ԹԻՒՔ 33 - Գրաբար Աստվածաշունչ (1895)1 Եւ այս են բանակետղք որդւոցն Իսրայելի՝ յորմէ հետէ ելին յերկրէն Եգիպտացւոց հանդերձ զօրուն իւրեանց ի ձեռն Մովսիսի եւ Ահարոնի։ 2 Եւ գրեաց Մովսէս զչուս նոցա եւ զբանակետղս իւրեանց բանիւ Տեառն. եւ այս են բանակետղք գնացից նոցա։ 3 Չուեցին յՌամեսսեայ յամսեանն առաջնում, ի հնգետասաներորդում աւուր ամսոյն առաջնոյ. զայգոյ զատկին ելին որդիքն Իսրայելի բարձրացեալ ձեռամբ առաջի ամենայն Եգիպտացւոցն. 4 եւ Եգիպտացիքն թաղէին զամենայն մեռեալսն ի նոցանէ, զորս կոտորեաց Տէր, զամենայն անդրանիկս յերկրին Եգիպտացւոց՝՝, եւ ի դիս նոցա արար վրէժխնդրութիւն Տէր։ 5 Եւ չուեալ որդւոցն Իսրայելի յՌամեսսեայ բանակեցան ի Սոկքովթ։ 6 Եւ չուեալ ի Սոկքովթայ՝ բանակեցան ի Բովթան, որ է մասն ինչ՝՝ անապատին։ 7 Չուեցին բանակեցան առ բերանովն Եպիրովթայ՝՝, որ է յանդիման Բէեղսեպփովնայ, եւ բանակեցան հանդէպ Մագդովղայ։ 8 Չուեցին հանդէպ Եպիրովթայ՝՝, եւ անցին ընդ մէջ ծովուն յանապատն, եւ գնացին նոքա երեքօրեայ ճանապարհ ընդ անապատն եւ բանակեցան զԴառն աղբերբքն՝՝։ 9 Չուեցին ի Դառն աղբերացն՝՝ եւ եկին յԵղիմ. եւ էին յԵղիմ երկոտասան ակն ջրոց, եւ եւթանասուն ծառ արմաւենեաց. եւ բանակեցան անդ առ ջրովն՝՝։ 10 Չուեցին յԵղիմայ, եւ բանակեցան զափամբ Կարմիր ծովուն։ 11 Չուեցին ի Կարմիր ծովէն, եւ բանակեցան յանապատին ի Սին։ 12 Չուեցին ի Սին անապատէն, եւ բանակեցան ի Դափկա։ 13 Չուեցին ի Դափկայ, եւ բանակեցան յԵղուս։ 14 Չուեցին յԵղուսայ, եւ բանակեցան յՌափիդիմ. եւ ոչ գոյր ջուր ըմպելոյ ժողովրդեանն։ 15 Չուեցին յՌափիդիմայ, եւ բանակեցան յանապատին Սինայ։ 16 Չուեցին յանապատէն Սինայ, եւ բանակեցան ի Գերեզմանս ցանկութեան։ 17 Չուեցին ի Գերեզմանացն ցանկութեան, եւ բանակեցան յԱսերովթ։ 18 Չուեցին յԱսերովթայ, եւ բանակեցան յՌաթամա։ 19 Չուեցին յՌաթամայ, եւ բանակեցան յՌեմոնփարէս։ 20 Չուեցին յՌեմոնփարեսայ, եւ բանակեցան ի Ղեբոնա։ 21 Չուեցին ի Ղեբոնայ, եւ բանակեցան յՌեսսա։ 22 Չուեցին յՌեսսայէ, եւ բանակեցան ի Կեղղաթ։ 23 Չուեցին ի Կեղղաթայ, եւ բանակեցան ի Սովփար։ 24 Չուեցին ի Սովփարայ՝՝, եւ բանակեցան ի Քարադաթ։ 25 Չուեցին ի Քարադաթայ, եւ բանակեցան ի Մակեղովթ։ 26 Չուեցին ի Մակեղովթայ, եւ բանակեցան ի Կատտաաթ։ 27 Չուեցին ի Կատտաաթայ, եւ բանակեցան ի Տարաթ։ 28 Չուեցին ի Տարաթայ, եւ բանակեցան ի Մատեկա։ 29 Չուեցին ի Մատեկայ, եւ բանակեցան ի Սեղմոնա։ 30 Չուեցին ի Սեղմոնայ, եւ բանակեցան ի Մասուրութ։ 31 Չուեցին ի Մասուրութայ, եւ բանակեցան ի Բանէա։ 32 Չուեցին ի Բանէայ, եւ բանակեցան ի լերինն Գադգադ։ 33 Չուեցին ի լեռնէ անտի Գադգադայ, եւ բանակեցան յԵտեբաթա։ 34 Չուեցին յԵտեբաթայ, եւ բանակեցան յԵբրոնա։ 35 Չուեցին յԵբրոնայ, եւ բանակեցան ի Գասիոնգաբեր։ 36 Չուեցին ի Գեսիոնգաբերայ, եւ բանակեցան յանապատին ի Սին. չուեցին ի Սինն անապատէ, եւ բանակեցան յանապատին Փառանու,՝՝ այն է Կադէս։ 37 Չուեցին ի Կադեսայ, եւ բանակեցան ի Հովր լերինն, մերձ առ երկրաւն Եդովմայ։ 38 Եւ ել Ահարոն քահանայ ի լեառնն հրամանաւ Տեառն եւ մեռաւ անդ, ի քառասներորդի ամի ելանելոյ որդւոցն Իսրայելի յերկրէն Եգիպտացւոց, յամսեանն հինգերորդի, որ օր մի էր ամսոյն։ 39 Եւ Ահարոն էր հարեւր եւ քսան եւ երից ամաց յորժամ մեռաւ ի Հովր լերինն։ 40 Եւ լուաւ Քանանիս արքայ Արադայ, եւ ինքն բնակեալ էր յերկրին Քանանացւոց, յորժամ մտանէին որդիքն Իսրայելի։ 41 Չուեցին ի Հովր լեռնէ, եւ բանակեցան ի Սեղմոնա։ 42 Չուեցին ի Սեղմոնայ, եւ բանակեցան ի Փենով։ 43 Չուեցին ի Փենովայ, եւ բանակեցան յՈբովթ։ 44 Չուեցին յՈբովթայ, եւ բանակեցան ի Գայի՝ յայնկոյս սահմանացն Մովաբու։ 45 Չուեցին ի Գայեայ, եւ բանակեցան ի Դեմոնգադ։ 46 Չուեցին ի Դեմոնգադայ, եւ բանակեցան ի Գեղմոնդեբղաթէմ։ 47 Չուեցին ի Գեղմոնդեբղաթեմայ, եւ բանակեցան ի լերինսն Աբարիմ յանդիման Նաբաւայ։ 48 Չուեցին ի լերանցն Աբարիմայ, եւ բանակեցան յարեւմտից Մովաբու առ Յորդանանաւ յանդիման Երիքովի։ 49 Եւ բանակեցան զՅորդանանաւ ի մէջ Եսիմովթայ՝՝, մինչեւ ցԱբեղսատով յարեւմտից Մովաբու։ 50 Եւ խօսեցաւ Տէր ընդ Մովսիսի յարեւմտից Մովաբու առ Յորդանանաւ յանդիման Երիքովի, եւ ասէ. 51 Խօսեաց ընդ որդիսդ Իսրայելի եւ ասասցես ցդոսա. Դուք ահաւադիկ անցանէք ընդ Յորդանան յերկիրն Քանանացւոց. 52 եւ կորուսջիք զամենայն բնակիչս երկրին յերեսաց ձերոց, եւ կործանեսջիք զդիտանոցս երկրի՝՝ նոցա, եւ զամենայն կուռս ձուլածոյս նոցա կորուսջիք, եւ զամենայն զարձանս նոցա բառնայցէք ի միջոյ։ 53 Եւ կորուսջիք զբնակիչս երկրին, եւ բնակեսջիք դուք ի նմա. զի ձեզ ետու զերկիրն նոցա ի վիճակ։ 54 Ըստ ցեղից ձերոց, ըստ բազմաց՝ բազմացուցանիջիք զկալուածս իւրեանց, եւ ըստ սակաւուց՝ սակաւացուսջիք զկալուածս իւրեանց. որպէս ելանիցէ յանուն ուրուք՝ անդ լինիցի. ըստ ցեղից նահապետութեան ձերոյ ժառանգեսջիք։ 55 Եւ եթէ ոչ կորուսանիցէք զբնակիչս երկրին յերեսաց ձերոց, եղիցին զոր թողուցուքն ի նոցանէ՝ խոչ յական ձերում եւ նետք ի կողս ձեր, եւ եղիցին ձեզ թշնամիք յերկրին յորում դուք բնակիցէք։ 56 Եւ եղիցի որպէս խորհէի առնել նոցա, արարից ձեզ։ |