ԹԻՒՔ 7 - Գրաբար Աստվածաշունչ (1895)1 Եւ եղեւ յաւուր յորում կատարեաց Մովսէս առ ի կանգնելոյ զխորանն, եւ օծ զնա եւ զամենայն սպասս նորա, եւ զզոհանոցն եւ զամենայն սպաս նորա, եւ օծ զնոսա եւ սրբեաց զնոսա, 2 եւ մատուցին իշխանքն Իսրայելի երկոտասան իշխանք տանց նահապետաց նոցա. նոքա էին իշխանք ցեղիցն, եւ նոքա կային ի վերայ ոստիկանութեանն։ 3 Եւ մատուցին զընծայս իւրեանց առաջի Տեառն, վեց սայլս զարդարեալս եւ եզինս երկոտասանս, սայլ մի յերկուց իշխանաց եւ զուարակ յիւրաքանչիւր ումեքէ. եւ ածին առաջի խորանին։ 4 Խօսեցաւ Տէր ընդ Մովսիսի եւ ասէ. 5 Առ զայդ ի դոցանէ, եւ եղիցին ի գործ սպասաւորութեան խորանին վկայութեան. եւ տացես զայդ ցՂեւտացիսն՝ իւրաքանչիւր ըստ իւրում սպասաւորութեան։ 6 Եւ առեալ Մովսիսի զսայլսն եւ զեզինսն՝ ետ ցՂեւտացիսն։ 7 Սայլս երկուս եւ եզինս չորս ետ ցորդիսն Գերսոնի ըստ սպասաւորութեան իւրեանց. 8 եւ սայլս չորս եւ եզինս ութ ետ ցորդիսն Մերարեայ ըստ սպասաւորութեան իւրեանց, ի ձեռն Իթամարայ որդւոյ Ահարոնի քահանայի։ 9 Եւ ցորդիսն Կահաթու ոչինչ ետ. զի զսպասաւորութիւն սրբութեան սրբութեանցն ունէին, եւ յուսս իւրեանց բառնային։ 10 Եւ մատուցին իշխանքն ի նաւակատիս սեղանոյն, յաւուր յորում օծ զնա, եւ բերին իշխանքն զընծայս իւրեանց առաջի սեղանոյն։ 11 Եւ ասէ Տէր ցՄովսէս. Մի մի իշխան մի մի օր մատուսցեն զընծայս իւրեանց ի նաւակատիս սեղանոյն։ 12 Եւ մատուցանէր զընծայս իւր յաւուրն առաջնում Նաասոն որդի Ամինադաբայ, իշխան ցեղին Յուդայ։ 13 Մատոյց զընծայսն իւր. կոնք մի արծաթի՝ ի հարեւր եւ յերեսուն կշռորդէ, տաշտ մի արծաթի՝ յեւթանասուն սկեղէ ըստ սրբութեան սկեղն, երկոքին լի նաշհով զանգելով ընդ իւղոյ ի զոհ, 14 տուփ մի ոսկի ի տասն դահեկանէ լի խնկով, 15 զուարակ մի յանդւոյ, խոյ մի, գառն մի տարեւոր յողջակէզ, 16 եւ նոխազ մի յայծեաց վասն մեղաց, 17 եւ ի զոհ փրկութեան՝ երինջս երկուս, խոյս հինգ, նոխազս հինգ, որոջս տարեւորս հինգ. այս ընծայ Նաասոնի որդւոյ Ամինադաբայ։ 18 Եւ յաւուրն երկրորդի մատոյց Նաթանայէլ որդի Սովգարայ, իշխան ցեղին Իսաքարայ։ 19 Եւ մատոյց զընծայս իւր. կոնք մի արծաթի ի հարեւր եւ յերեսուն կշռորդէ, տաշտ մի արծաթի՝ յեւթանասուն սկեղէ ըստ սրբութեան սկեղն, երկոքեան լի նաշհով զանգելով ընդ իւղոյ ի զոհ, 20 տուփ մի ի տասն դահեկանէ՝՝ լի խնկով, 21 զուարակ մի յանդւոյ, խոյ մի, գառն մի տարեւոր յողջակէզ, 22 եւ նոխազ մի յայծեաց վասն մեղաց, 23 եւ ի զոհ փրկութեան՝ երինջս երկուս, խոյս հինգ, նոխազս հինգ, որոջս տարեւորս հինգ. այս ընծայ Նաթանայելի որդւոյ Սովգարայ։ 24 Եւ յաւուրն երրորդի՝ իշխան որդւոցն Զաբուղոնի, Եղիաբ որդի Քեղովնի, 25 զընծայսն իւր. կոնք մի արծաթի ի հարեւր եւ յերեսուն կշռորդէ, տաշտ մի արծաթի յեւթանասուն սկեղէ ըստ սրբութեան սկեղն, երկոքին լի նաշհով զանգելով ընդ իւղոյ ի զոհ, 26 տուփ մի ի տասն դահեկանէ՝՝ լի խնկով, 27 զուարակ մի յանդւոյ, խոյ մի, գառն մի տարեւոր յողջակէզ, 28 եւ նոխազ մի յայծեաց վասն մեղաց, 29 եւ ի զոհ փրկութեան՝ երինջս երկուս, խոյս հինգ, նոխազս հինգ, որոջս տարեւորս հինգ. այս ընծայ Եղիաբու որդւոյ Քեղովնի։ 30 Եւ յաւուրն չորրորդի՝ իշխան որդւոցն Ռուբենի, Եղիսուր որդի Սեդիուրայ, 31 զընծայս իւր. կոնք մի արծաթի ի հարեւր եւ յերեսուն կշռորդէ, տաշտ մի արծաթի յեւթանասուն սկեղէ ըստ սրբութեան սկեղն, երկոքին լի նաշհով զանգելով ընդ իւղոյ ի զոհ, 32 տուփ մի ի տասն դահեկանէ՝՝ լի խնկով, 33 զուարակ մի յանդւոյ, խոյ մի, գառն մի տարեւոր յողջակէզ, 34 եւ նոխազ մի յայծեաց վասն մեղաց, 35 եւ ի զոհ փրկութեան՝ երինջս երկուս, խոյս հինգ, նոխազս հինգ, որոջս տարեւորս հինգ. այս ընծայ Եղիսուրայ որդւոյ Սեդիուրայ։ 36 Եւ յաւուրն հինգերորդի՝ իշխան որդւոցն Շմաւոնի, Սաղամիէլ որդի Սուրիսադայի, 37 զընծայս իւր. կոնք մի արծաթի ի հարեւր եւ յերեսուն կշռորդէ, տաշտ մի արծաթի յեւթանասուն սկեղէ ըստ սրբութեան սկեղն, երկոքին լի նաշհով զանգելով ընդ իւղոյ ի զոհ 38 տուփ մի ի տասն դահեկանէ՝՝ լի խնկով, 39 զուարակ մի յանդւոյ, խոյ մի, գառն մի տարեւոր յողջակէզ, 40 եւ նոխազ մի յայծեաց վասն մեղաց, 41 եւ ի զոհ փրկութեան՝ երինջս երկուս, խոյս հինգ, նոխազս հինգ, որոջս տարեւորս հինգ. այս ընծայ Սաղամիելի որդւոյ Սուրիսադայի։ 42 Եւ յաւուրն վեցերորդի՝ իշխան որդւոցն Գադայ, Եղիսափան որդի Դագուելի, 43 զընծայս իւր. կոնք մի արծաթի ի հարեւր եւ յերեսուն կշռորդէ, տաշտ մի արծաթի յեւթանասուն սկեղէ ըստ սրբութեան սկեղն. երկոքին լի նաշհով զանգելով ընդ իւղոյ ի զոհ, 44 տուփ մի ի տասն դահեկանէ՝՝ լի խնկով, 45 զուարակ մի յանդւոյ, խոյ մի, գառն մի տարեւոր յողջակէզ, 46 եւ նոխազ մի յայծեաց վասն մեղաց, 47 եւ ի զոհ փրկութեան՝ երինջս երկուս, խոյս հինգ, նոխազս հինգ, որոջս տարեւորս հինգ. այս ընծայ Եղիսափանայ որդւոյ Դագուելի։ 48 Եւ յաւուրն եւթներորդի՝ իշխան որդւոցն Եփրեմի, Եղիսամա որդի Եմիուդայ, 49 զընծայսն իւր. կոնք մի արծաթի ի հարեւր եւ յերեսուն կշռորդէ, տաշտ մի արծաթի յեւթանասուն սկեղէ ըստ սրբութեան սկեղն, երկոքին լի նաշհով զանգելով ընդ իւղոյ ի զոհ, 50 տուփ մի ի տասն դահեկանէ՝՝ լի խնկով, 51 զուարակ մի յանդւոյ, խոյ մի, գառն մի տարեւոր յողջակէզ, 52 եւ նոխազ մի յայծեաց վասն մեղաց, 53 եւ ի զոհ փրկութեան՝ երինջս երկուս, խոյս հինգ, նոխազս հինգ, որոջս տարեւորս հինգ. այս ընծայ Եղիսամայ որդւոյ Եմիուդայ։ 54 Եւ յաւուրն ութերորդի՝ իշխան որդւոցն Մանասէի, Գամաղիէլ որդի Փադասուրայ, 55 զընծայսն իւր. կոնք մի արծաթի ի հարեւր եւ յերեսուն կշռորդէ, տաշտ մի արծաթի յեւթանասուն սկեղէ ըստ սրբութեան սկեղն. երկոքին լի նաշհով զանգելով ընդ իւղոյ ի զոհ, 56 տուփ մի ի տասն դահեկանէ՝՝ լի խնկով, 57 զուարակ մի յանդւոյ, խոյ մի, գառն մի տարեւոր յողջակէզ, 58 եւ նոխազ մի յայծեաց վասն մեղաց, 59 եւ ի զոհ փրկութեան՝ երինջս երկուս, խոյս հինգ, նոխազս հինգ, որոջս տարեւորս հինգ. այս ընծայ Գամաղիելի որդւոյ Փադասուրայ։ 60 Եւ յաւուրն իններորդի՝ իշխան որդւոցն Բենիամինի Աբիդան որդի Գեդէոնի, 61 զընծայս իւր. կոնք մի արծաթի ի հարեւր եւ յերեսուն կշռորդէ, տաշտ մի արծաթի յեւթանասուն սկեղէ ըստ սրբութեան սկեղն. երկոքին լի նաշհով զանգելով ընդ իւղոյ ի զոհ, 62 տուփ մի ի տասն դահեկանէ՝՝ լի խնկով, 63 զուարակ մի յանդւոյ, խոյ մի, գառն մի տարեւոր յողջակէզ, 64 եւ նոխազ մի յայծեաց վասն մեղաց, 65 եւ ի զոհ փրկութեան՝ երինջս երկուս, խոյս հինգ, նոխազս հինգ, որոջս տարեւորս հինգ. այս ընծայ Աբիդանայ որդւոյ Գեդէոնի։ 66 Եւ յաւուրն տասներորդի՝ իշխան որդւոցն Դանայ Աքիեզեր որդի Ամիսադայի, 67 զընծայսն իւր. կոնք մի արծաթի ի հարեւր եւ յերեսուն կշռորդէ, տաշտ մի արծաթի յեւթանասուն սկեղէ ըստ սրբութեան սկեղն. երկոքին լի նաշհով զանգելով ընդ իւղոյ ի զոհ, 68 տուփ մի ի տասն դահեկանէ՝՝ լի խնկով, 69 զուարակ մի յանդւոյ, խոյ մի, գառն մի տարեւոր յողջակէզ, 70 եւ նոխազ մի յայծեաց վասն մեղաց, 71 եւ ի զոհ փրկութեան՝ երինջս երկուս, խոյս հինգ, նոխազս հինգ, որոջս տարեւորս հինգ. այս ընծայ Աքիեզերայ որդւոյ Ամիսադայի։ 72 Եւ յաւուրն մետասաներորդի՝ իշխան որդւոցն Ասերայ, Փագիէլ որդի Եքրանայ, 73 զընծայսն իւր. կոնք մի արծաթի ի հարեւր եւ յերեսուն կշռորդէ, տաշտ մի արծաթի յեւթանասուն սկեղէ ըստ սրբութեան սկեղն, երկոքին լի նաշհով զանգելով ընդ իւղոյ ի զոհ, 74 տուփ մի ի տասն դահեկանէ՝՝ լի խնկով, 75 զուարակ մի յանդւոյ, խոյ մի, գառն մի տարեւոր յողջակէզ, 76 եւ նոխազ մի յայծեաց վասն մեղաց, 77 եւ ի զոհ փրկութեան՝ երինջս երկուս, խոյս հինգ, նոխազս հինգ, որոջս տարեւորս հինգ. այս ընծայ Փագիելի որդւոյ Եքրանայ։ 78 Եւ յաւուրն երկոտասաներորդի՝ իշխան որդւոցն Նեփթաղիմայ, Աքիրէ որդի Ենանայ, 79 զընծայսն իւր. կոնք մի արծաթի ի հարեւր եւ յերեսուն կշռորդէ, տաշտ մի արծաթի յեւթանասուն սկեղէ ըստ սրբութեան սկեղն, երկոքին լի նաշհով զանգելով ընդ իւղոյ ի զոհ, 80 տուփ մի ի տասն դահեկանէ՝՝ լի խնկով, 81 զուարակ մի յանդւոյ, խոյ մի, գառն մի տարեւոր յողջակէզ, 82 եւ նոխազ մի յայծեաց վասն մեղաց, 83 եւ ի զոհ փրկութեան՝ երինջս երկուս, խոյս հինգ, նոխազս հինգ, որոջս տարեւորս հինգ. այս ընծայ Աքիրէի որդւոյ Ենանայ։ 84 Այս է օրէն նաւակատեաց սեղանոյն յաւուրն յորում օծ զնա. յիշխանաց որդւոցն Իսրայելի, կոնք արծաթիք երկոտասան, տաշտք արծաթիք երկոտասան, տուփք երկոտասան, 85 ի հարեւր եւ յերեսուն սկեղէ կոնք մի, յեւթանասուն սկեղէ տաշտ մի. ամենայն արծաթ սպասուցն՝ երկու հազար եւ չորեքհարեւր սիկղ ըստ սրբութեան սկեղն. 86 տուփք ոսկիք երկոտասանք լի խնկով, ամենայն ոսկի տփոցն՝ հարեւր եւ քսան դահեկան. 87 եւ ամենայն արջառ յողջակէզ, զուարակք երկոտասանք, խոյք երկոտասանք, գառինք տարեւորք անարատք երկոտասան, եւ զոհք նոցա եւ նուէրք նոցին. եւ նոխազք յայծեաց վասն մեղաց երկոտասանք. 88 եւ ամենայն արջառք ի զոհ ողջակիզին երկոտասանք, երինջք քսան եւ չորք, խոյք վաթսուն, նոխազք վաթսուն, որոջք տարեւորք անարատք վաթսուն. այս են նաւակատիք սեղանոյն յետ կատարելոյ զձեռս նոցա՝՝։ 89 Ի մտանելն Մովսիսի ի խորանն վկայութեան խօսել ընդ նմա, եւ լուաւ զբարբառն Տեառն ի խօսելն՝՝ ընդ նմա ի վերուստ ի քաւութենէ անտի՝ ի միջոյ երկուցն քերովբէից որ էին՝՝ ի վերայ տապանակին վկայութեան, ի միջոյ երկուց քերովբէիցն, եւ խօսէր ընդ նմա։ |