ԹԻՒՔ 35 - Գրաբար Աստվածաշունչ (1895)1 Եւ խօսեցաւ Տէր ընդ Մովսիսի յարեւմուտս Մովաբու՝ առ եզերբ Յորդանանու յանդիման Երիքովի, եւ ասէ. 2 Հրաման տուր որդւոցն Իսրայելի, եւ տացեն Ղեւտացւոցն ի վիճակաց կալուածոց իւրեանց քաղաքս բնակութեանց, եւ բուրաստանս շուրջ զքաղաքօք իւրեանց տացեն Ղեւտացւոցն։ 3 Եւ եղիցին նոցա քաղաքք բնակութեան, եւ զատուցեալքն նոցա եղիցին խաշանց նոցա, եւ ամենայն չորքոտանեաց նոցա։ 4 Եւ արուարձանք քաղաքացն զորս տայցէք Ղեւտացւոցն ի պարսպէ քաղաքին եւ արտաքոյ պարսպին երկուս հազարս կանգունս՝՝ շուրջանակի։ 5 Եւ չափեսջիք արտաքոյ քաղաքին, յարեւելից կողմանէ երկուս հազարս կանգունս, եւ ընդ հարաւոյ կողմն երկուս հազարս կանգունս, եւ ընդ ծովակողմն երկուս հազարս կանգունս, եւ ընդ կողմն հիւսիսի երկուս հազարս կանգունս. եւ քաղաք ի մէջ այնորիկ լինիցի ձեզ. եւ զարուարձանս՝՝ քաղաքացն։ 6 Եւ զքաղաքսն զորս տայցէք Ղեւտացւոցն, զվեց քաղաքս ապաստանից զոր տայցէք, փախչել անդր սպանողին. եւ այնու քառասուն եւ երկուս քաղաքս։ 7 Ընդ ամենայն քաղաքս՝ քառասուն եւ ութ քաղաք տայցէք Ղեւտացւոցն, եւ զնոսա եւ զբուրաստանս իւրեանց։ 8 Եւ զքաղաքս՝ զոր տայցէք ի կալուածոց որդւոցն Իսրայելի, ի բազմաց բազումս, եւ ի սակաւուց՝ սակաւս. ըստ իւրաքանչիւր ժառանգութեան զոր ժառանգիցեն՝ տացեն ի քաղաքաց անտի՝ Ղեւտացւոցն։ 9 Եւ խօսեցաւ Տէր ընդ Մովսիսի եւ ասէ. 10 Խօսեաց ընդ որդիսն Իսրայելի եւ ասասցես ցնոսա. Դուք աւադիկ անցանէք ընդ Յորդանան յերկիրն Քանանացւոց, 11 եւ զատուսջիք ձեզ քաղաքս, որ լինիցին ձեզ ապաստանաց՝ փախչել անդր սպանողին, ամենայն որ հարկանիցէ զանձն ուրուք ակամայ։ 12 Եւ եղիցին ձեզ քաղաքք ապաստանի ի մերձաւորէ արեանն, եւ մի՛ մեռանիցի սպանօղն մինչեւ կացցէ առաջի ժողովրդեանն ի դատաստանի։ 13 Եւ քաղաքքն զոր տայցէք՝ վեց քաղաքք ապաստանի լինիցին ձեզ։ 14 Երիս քաղաքս տաջիք յայնկոյս Յորդանանու, եւ երիս քաղաքս տաջիք յերկրին Քանանացւոց, եւ եղիցի այն ապաւինութիւն 15 որդւոցն Իսրայելի, եկին եւ պանդխտին ի միջի ձերում, եղիցին քաղաքքն այնոքիկ վեց՝ ապաստանք, փախչել անդր ամենայնի որ հարկանիցէ զանձն ուրուք ակամայ։ 16 Եւ եթէ երկաթեղէն անօթով ոք հարկանիցէ եւ սպանանիցէ զնա, սպանօղ է. մահու մեռցի սպանօղն։ 17 Եւ եթէ բռնաքարաւ որով մեռանիցի ոք՝ հարկանիցէ զնա եւ մեռանիցի, սպանօղ է. մահու մեռցի սպանօղն։ 18 Եւ եթէ փայտեղէն անօթով ի ձեռանէ որով մեռանիցի ոք՝ հարկանիցէ զնա եւ մեռանիցի, սպանօղ է. մահու մեռցի սպանօղն. 19 մերձաւոր արեանն սպանցէ զսպանօղն. յորժամ պատահեսցէ նմա՝ սպանցէ զնա։ 20 Եւ եթէ առ թշնամութեան մղեսցէ զնա, եւ ձգեսցէ նմա զամենայն անօթ խարդախութեամբ եւ մեռանիցի, 21 կամ առ քինալ հարկանիցէ զնա ձեռամբ իւրով եւ մեռանիցի, մահու մեռցի որ եհարն. սպանօղ է, մահու մեռցի որ սպանիցէն.՝՝ մերձաւոր արեանն սպանցէ զսպանօղն ի պատահելն նորա նմա։ 22 Ապա թէ վրիպակաւ եւ ոչ առ թշնամութեան մղեսցէ զնա, եւ ձգեսցէ նմա զամենայն անօթ եւ ոչ խարդախութեամբ, 23 կամ զամենայն քար որով մեռանիցի, եւ ոչ գիտութեամբ հարկանիցէ զնա եւ մեռանիցի, եւ նա չէր նորա թշնամի եւ ոչ խնդրէր չար առնել նմա, 24 դատեսցի ժողովուրդն ի մէջ հարկանելեացն եւ ի մէջ մերձաւորի արեանն ըստ դատաստանացս այսոցիկ. 25 եւ ապրեցուսցէ ժողովուրդն զսպանօղն ի մերձաւորէ արեանն, եւ յուղարկեսցէ զնա ժողովուրդն անդրէն ի քաղաքն ապաստանի յոր ապաւինեալն էր. եւ բնակեսցէ անդ մինչեւ մեռանիցի քահանայն մեծ զոր օծին իւղովն սրբութեան։ 26 Եւ եթէ ելանելով ելանիցէ սպանօղն ըստ սահմանս քաղաքին յոր ապաւինեցաւն, 27 եւ գտցէ զնա մերձաւոր արեանն արտաքոյ սահմանաց քաղաքին ապաստանի իւրոյ, եւ սպանցէ մերձաւոր արեանն զսպանօղն, մի՛ լինիցի մահապարտ։ 28 Վասն այնորիկ ի քաղաքի ապաւինին իւրոյ բնակեսցէ, մինչեւ մեռանիցի քահանայն մեծ. եւ յետ մեռանելոյ քահանային մեծի՝ դարձցի անդրէն սպանօղն յերկիր կալուածոց իւրոց։ 29 Եւ եղիցի այս ձեզ յիրաւունս դատաստանի յազգս ձեր, յամենայն բնակութեան ձերում։ 30 Ամենայն որ հարկանիցէ զանձն, վկայիւք սպանցեն զսպանօղն. եւ մի միայն վկայ մի՛ վկայեսցէ սպանանելոյ զանձն։ 31 Եւ փրկանս ընդ անձին ի սպանողէն որ մահապարտ իցէ՝ մի՛ առնուցուք. այլ մահու մեռանիցի։ 32 Եւ մի՛ առնուցուք փրկանս վասն փախչելոյ ի քաղաքն ապաստանի առ միւսանգամ բնակելոյ յերկրին, մինչեւ մեռանիցի քահանայն մեծ։ 33 Եւ մի՛ շաղախիցէք զերկիրն. եւ ոչ քաւիցի երկիրն յարենէն հեղլոյ ի վերայ նորա, եթէ ոչ արեամբն հեղլով։ 34 Եւ մի՛ պղծիցէք զերկիրն յորում բնակիցէք ի նմա, յորում ես բնակեցայց ի միջի ձերում. զի ես եմ Տէր Աստուած, որ բնակեմ ի մէջ որդւոցն Իսրայելի։ |