ԳԻՐՔ ՅԵՍՈՒԱՅ ՈՐԴՒՈՅ ՆԱՒԵԱՅ 12 - Գրաբար Աստվածաշունչ (1895)

¹ Եւ այս են թագաւորք զորս կոտորեաց Մովսէս եւ՝՝ որդիքն Իսրայելի, եւ ժառանգեցին զերկիրն նոցա յայնկոյս Յորդանանու յարեւմտից կողմանէ, ի ձորոյն Առնովնայ մինչեւ ցլեառնն Հերմոն, եւ զամենայն զԱրաբա յարեւելից կողմանէ.

² զՍեհոն թագաւոր Ամովրհացւոց որ բնակեալ էր յԵսեբոն, եւ տիրէր յԱրոյերայ մինչեւ ցձորն Առնովնայ յեզերբ ձորոյն, եւ զկէսն՝՝ Գաղաադու մինչեւ ցհեղեղատն Յաբովկայ, սահմանք որդւոցն Ամոնայ,

³ եւ Արաբայ մինչեւ ցծովն Քեներեթայ ընդ արեւելս Արաբայ ցծովն,՝՝ մինչեւ ցծովն Աղի, յարեւելից ընդ ճանապարհն Ասեմովթայ, եւ ի Թեմանայ որ է ընդ Ասեդովթաւ ի Փասգայնէ՝՝։

⁴ Եւ սահմանք Ովգայ արքայի Բասանու որ մնացեալ էր ի սկայից անտի, որ բնակեալ էր յԱստարովթ եւ յԵդրային.

⁵ իշխան ի լեռնէն Հերմոնի եւ ի Սելքայ, եւ զամենայն Բասան՝՝ մինչեւ ի սահմանս Գեսուրայ եւ զՄաքաթի եւ զկէս՝՝ Գաղաադու սահմանացն Սեհոնի արքայի Եսեբոնայ։

⁶ Մովսէս ծառայ Տեառն եւ որդիքն Իսրայելի հարին զնոսա, եւ ետ զայն Մովսէս ծառայ Տեառն ի ժառանգութիւն Ռուբենի եւ Գադայ, եւ կիսոյ ցեղին Մանասէի։

⁷ Եւ այս են թագաւորք Ամովրհացւոց զորս կոտորեաց Յեսու եւ որդիքն Իսրայելի յայնկոյս Յորդանանու առ ծովեզերբն Գաղաադու՝՝ ի դաշտին Լիբանանու մինչեւ ցլեառն Ալովկայ յելսն Սէիրայ՝՝. եւ ետ զնա Յեսու ցեղիցն Իսրայելի ի ժառանգութիւն ըստ վիճակաց նոցա.

⁸ ի լերինն եւ ի դաշտի, եւ յԱրաբա՝՝ եւ յԱսեդովթ, եւ յանապատին եւ ի Նագեբ, զՔետացին եւ զԱմովրհացին եւ զՔանանացին եւ զՓերեզացին եւ զԽեւացին եւ զԳերգեսացին եւ՝՝ զՅեբուսացին.

⁹ զթագաւորն Երիքովայ զմի, զթագաւորն Գայեայ որ մերձ ի Բեթէլ՝ զմի,

¹⁰ զթագաւորն Երուսաղեմի զմի, զթագաւորն Քեբրոնի զմի,

¹¹ զթագաւորն Յերիմութայ զմի, զթագաւորն Լաքիսայ զմի,

¹² զթագաւորն Եգլոնի զմի, զթագաւորն Գազերայ զմի,

¹³ զթագաւորն Դաբիրայ զմի, զթագաւորն Գադերայ զմի,

¹⁴ զթագաւորն Հերմեայ զմի, զթագաւորն Աբերայ զմի,

¹⁵ զթագաւորն Լոբնայ զմի, զթագաւորն Ոդողոմայ զմի,

¹⁶ զթագաւորն Մակեդայ զմի, (

¹⁷ ) զթագաւորն Թափուայ զմի, զթագաւորն Ոփերայ զմի,

¹⁸ զթագաւորն Ափեկայ զմի, զթագաւորն Ասովրայ զմի, (

²⁰ ) զթագաւորն Սամրոնայ զմի, զթագաւորն՝՝ Մառովնայ զմի, զթագաւորն Աքսափայ զմի,

²¹ զթագաւորն Թանաքայ զմի, զթագաւորն Մակեդդովայ զմի,

²² զթագաւորն Կեդեսայ զմի, զթագաւորն Յեկնոմայ զՔերմելայն զմի,

²³ զթագաւորն Դովրայ զՆափեդովրայ զմի, զթագաւորն Գելիմայ զԳելգելայն զմի,

²⁴ զթագաւորն Թերսայ զմի։ Ամենեքեան սոքա թագաւորք քսանեւինն։