ԳԻՐՔ ՆԷԵՄԵԱՅ 13 - Գրաբար Աստվածաշունչ (1895)1 Յաւուր յայնմիկ կարդային զգիրս Մովսիսի ի լսելիս ժողովրդեանն. եւ գտաւ ի նմա գրեալ այսպէս, եթէ՝ Մի՛ մտցէ Ամոնացի եւ Մովաբացի յեկեղեցի Աստուծոյ յաւիտեանս ժամանակաց, 2 վասն զի ոչ ելին ընդ առաջ որդւոցն Իսրայելի հացիւ եւ ջրով, այլ կալան ի վարձու զԲաղաամ գէտ՝ անիծանել զնոսա. եւ դարձոյց Աստուած մեր զանէծսն յօրհնութիւն։ 3 Եւ եղեւ յորժամ լուան յօրինացն, որոշեցին ի բաց զամենայն խառնեալսն յԻսրայէլէ։ 4 Եւ յառաջ քան զայս Եղիասիբ քահանայ էր ի գանձանակի տանն Աստուծոյ մերոյ, եւ ետ տեղի Տուբիայ, 5 եւ շինեաց իւր անդ տուն գանձի մեծ. եւ անդ էր յառաջնում ուր տային զմաննայն եւ զլիբանոն եւ զկահն սրբութեան՝՝, եւ զտասանորդս ցորենոյն եւ գինւոյ եւ ձիթոյ եւ իւղոյ, զռոճիկսն Ղեւտացւոցն եւ երգեցկացն եւ դռնապանաց, եւ զառաջաւորս քահանայիցն։ 6 Եւ մինչ զայս ամենայն արարեալ էր, ես ոչ էի յԵրուսաղէմ. քանզի յամի երեսներորդի եւ երկրորդի Արտաշիսի թագաւորի Բաբելացւոց՝ մտի առ թագաւորն. եւ յետ բազում աւուրց խնդրեցի ի թագաւորէն, 7 եւ ելի յԵրուսաղէմ, եւ իմացայ զամենայն չարութիւնս զոր արար Եղիասիբ վասն Տուբիայ, զի ետ նմա շինել տուն գանձու ի գաւթի տանն Տեառն։ 8 Եւ չար թուեցաւ առաջի իմ յոյժ եւ ընկեցի արտաքս զամենայն կահ Տուբիայ ի տանէն գանձու, 9 եւ հրամայեցի սրբել զտուն գանձուն Տեառն, եւ դարձուցի անդրէն զկահ եւ զսպաս տանն Տեառն եւ զմաննայն եւ զլիբանոն՝՝։ 10 Եւ գիտացի եւ հասի ի վերայ՝ եթէ զբաժին Ղեւտացւոցն ոչ էր տուեալ, եւ նոքա էին գնացեալ յագարակս իւրեանց, եւ Ղեւտացիքն եւ երգեցիկքն գործէին զգործ մշակութեան։ 11 Եւ կագեցայ ընդ իշխանսն եւ ասեմ. Ընդէ՞ր պակասեցին ռոճիկք ի տանէ Տեառն։ Եւ ժողովեցի զամենայն սպասաւորսն՝՝ եւ կարգեցի զնոսա ի տեղիս իւրեանց։ 12 Եւ ամենայն Հրեայք բերէին զտասանորդս ցորենոյ եւ գինւոյ եւ ձիթոյ ի գանձանակ տան Տեառն՝՝։ 13 Եւ հրամայեցի տալ ի ձեռս Սեղիմայ քահանայի եւ Սադովկայ գրչի, եւ Փադայեայ որ էր յՂեւտացւոցն, եւ ի ձեռանէ նոցա Անան որդի Զաքուր, որդի Մաթանայի. վասն զի հաւատարիմ էին նոքա որք բաժանէին եւ տային եղբարց իւրեանց։ 14 Յիշեսցէ զիս Աստուած յայնմ ամենայնի, եւ մի՛ ի բացէ արասցէ զողորմութիւն իւր յինէն. վասն զի արարի զայս ամենայն ի տան Տեառն Աստուծոյ Իսրայելի։՝՝ 15 Յաւուրսն յայնոսիկ տեսանէի ի Հրէաստանի՝ զի հարկանէին հնձանս յաւուր շաբաթու, եւ բերէին զորայսն ընդ դրունս Երուսաղեմի՝՝. եւ կախէին բեռն գրաստուց, զգինի եւ զխաղող եւ զթուզ, բարձեալ բեռինս բերէին յԵրուսաղէմ յաւուր շաբաթու. եւ կալեալ վկայս՝ զի վաճառէին յաւուր շաբաթու, 16 եւ նստէին ի տեղիս վաճառացն որք՝՝ բերէին զձուկն եւ զամենայն վաճառս, եւ գնէին յաւուր շաբաթու Հրեայքն ի ներքս՝՝ յԵրուսաղէմ։ 17 Եւ կագեցայ ես ընդ որդիսն Հրէից որք էին յԵրուսաղէմ, եւ՝՝ ընդ իշխանսն Յուդայ, եւ ասեմ ցնոսա. Զի՞նչ է անօրէնութիւնս այս զոր դուք գործէք, եւ պղծէք զաւուրս սուրբ զշաբաթու՝՝։ 18 Ո՞չ այսպէս արարին հարքն ձեր, եւ ած ի վերայ նոցա Աստուած զչարիսս զայս ամենայն, եւ ի վերայ քաղաքիս այսորիկ. եւ արդ դուք ընդէ՞ր յաւելուք զբարկութիւն ի վերայ Իսրայելի եւ պղծէք զօրն սուրբ զշաբաթուց։ 19 Եւ եղեւ յորժամ կանգնեցի զդրունս՝՝ Երուսաղեմի յառաջ քան զշաբաթն, հրամայէի փակել զդրունսն, եւ ոչ տայի բանալ զնոսա մինչեւ անցանէր շաբաթն. եւ դարձեալ կացուցի մանկունս պահապանս, զի մի՛ ոք իշխեսցէ մտանել բեռամբ յաւուր շաբաթու ընդ դրունսն Երուսաղեմի։ 20 Եւ ագանէին ամենեքեան որք վաճառէին՝ արտաքոյ Երուսաղեմի միանգամ եւ երկիցս։ 21 Եւ ասեմ ցնոսա. Ընդէ՞ր ագանիք դուք արտաքոյ պարսպիդ. եթէ եւ այլ տեսանեմ զանօրէնութիւնդ զայդ, տամ հրաման այսպէս՝ զի ոչ մտանիցէք դուք ի շաբաթս մեր եւ ի քաղաքս։ 22 Եւ ասեմ ցՂեւտացիսն որք էին սրբեալ, եւ գային պահէին զդրունսն, եւ սրբէին յաւուր շաբաթու. եւ յայնմ հետէ ոչ պղծեցին զշաբաթսն՝՝։ Եւ յայսմ ամենայնի յիշեսցէ զիս Աստուած, եւ խնայեսցէ յիս ըստ բազում ողորմութեան իւրում։ 23 Եւ յաւուրսն յայնոսիկ տեսի զՀրեայսն, զի նստէին կանայք Ազովտացիք եւ Ամովնացիք եւ Մովաբացիք, 24 եւ որդիք նոցա եւ ոմանք ի կանանցն խօսէին Ազովտացի, եւ ոչ գիտէին խօսել Հրէարէն՝՝։ 25 Եւ կագեցայ ընդ նոսա, եւ նզովեցի զնոսա, եւ հարի ի նոցանէ արս բազումս՝՝. եւ երդմնեցուցի զնոսա յանուն Աստուծոյ, զի մի՛ տացեն զդստերս իւրեանց որդւոց նոցա, եւ մի՛ զդստերս նոցա ածցեն որդւոց իւրեանց։ 26 Եւ ասեմ ցնոսա՝՝. Ո՞չ յայդմ ամենայնի մեղաւ Սողոմոն թագաւոր Իսրայելի. եւ ո՞վ էր իբրեւ զնա իմաստուն յամենայն թագաւորս մեր՝՝. եւ սիրելի էր նա Աստուծոյ, եւ կացոյց զնա Աստուած թագաւոր ի վերայ ամենայն Իսրայելի. եւ զայսպիսի սիրելի Աստուծոյ եւ զիմաստուն եւ զմեծ թագաւոր՝ խոտորեցուցին եւ յանցուցին ի մեղս կանայք այլազգեաց՝՝։ 27 Եւ արդ մի՛ լուայց եթէ ոք արասցէ զայնպիսի մեծ չարութիւնս եւ մեղիցէ առ Աստուած, եւ արասցէ կին այլազգի։ 28 Եւ յորդւոցն Յովիդեայ եւ յԵղիասիբայ մեծ քահանային, լուայ թէ էր կին նորա դուստր Սանաբաղատայ՝՝, եւ մերժեալ հալածեցի զնա յինէն։ 29 Յիշեսցէ զնոսա Աստուած ի ժառանգութեան եւ յուխտի քահանայութեան։ 30 Եւ զՂեւտացիսն սրբեցի յամենայն այլազգեաց, եւ կարգեալ կազմեցի զնոսա օր ըստ օրէ՝ զքահանայսն եւ զՂեւտացիսն այր իւրաքանչիւր ի գործ իւր. 31 եւ ետու կազմ բերել զամենայն փայտ ողջակիզացն յիւրաքանչիւր ժամանակս, եւ զառաջաւորսն պտղոյ իւրեանց։ Յիշեսցէ զիս Աստուած մեր յամենայն բարութիւնս արդարութեան, այն որ օրհնեալն է յաւիտեան։ Ամէն։՝՝ |