ԹԻՒՔ 36 - Գրաբար Աստվածաշունչ (1895)1 Եւ մատեան իշխանք ցեղի որդւոցն Գաղաադու որդւոյ Մաքիրայ որդւոյ Մանասէի ի ցեղէ որդւոցն Յովսեփու, եւ խօսեցան առաջի Մովսիսի եւ առաջի Եղիազարու քահանայի, եւ՝՝ առաջի իշխանաց տանց նահապետաց որդւոցն Իսրայելի, 2 եւ ասեն. Տեառնդ մերում հրաման ետ Տէր տալ զերկիրն ժառանգութեան վիճակ որդւոցն Իսրայելի. եւ տեառնդ հրաման ետ Տէր տալ ժառանգութիւն դստերացն Սաղպաադու եղբօր մերում.՝՝ 3 եւ արդ եթէ լինիցին միում ցեղիցն Իսրայելի կանայք, եւ բառնայցի վիճակ նոցա ի կալուածոց հարց մերոց, եւ յաւելուցու ի ժառանգութիւն այնր ցեղի որոց լինիցինն կանայք, եւ ի վիճակէ ժառանգութեան մերոյ բառնայցի. 4 եւ եթէ լինիցի թողութիւն որդւոցն Իսրայելի, յաւելուցու ժառանգութիւն նոցա ի ժառանգութիւն ցեղին որոց լինիցինն կանայք, եւ ի ժառանգութենէ ցեղի ազգիս մերոյ բառնայցի ժառանգութիւն նոցա։ 5 Եւ պատուիրեաց Մովսէս որդւոցն Իսրայելի հրամանաւ Տեառն եւ ասէ, առ այն զոր ասաց ցնա՝՝ ցեղ որդւոցն Յովսեփայ։ 6 Այս բան է զոր հրաման ետ Տէր դստերացն Սաղպաադու, եւ ասէ. Որոց հաճոյ թուեսցի յաչս նոցա՝ եղիցին նոքա կանայք, բայց ի ցեղէ հօրն իւրեանց եղիցին կանայք. 7 եւ մի՛ փոխեսցի ժառանգութիւն որդւոցն Իսրայելի ցեղէ ի ցեղ. զի յիւրաքանչիւր ժառանգութիւն հայրենի ցեղի իւրոյ յարեսցին որդիքն Իսրայելի։ 8 Եւ ամենայն օրիորդ մերձաւոր ժառանգութեան՝՝ ի ցեղից որդւոցն Իսրայելի՝ միում ումեք յազգականէ հօր իւրոյ լինիցի կին, զի մերձաւորեցուսցեն որդիքն Իսրայելի իւրաքանչիւր զհայրենի ժառանգութիւն իւր. 9 եւ մի՛ փոխեսցի վիճակ ի ցեղէ յայլ ցեղ. այլ իւրաքանչիւր յիւր ժառանգութիւն յարեսցին որդիքն Իսրայելի։ 10 Եւ որպէս հրաման ետ Տէր Մովսիսի, այնպէս արարին դստերքն Սաղպաադու։ 11 Եւ եղեն Թերսա եւ Եգղա եւ Մեղքա եւ Նուա եւ Մաաղա դստերքն Սաղպաադու՝ հօրեղբարց որդւոց իւրեանց կանայք։ 12 Ի ցեղէն Մանասէի որդւոցն՝՝ Յովսեփայ եղեն կանայք, եւ եղեն ժառանգութիւնք նոցա յազգատոհմի հօրն իւրեանց։ 13 Այս են պատուիրանք եւ իրաւունք՝՝ եւ դատաստանք զոր պատուիրեաց Տէր ի ձեռն Մովսիսի յարեւմուտս Մովաբու, առ եզերբ Յորդանանու յանդիման Երիքովի։ |