ԳԻՐՔ ՅԵՍՈՒԱՅ ՈՐԴՒՈՅ ՆԱՒԵԱՅ 21 - Գրաբար Աստվածաշունչ (1895)1 Եւ մատեան նահապետք որդւոցն Ղեւեայ առ Եղիազար քահանայ, եւ առ Յեսու Նաւեան, եւ առ նահապետս տոհմից ցեղից որդւոցն Իսրայելի, 2 եւ խօսեցան ընդ նոսա ի Սելով յերկրին Քանանացւոց եւ ասեն. Հրաման ետ Տէր ի ձեռն Մովսիսի՝ տալ մեզ քաղաքս բնակելոյ, եւ զանդաստանս նոցա անասնոց մերոց։ 3 Եւ ետուն որդիքն Իսրայելի Ղեւտացւոցն ի ժառանգութիւն հրամանաւ Տեառն զքաղաքսն զայնոսիկ եւ զանդաստանս նոցա։ 4 Եւ ել վիճակ տոհմին Կահաթու. եւ եղեն որդւոցն Ահարոնի՝ քահանայիցն Ղեւտացւոց, ի ցեղէն Յուդայ եւ ի ցեղէն Շմաւոնի եւ ի ցեղէն Բենիամինի՝ վիճակաւ քաղաքք երեքտասանք։ 5 Եւ այլոց որդւոցն Կահաթու մնացելոց յազգականութենէ ցեղին Եփրեմայ, եւ ի ցեղէն Դանայ եւ ի կիսոյ ցեղին Մանասէի՝ վիճակաւ քաղաքք տասն։ 6 Եւ որդւոցն Գերսոնի յազգականութենէ ցեղին Իսաքարայ եւ ի ցեղէն Ասերայ, եւ ի ցեղէն Նեփթաղիմայ եւ ի կիսոյ ցեղին Մանասէի ի Բասան, վիճակաւ քաղաքք երեքտասան։ 7 Եւ որդւոցն Մերարեայ ըստ տոհմից իւրեանց, ի ցեղէն Ռուբենի եւ ի ցեղէն Գադայ եւ ի ցեղէն Զաբուղոնի, վիճակաւ քաղաքք երկոտասան։ 8 Եւ ետուն որդիքն Իսրայելի Ղեւտացւոցն զքաղաքսն զայնոսիկ եւ զանդաստանս նոցա, զոր օրինակ պատուիրեաց Տէր Մովսիսի, վիճակաւ։ 9 Եւ ետ ցեղ որդւոցն Յուդայ եւ ցեղ որդւոցն Շմաւոնի եւ ցեղ որդւոցն Բենիամինի՝՝ զքաղաքսն զայնոսիկ, եւ կոչեցան յանուն եւ յազգ 10 որդւոցն՝՝ Ահարոնի, ի տոհմէ Կահաթու որդւոցն Ղեւեայ. զի նոցա ել նախ վիճակն։ 11 Եւ ետուն նոցա զԿարիաթարբոկ զմայր քաղաքացն՝՝ Ենակայ, այն է՝ Քեբրոն ի լերինն Յուդայ, եւ զանդաստանս շուրջ զնովաւ 12 եւ զագարակս նորա եւ զաւանս նորա զոր ետ Յեսու՝՝ Քաղեբայ որդւոյ Յեփոնեայ ի կալուած։ 13 Եւ որդւոցն Ահարոնի քահանայի ետուն քաղաք ապաստանի սպանողի՝ զՔեբրոն եւ զզատուցեալսն ի նա, եւ զՂեբնա եւ զզատուցեալսն ի նա, 14 եւ զՅեթեր եւ զզատուցեալսն ի նա, եւ զՅեսթեմով եւ զզատուցեալսն ի նա, 15 եւ զԱղոն եւ զզատուցեալսն ի նա, եւ զԴաբիր եւ զզատուցեալսն ի նա, 16 եւ զԱյին եւ զզատուցեալսն ի նա, եւ զՅետտա եւ զզատուցեալսն ի նա, եւ զԲեթսամիւս եւ զզատուցեալսն ի նա. քաղաքք ինն, յերկուց ցեղիցն այնոցիկ։ 17 Եւ ի ցեղէն Բենիամինի՝ զԳաբաւոն եւ զզատուցեալսն ի նա, եւ զԳաբաա եւ զզատուցեալսն ի նա, 18 եւ զԱնաթովթ եւ զզատուցեալսն ի նա, եւ զԱղմոն եւ զզատուցեալսն ի նա. քաղաքս չորս։ 19 Ամենայն քաղաքք որդւոց Ահարոնի՝ քահանայից, քաղաքք երեքտասանք, եւ անդաստանք նոցա։ 20 Եւ տոհմից որդւոցն Կահաթու Ղեւտացւոցն՝ մնացելոց յորդւոցն Կահաթու, եւ եղեն քաղաքք սահմանաց նոցա ի ցեղէն Եփրեմայ. 21 եւ ետուն նոցա քաղաք ապաստանի սպանողի՝ զՍիւքեմ եւ զզատուցեալսն ի նա ի լերինն Եփրեմայ, եւ զԳազեր եւ զզատուցեալսն ի նա, 22 եւ զԿաբսեմ եւ զզատուցեալսն ի նա, եւ զվերին Բեթորոն եւ զզատուցեալսն ի նա. քաղաքք չորք։ 23 Ի ցեղէն Դանայ՝ զԵղթեկով եւ զզատուցեալսն ի նա, եւ զԳեբեթովն եւ զզատուցեալսն ի նա, 24 եւ զՅաղոն եւ զզատուցեալսն ի նա, եւ զԳեթրեմոն եւ զզատուցեալսն ի նա. քաղաքք չորք։ 25 Եւ կիսոյ ցեղին Մանասէի՝ զԹանաք եւ զզատուցեալսն ի նա, եւ զԲեթսան՝՝ եւ զզատուցեալսն ի նա. քաղաքս երկուս։ 26 Ընդ ամենայն՝ քաղաքս տասն եւ զզատուցեալսն ի նոսա, տոհմի որդւոցն Կահաթու մնացելոց։ 27 Եւ որդւոցն Գերսոնայ, ազգականացն Ղեւտացւոց, ի կիսոյ ցեղէն Մանասէի քաղաքս զատուցեալս սպանողաց՝ զԳովղան ի Բասանաստանի եւ զզատուցեալսն ի նա, եւ զԲեեստարա եւ զզատուցեալսն ի նա. քաղաքս երկուս։ 28 Եւ ի ցեղէն Իսաքարայ՝ զԿեսիոն եւ զզատուցեալսն ի նա, եւ զԴաբրաթ եւ զզատուցեալսն ի նա, 29 եւ զԵրիմովթ եւ զզատուցեալսն ի նա, եւ զաղբեւրն Նամակաց՝՝ եւ զզատուցեալսն ի նա. քաղաքս չորս։ 30 Եւ ի ցեղէն Ասերայ՝ զՄասաաղ եւ զզատուցեալսն ի նա, եւ զԱբդոն եւ զզատուցեալսն ի նա, 31 եւ զՔեղկաթ եւ զզատուցեալսն ի նա, եւ զՌովբ եւ զզատուցեալսն ի նա. քաղաքս չորս։ 32 Եւ ի ցեղէն Նեփթաղիմայ՝ քաղաքս զատուցեալս սպանողի, զԿադէս ի Գալիլեա եւ զզատուցեալսն ի նա, զԱմաթդովր եւ զզատուցեալսն ի նա, եւ զՆոյեմոն եւ զզատուցեալսն ի նմա. քաղաքս երիս։ 33 Ընդ ամենայն քաղաքս Գերսոնի ըստ տոհմից իւրեանց քաղաքս երեքտասան, եւ զատուցեալք նոցին։ 34 Եւ տոհմի որդւոցն Մերարեայ այլոցն Ղեւտացւոց, ի ցեղէ որդւոցն Զաբուղոնի՝ զՅեկնամ եւ զանդաստանս նորա, զԿադէս եւ զանդաստանս նորա,՝՝ զԿարթա եւ զանդաստանս նորա, 35 զԴեմնա եւ զանդաստանս նորա, զՆաաղովղ եւ զանդաստանս նորա. քաղաքս հինգ։ 36 Եւ յայնկոյս Յորդանանու ի հանդիպէ Երիքովի,՝՝ ի ցեղէն Ռուբենի քաղաքս ապաստանի սպանողի՝՝ զԲոսոր յանապատին Միսովրայ՝՝ եւ զանդաստանս նորա, եւ զՅազեր եւ զանդաստանս նորա, 37 զԿեդսոն եւ զանդաստանս նորա, զՄասփա եւ զանդաստանս նորա. քաղաքս չորս։ 38 Եւ ի ցեղէն Գադայ՝ քաղաքս ապաստանի սպանողի, զՌամովթ ի Գաղաադ եւ զանդաստանս նորա, զՄանայամ եւ զանդաստանս նորա, 39 զԵսեբոն եւ զանդաստանս նորա, եւ զԱզեր եւ զանդաստանս նորա. ընդ ամենայն՝ քաղաքս չորս։ 40 Ամենայն քաղաքք որդւոցն Մերարեայ, ըստ տոհմից իւրեանց մնացելոց ի ցեղէն Ղեւեայ, եւ եղեն սահմանք նոցա քաղաքք երկոտասան։ 41 Ընդ ամենայն՝ քաղաքք Ղեւտացւոցն ի մէջ կալուածոց որդւոցն Իսրայելի՝ քառասուն եւ ութ քաղաք, եւ անդաստանք նոցա շուրջ զքաղաքօքն այնոքիւք՝՝. 42 քաղաքք, եւ անդաստանք շուրջ զքաղաքօքն. նոյնպէս ամենեցունց քաղաքացն այնոցիկ։ Եւ վախճանեաց Յեսու բաժանել զերկիրն սահմանօք իւրովք։ Եւ ետուն որդիքն Իսրայելի բաժին Յեսուայ ըստ հրամանի Տեառն՝ ետուն նմա զքաղաքն զոր խնդրեաց՝ զԹամնասաքար ի լերինն Եփրեմայ. եւ շինեաց Յեսու զքաղաքն եւ բնակեցաւ ի նմա։ Եւ ա՛ռ Յեսու զսուրսն քարեղէնս որով թլփատեաց զորդիսն Իսրայելի զելեալս ի ճանապարհի անապատին, քանզի ոչ թլփատեցան յանապատի անդ, եւ եդ զնոսա ի Թամնասաքար։՝՝ 43 Եւ ետ Տէր Իսրայելի զամենայն երկիրն զոր երդուաւ տալ հարցն նոցա, եւ ժառանգեցին զնա, եւ բնակեցին ի նմա։ 44 Եւ հանգոյց զնոսա Տէր շուրջանակի՝ որպէս երդուաւ հարցն նոցա. եւ ոչ ոք յարեաւ ընդդէմ նոցա ի թշնամեաց իւրեանց. զի զամենայն թշնամիս նոցա մատնեաց Տէր ի ձեռս նոցա։ 45 Եւ ոչ սխալեցաւ բան մի յամենայն բանից բարեաց զոր խօսեցաւ Տէր որդւոցն Իսրայելի, այլ ամենայն ինչ եղեւ։ |