ՄԱՐԳԱՐԷՈՒԹԻՒՆ ՄԻՔԻԱՅ 6 - Գրաբար Աստվածաշունչ (1895)1 Լուարուք զայս զոր ասաց Տէր. Արի եւ դատեաց ընդ լերինս՝՝, եւ բլուրք լուիցեն ձայնի քում։ 2 Լուարուք, բլուրք, զդատաստան Տեառն, եւ ձորք եւ հիմունք՝՝ երկրի. զի դատաստան է Տեառն ընդ ժողովրդեան իւրում, եւ ընդ Իսրայելի յանդիմանեսցի։ 3 Ժողովուրդ իմ, զի՞ արարի քեզ, կամ ի՞ւ տրտմեցուցի զքեզ,՝՝ կամ ի՞ւ նեղեցի զքեզ. տուր ինձ պատասխանի։ 4 Փոխանակ զի հանի զքեզ յերկրէն Եգիպտացւոց, եւ ի տանէ ծառայութեան փրկեցի զքեզ, եւ առաքեցի առաջի քո զՄովսէս եւ զԱհարոն եւ զՄարիամ։ 5 Ժողովուրդ իմ, յիշեա զինչ խորհեցաւ վասն քո Բաղակ թագաւոր Մովաբացւոց, եւ զի՛նչ ետ նմա պատասխանի Բաղաամ որդի Բէովրայ, ի վիճակացն մինչեւ ցԳաղգաղ. զի ծանիցի արդարութիւն՝՝ Տեառն։ 6 Ի՞ւ կանխեցից առ Տէր, ապաւինեցայց յԱստուած իմ՝՝ բարձրեալ. եթէ կանխեցի՞ց առ նա ողջակիզօք եւ որթովք տարեւորօք. 7 եթէ իցէ՝ ընկալցի՞ Տէր ընդ հազարաւորս խոյոց, կամ ընդ բիւրաւորս նոխազաց պարարտաց՝՝. եթէ տա՞ց զանդրանիկս իմ վասն ամպարշտութեանց, եւ զպտուղ միջոյ իմոյ վասն մեղաց անձին իմոյ։ 8 Պատմեցաւ քեզ, ո՛վ մարդ, զի՛նչ է բարի. կամ զի՞նչ խնդրէ ի քէն Տէր, բայց առնել զիրաւունս, եւ սիրել զողորմութիւն, եւ պատրաստ լինել երթալոյ զկնի Տեառն Աստուծոյ քո՝՝։ 9 Ձայն Տեառն ի վերայ քաղաքի կոչեսցի, եւ ապրեցուսցէ զերկիւղածս անուան նորա։ Լուր, ազգ, ո՞ հանդերձեսցէ զքաղաք՝ եթէ ոչ հուր, 10 եւ տուն անօրինի որ գանձէ զգանձս անօրէնս, եւ հպարտութեամբ անիրաւութեան։ 11 Եւ իցէ՞ թէ արդարասցի կշռովք անօրէնն, եւ պայուսակաւ կշռոց նենգութեան. 12 ուստի զտունս իւրեանց լցին ամպարշտութեամբ՝՝. եւ բնակիչք նորա խօսեցան անիրաւութիւն, եւ լեզուք նոցա մեծաբանեցին ի բերանս իւրեանց։ 13 Եւ ես հարի զքեզ ապականութեամբ՝՝ վասն մեղաց քոց։ 14 Դու կերիցես եւ մի՛ յագեսջիր. եւ մերժեցի զքեզ, եւ ըմբռնեսցիս եւ մի՛ ապրեսցիս. եւ որ միանգամ ապրեսցին՝ ի սուր մատնեսցին՝՝։ 15 Դու սերմանեսցես, եւ մի՛ հնձեսցես, դու կթեսցես ձէթ, եւ մի՛ օծցիս իւղով, եւ գինի՝ եւ մի՛ արբցես գինի։ 16 Եւ ապականեսցին անօրէնք ժողովրդեան իմոյ՝՝, եւ ամենայն գործք տանն Աքաաբու. եւ գնացէք ըստ խորհրդոց նոցա. զի մատնեցից զձեզ յապականութիւն, եւ զբնակիչս քո ի շչիւն, եւ զնախատինս ժողովրդոց ընկալջիք։ |