջ արտեւանաց քոց. 5 զի ապրեսցիս որպէս զայծեամն ի հաղբից, եւ իբրեւ զհաւ ի ծուղակաց։ 6 Երթ առ մրջիւնն, ո՛վ վատ, եւ նախանձեաց ընդ ճանապարհս նորա, եւ լեր իմաստնագոյն եւս քան զնա՝՝։ 7 Զի նորա ոչ գոյ հողագործութիւն եւ ոչ հարկադիր, եւ ոչ ընդ տերամբք է, 8 եւ պատրաստէ ամարանի զկերակուր, եւ բազում համբարս դնէ ի հունձս։ Կամ երթ առ մեղուն եւ ուսիր զիա՛րդ գործօն է, եւ գործ նորա ո՛րպէս պարկեշտութեամբ գործի. զորոյ զվաստակն թագաւորք եւ տնանկք ի բժշկութիւն մատուցանեն. ցանկալի է ամենեցուն եւ մեծարոյ. զի թէպէտ եւ տկար է զօրութեամբ, պատուեաց զիմաստութիւն՝ եւ յարգեցաւ։՝՝ 9 Մինչեւ յե՞րբ յորսայսեալ կաս, ո՛վ վատ, կամ ե՞րբ ի քնոյ զարթիցես։ 10 Փոքր մի ննջիցես, փոքր մի նստիցիս,՝՝ փոքր մի նիրհիցես, փոքր մի հանգուցանիցես զձեռն քո ի վերայ լանջաց քոց, 11 ապա այնուհետեւ հասանիցէ ի վերայ քո իբրեւ զչար ուղեւոր տնանկութիւն, եւ կարօտութիւն իբրեւ զժիր սուրհանդակ։ Ապա եթէ անդանդաղ լինիցիս, հասանիցէ իբրեւ զաղբեւր ամառն քո, եւ կարօտութիւն իբրեւ այր մի չար ինքնահալած լինիցի։՝՝ 12 Այր անօրէն եւ անզգամ գնայ զճանապարհս թեւրս. 13 քանզի նոյն ինքն ակնարկէ ակամբ, եւ նշանակէ ոտամբ, եւ ուսուցանէ նշանացի մատամբք։ 14 Սիրտ խոտորեալ նիւթէ զչարիս. յամենայն ժամանակի այնպիսին խռովութիւնս առնէ քաղաքի՝՝։ 15 Եւ վասն այնորիկ յանկարծակի հասցէ նմա կորուստ իւր, հաշումն եւ մաշումն առանց բժշկութեան։ 16 Զի խնդայ ընդ ամենայն զոր ատեայ Տէր, եւ խորտակի վասն պղծութեան անձին իւրոյ.՝՝ 17 աչք թշնամանողի, լեզու անիրաւ, ձեռք որ հեղուն զարիւն արդար, 18 սիրտ որ նիւթէ զխորհուրդս չարս, եւ ոտք որ փութան գործել զչարիս՝ սատակեսցին։ 19 Բորբոքէ զստութիւն վկայ անիրաւ, եւ արկանէ գրգռութիւն ի մէջ եղբարց։ 20 Որդեակ, պահեա զօրէնս հօր քո, եւ մի՛ մերժեր զխրատ մօր քո։ 21 Ընկալ զնոսա յանձին եւ ի գլուխ՝՝ քո հանապազ, եւ արկ իբրեւ զմանեակ ի պարանոց քո։ 22 Յորժամ գնասցես՝ ընդ քեզ տարջիր, եւ ընդ քեզ եղիցի.՝՝ յորժամ ննջիցես՝ պահեսցէ զքեզ, եւ յորժամ յառնիցես՝ խօսակից իցէ քեզ։ 23 Զի ճրագ է պատուիրան օրինացն, լոյս՝՝ եւ ճանապարհ կենաց՝ յանդիմանութիւն եւ խրատ, 24 պահել զքեզ յառնակին կնոջէ, եւ ի չարախօսութենէ՝՝ օտար լեզուի։ 25 Որդեակ, մի՛ յաղթեսցէ քեզ ցանկութիւն գեղոյ, եւ մի՛ ըմբռնեսցիս աչօք քովք,՝՝ եւ մի՛ յափշտակիցիս արտեւանամբք նորա։ 26 Զի գինք կնոջ պոռնկի՝ որչափ՝՝ նկանակի միոջ հացի. քանզի կին չար՝ զարանց պատուականաց զհոգիս որսայ։ 27 Ծրարիցէ՞ ոք հուր ի գոգ, եւ զհանդերձն ոչ այրիցէ. 28 կամ գնայցէ՞ ոք ի վերայ կայծականց հրոյ, եւ զոտս իւր ոչ խարշիցէ։ 29 Նոյնպէս եւ որ մտանէ առ առնակին՝ առանց պատժի ոչ լիցի, եւ՝՝ ոչ արդարասցի ամենայն որ մերձենայ առ նա։ 30 Ոչ ինչ են զարմանք եթէ ըմբռնեսցի ոք ի գողութեան.՝՝ գողանայ զի լցուսցէ զանձն իւր քաղցեալ. 31 ապա եթէ ըմբռնեսցի, եւթնպատիկ տուժեսցի, եւ զամենայն ինչս իւր տուեալ՝ ապրեցուցանէ զանձն՝՝։ 32 Իսկ որ շնայ առ պակասութեան մտաց՝՝, կորուստ անձին իւրում ստանայ. 33 ցաւս եւ անարգանս կրէ, եւ նախատինք նորա մի՛ կորիցեն յաւիտեան։ 34 Լի է նախանձու սրտմտութիւն առն նորա, եւ ոչ խնայեսցէ յաւուր դատաստանի. 35 ոչ փոխանակեսցէ եւ ոչ ընդ միոյ իրիք փրկանաց զթշնամութիւն, եւ ոչ վճարիցի՝՝ բազում կաշառօք։ |