ՄԱՐԳԱՐԷՈՒԹԻՒՆ ԵՐԵՄԵԱՅ 35 - Գրաբար Աստվածաշունչ (1895)1 Բանն որ եղեւ առ Երեմիա ի Տեառնէ յաւուրս Յովակիմայ որդւոյ Յովսեայ արքայի Յուդայ, եւ ասէ. 2 Երթ ի տուն Ռաքաբիմայ, եւ կոչեա զնոսա՝՝, եւ ածցես ի տուն Տեառն ի մի ի սրահից անտի, եւ արբուսցես նոցա գինի։ 3 Եւ ածի զՅեքոնիա որդի Երեմեայ որդւոյ Քաբասինեայ, եւ զեղբարս նորա եւ զամենայն որդիս նորա, եւ զամենայն տուն Ռաքաբիմայ. 4 ածի ի տուն Տեառն, ի դահլիճ որդւոյն Անանայ որդւոյ Գոդողեայ առն Աստուծոյ, որ էր մերձ ի տուն իշխանացն, ի վերայ ապարանիցն Մայասայ՝ որդւոյ Սելովմայ վտառապահի։ 5 Եւ եդի առաջի որդւոցն Ռաքաբիմայ աման մի՝՝ լի գինւով եւ բաժակս. եւ ասեմ ցնոսա. Արբէք գինի այտի։ 6 Եւ ասեն. Ոչ արբցուք գինի. զի Յովնադաբ որդի Ռեքաբայ հայր մեր պատուիրեաց մեզ եւ ասէ. Մի՛ ըմպիցէք գինի դուք եւ որդիքն ձեր մինչեւ ցյաւիտեան. 7 եւ մի՛ շինիցէք տունս, եւ մի՛ սերմանիցէք սերմանս, եւ մի՛ տնկէք այգիս. այլ ի վրանս բնակիցէք զամենայն աւուրս ձեր, զի կայցէք աւուրս բազումս յերկրիդ յորում շրջիցիք դուք ի դմա։ 8 Եւ լուաք բարբառոյ Յովնադաբայ որդւոյ Ռեքաբայ հօր մերում՝ ըստ ամենայնի զոր պատուիրեաց մեզ չըմպել գինի զամենայն աւուրս մեր, մեք եւ կանայք մեր եւ ուստերք եւ դստերք մեր. 9 եւ ոչ շինել տունս եւ ոչ բնակել ի նոսա. եւ այգիք եւ անդք եւ սերմանիք ոչ եղեն մեր. 10 եւ բնակեցաք վրանօք, եւ լուաք եւ արարաք ըստ ամենայնի, զոր պատուիրեաց մեզ Յովնադաբ հայր մեր։ 11 Եւ եղեւ իբրեւ ել Նաբուքոդոնոսոր արքայ Բաբելացւոց յերկիրս յայս, ասացաք. Ելցուք եւ մտցուք յԵրուսաղէմ, յերեսաց զօրուն Քաղդէացւոց, եւ յերեսաց զօրուն Ասորեստանեայց, եւ բնակեսցուք անդ՝՝։ 12 Եւ եղեւ բան Տեառն առ իս եւ ասէ. 13 Այսպէս ասէ Տէր զօրութեանց՝ Աստուած Իսրայելի. Երթ եւ ասա ցարս Յուդայ եւ ցբնակիչս Երուսաղեմի. Ո՞չ առնուցուք խրատ լսել բանից իմոց, ասէ Տէր։ 14 Կացին ի բանի որդիքն՝՝ Յովնադաբայ որդւոյ Ռեքաբայ զոր պատուիրեաց որդւոց իւրոց՝ չըմպել գինի, եւ ոչ արբին մինչեւ ցայսօր, զի լուան պատուիրանի հօրն իւրեանց. եւ ես խօսեցայ ընդ ձեզ կանխաւ, եւ ոչ լուարուք ինձ։ 15 Եւ առաքեցի առ ձեզ զամենայն ծառայս իմ զմարգարէս կանխեալ եւ առաքեալ, բամ. Դարձարուք իւրաքանչիւր ի ճանապարհէ իւրմէ չարէ, եւ լաւագոյնս արարէք զիրս ձեր. եւ մի՛ երթայք զհետ աստուածոց օտարաց ծառայել նոցա, եւ բնակիցէք յերկրիդ զոր ետու ձեզ եւ հարցն ձերոց. եւ ոչ խոնարհեցուցէք զունկն ձեր, եւ ոչ լուարուք ինձ։ 16 Եւ կացուցին որդիքն Յովնադաբայ որդւոյ Ռեքաբայ զպատուէր հօրն իւրեանց զոր պատուիրեաց նոցա, եւ ժողովուրդդ այդ ոչ լուան ինձ։ 17 Վասն այդորիկ այսպէս ասէ Տէր զօրութեանց՝ Աստուած Իսրայելի. Ահաւադիկ ես ածից ի վերայ Յուդայ եւ ի վերայ ամենայն բնակչաց Երուսաղեմի զամենայն չարիս զոր խօսեցայ ի վերայ նոցա. փոխանակ զի խօսեցայ առ նոսա, եւ ոչ լուան, կոչեցի զնոսա, եւ ոչ ետուն ինձ պատասխանի։ 18 Եւ առ տուն Ռեքաբայ ասաց Երեմիա. Վասն այդորիկ այսպէս ասէ Տէր զօրութեանց՝ Աստուած Իսրայելի. Փոխանակ զի լուան որդիքն Յովնադաբայ որդւոյ Ռեքաբայ պատուիրանի հօր իւրեանց, եւ պահեցին՝՝ զամենայն հրամանս նորա, առնել ըստ ամենայնի զոր պատուիրեաց նոցա հայրն իւրեանց՝՝, 19 վասն այնորիկ այսպէս ասէ Տէր զօրութեանց՝ Աստուած Իսրայելի. Մի՛ պակասեսցէ այր յորդւոցն Յովնադաբայ որդւոյ Ռեքաբայ յանդիման կալ առաջի իմ զամենայն աւուրս երկրիդ։ |