ՄԱՐԳԱՐԷՈՒԹԻՒՆ ԱԲԴԻՈՒ 1 - Գրաբար Աստվածաշունչ (1895)1 Տեսիլ Աբդիու։ Այսպէս ասէ Տէր ցԵդովմ. Լուր լուայ ի Տեառնէ, եւ պաշարումն առաքեաց՝՝ ի հեթանոսս. Արիք եւ յարիցուք ի վերայ նորա ի պատերազմ։ 2 Ահա սակաւաւոր ետու զքեզ յազգս, եւ անարգեալ ես դու յոյժ։ 3 Հպարտութիւն սրտի քո բարձրացոյց զքեզ բնակել ի ծակս վիմաց. բարձրացուցանել զբնակութիւն իւր, եւ ասել՝՝ ի սրտի իւրում. Ո՞վ իջուսցէ զիս յերկիր։ 4 Եթէ բարձրասցիս իբրեւ զարծուի, եւ եթէ ի մէջ աստեղաց դիցես զբոյն քո, եւ անտի իջուցից զքեզ, ասէ Տէր։ 5 Եթէ գողոց մտեալ էր առ քեզ կամ աւազակաց գիշերոյ, ուր եւ էր ղօղէի՞ր՝՝, եւ ո՞չ արդեւք գողանային բաւական իւրեանց. եւ եթէ կթողք մտեալ էին ի քեզ, եւ ո՞չ եթէ ճիռ մի ոչ թողուին։ 6 Զիա՜րդ քննեցաւ Եսաւ, եւ ըմբռնեցան ծածուկք նորա։ 7 Մինչեւ ի սահմանս առաքեցին զքեզ ամենայն արք ուխտի քո, դարձան ընդդէմ քո,՝՝ զօրացան ի վերայ քո արք խաղաղութեան քո. վարանեցին զքեզ՝՝. եւ ոչ գոյր իմաստութիւն ի նմա։ 8 Յաւուր յայնմիկ, ասէ Տէր, կորուսից զիմաստութիւն յերկրէն Եդովմայ, եւ զհանճար ի լեռնէն Եսաւայ։ 9 Եւ սարսեսցեն պատերազմողք քո որ ի Թեմանայ՝՝. զի բարձցի մարդ ի լեռնէն Եսաւայ։ 10 Վասն սպանման եւ ամպարշտութեան եղբօրն՝՝ Յակոբայ ծածկեսցէ զքեզ ամօթ, եւ ջնջեսցիս յաւիտեան։ 11 Յօրէ յորմէ կացեր հակառակ, յաւուրն գերելոյ այլազգեաց զզօրութիւն նորա, եւ օտարք մտին ընդ դրունս նորա, եւ ի վերայ Երուսաղեմի վիճակս արկանէին, եւ դուք էիք՝՝ իբրեւ զմի ի նոցանէն։ 12 Եւ մի՛ տեսցես զաւեր եղբօրն քո յաւուրն օտարաց, եւ մի՛ ոտնհար լիցիս՝՝ որդւոցն Յուդայ յաւուրս կորստեան նոցա, եւ մի՛ մեծաբանեսցես յաւուր նեղութեան, 13 եւ մի՛ մտանիցես ընդ դրունս ժողովրդոց յաւուր ցաւոց նոցա. եւ մի՛ տեսցես զժողովս նոցա յաւուր սատակման նոցա, եւ մի՛ ի վերայ հարկանիցիս զօրութեան նոցա յաւուր կորստեան նոցա։ 14 Եւ մի՛ առնուցուս զկիրճս նոցա՝՝ սատակել զապրեալսն ի նոցանէ, եւ մի՛ պաշարեսցես՝՝ զփախստեայս նոցա յաւուր նեղութեան նոցա։ 15 Զի մերձ է օր Տեառն ի վերայ ամենայն ազգաց. զոր օրինակ արարեր դու՝ եղիցի քեզ, եւ հատուցումն քո հատուսցի ի գլուխ քո։ 16 Զի զոր օրինակ արբեր ի վերայ լերին սրբութեան իմոյ, արբցեն ամենայն ազգք գինի. արբցեն եւ զիջցին՝՝, եւ եղիցին իբրեւ չեղեալք։ 17 Բայց ի լեառն Սիոն եղիցի փրկութիւն, եւ եղիցի սրբութիւն. եւ ժառանգեսցեն տունն Յակոբու զժառանգիչս՝՝ իւրեանց։ 18 Եւ եղիցի տունն Յակոբու հուր, եւ տունն Յովսեփու բոց, եւ տունն Եսաւայ եղէգն. վառեսցին զնովաւ եւ կերիցեն զնա, եւ մի՛ մնասցէ կրակաբեր տանն Եսաւայ. զի Տէր խօսեցաւ։ 19 Եւ ժառանգեսցեն Նագեբացիք զլեառն Եսաւայ, եւ Սեփելացիք զայլազգիս՝՝. եւ ժառանգեսցեն զլեառն Եփրեմայ, եւ զդաշտն Շամրնի եւ զԲենիամին եւ զԳաղաադացին։ 20 Եւ գերութեան սկիզբն այն իցէ որդւոցն Իսրայելի, երկիր Քանանացւոց՝՝ մինչեւ ի Սարփաթ, եւ գերութիւնն Երուսաղեմի մինչեւ յԵփրաթա. եւ՝՝ ժառանգեսցեն զքաղաքս Նագեբայ։ 21 Եւ ելցեն ապրեալք ի լեռնէ Սիոնի առնուլ վրէժ ի լեռնէն Եսաւայ, եւ եղիցի Տեառն արքայութիւն՝՝։ |