ԴԱՏԱՒՈՐՔ 5 - Գրաբար Աստվածաշունչ (1895)1 Եւ օրհնեաց Դեբովրա եւ Բարակ որդի Աբինէեմայ յաւուր յայնմիկ, եւ ասեն. 2 Ի սկսանել զօրավարացն Իսրայելի՝ մտադիւրութեամբ ժողովրդեանն՝՝ օրհնեցէք զՏէր։ 3 Լուարուք, թագաւորք, եւ ունկնդիր լերուք, նախարարք. ես Տեառն երգեցից եւ սաղմոս ասացից Աստուծոյ Իսրայելի։ 4 Տէր, յելանել քո ի Սէիրայ եւ ի չուել քում յանդաստանացն Եդովմայ՝ երկիր շարժեցաւ եւ երկինք խռովեցան, եւ ամպք ցօղեցին ջուր։ 5 Լերինք շարժեցան յերեսաց Տեառն Ելովայ Սինայի,՝՝ յերեսաց Տեառն Աստուծոյ Իսրայելի։ 6 Յաւուրս Սամեգարայ որդւոյ Անաթայ՝ յաւուրս Յայելի պակասեցին թագաւորք, եւ գնացին ընդ շաւիղս, գնացին՝՝ ընդ ճանապարհս կամակորս։ 7 Պակասեցին փարազունք բնակեալք ի մէջ Իսրայելի, պակասեցին, մինչեւ յարեաւ Դեբովրա, մինչեւ յարեաւ մայր Իսրայելի։ 8 Ցանկացան իբրեւ գարեղէն նկանակի աստուածոց օտարաց սնոտւոց. յայնժամ պատերազմեցան քաղաքք իշխանաց, ծածկութեամբ նորոց գեղարդանց, քառասուն հազար այր՝՝ ի մէջ Իսրայելի։ 9 Սիրտ իմ ի վերայ կարգելոցն Իսրայելի. զօրաւորք ժողովրդեանն՝՝, օրհնեցէք զՏէր։ 10 Հեծեալք յերիվարս ի մէջօրէի, եւ սպիտակաց, երթեալք յատեանս ատենակալաց։ 11 Տուք ձայն բարբառոյ նուագածուաց ի մէջ ցնծացելոց. անդ տացեն արդարութիւն Տեառն. զարդարութիւն զօրացոյց՝՝ ի մէջ Իսրայելի. յայնժամ էջ ի քաղաքս ժողովուրդ Տեառն։ 12 Զարթիր, զարթիր, Դեբովրա, զարթո զբիւրաւորս հանդերձ ժողովրդեամբ.՝՝ զարթիր, զարթիր, խօսեաց երգովք. զօրացեալ յարիցես, Բարակ. գերեսցես զգերութիւն քո, որդի Աբինէեմայ։ 13 Յայնժամ մեծացաւ զօրութիւն նորա. Տէր ընկրկեաց ինձ զզօրագոյնսն քան զիս։ 14 Ժողովուրդ Եփրեմայ պատժեաց զնոսա ի հովիտսն. եղբայր քո Բենիամին՝ քոյին ժողովուրդ. յինէն ի Մաքիր իջին խուզարկուք, եւ ի Զաբուղոնէ զօրացուցիչք՝ գաւազանաւ պատմութեան դպրի։ 15 Եւ զօրավարք Իսաքարու ընդ Դեբովրայ եւ ընդ Բարակայ. եւ ապա Բարակ ի հովիտսն տարածեաց զոտս իւր. ի բաժինս Ռուբենի մեծամեծ ճշդութիւնք սրտի։ 16 Ընդէ՞ր նստիցին ի մէջ Մոսփաթեմայ, լսել զշաչիւնս տագնապողաց, անցանել ի կողմն Ռուբենի։ Մեծամեծ յարուցեալ կան հետազօտութիւնք սրտից։ 17 Գադ յայնկոյս Յորդանանու բնակեաց. եւ Դան, ընդէ՞ր բնաւ պանդխտիցիս ի նաւս՝՝. Ասեր՝ բնակեաց առ ծովեզերբ ծովուց, եւ ի կիրճս նորա բնակեսցէ։ 18 Զաբուղոն ժողովուրդ անձնանախատ ի մահ, եւ Նեփթաղիմ՝ ի բարձունս ագարակի։ 19 Հասին թագաւորք եւ ճակատեցան. յայնժամ տագնապեցան թագաւորք Քանանացւոց ի Թանաք ի վերայ ջրոց Մակեդդովայ. զագահութիւն արծաթոյ ես ոչ առի՝՝։ 20 Յերկնից ճակատեցան աստեղք յիւրաքանչիւր յօրինուածոց, ետուն պատերազմ ընդ Սիսարայ։ 21 Հեղեղատն Կիսոնի մերժեաց զնոսա, հեղեղատն Կադեսիմայ, հեղեղատն Կիսոնի. կոխեսցէ զնոսա անձն իմ, ոտք իմ զօրասցի՝՝ զօրութեամբ։ 22 Յայնժամ կարթակոտորք եղեն գարշապարք երիվարաց Մադդարովթայ, եւ հարթեսցեն գարշապարք իմ զհպարտութիւնս զարհուրանաց նոցա՝՝։ 23 Նզովեցէք զՄարովզ, ասէ հրեշտակն Տեառն, անիծանելով անիծէք զբնակիչս նորա, զի ոչ եկին յօգնականութիւն Տեառն, օգնական Տէր ի մէջ նահատակաց հզօրն՝՝։ 24 Օրհնեալ լիցի ի կանայս Յայել կին Քաբերայ Կինեցւոյ, օրհնեսցի ի կանայս ի խորանի իւրում։ 25 Ջուր խնդրեաց, եւ ետ կաթն, դաշխուրանաւ զօրաւորաց մատոյց կոգի։ 26 Զձեռն իւր ձախ ձգեաց ի ցիցն, եւ զաջ իւր ի սպառսպուռ ջախջախանս անպիտանացուցանել՝՝, եւ վախճանեցոյց զՍիսարա. վարսեաց ընդ ծամելիս նորա եւ անցոյց ցից ընդ գլուխ նորա եւ սատակեաց։ 27 Ի մէջ ոտից նորա անկաւ ծանրացեալ, եւ նիրհեցոյց ի մէջ ծնգաց իւրոց, յորում կորացաւ՝ մինչեւ զգետնեցաւ, անդ անկաւ չուառականն։ 28 Մայրն Սիսարայ հայեցեալ դէտ ակն ունէր ի վանդակապատ պատուհանէն, քանզի տեսանէր զդարձեալսն ի Սիսարայ, վասն զի՝՝ յետնեցան կառք նորա ի գալոյ։ Ընդէ՞ր յամեցին հետք կառաց նորա։ 29 Կանայք իմաստունք իշխանաց նորա ետուն անդրէն պատասխանի նմա եւ ասեն՝՝. եւ ինքնին անձամբ անձին առնէր իւր պատասխանի. 30 ոչ գտանիցեն զնա աւարաբաշխք, առնել սէր բարեկամաց ի գլուխ արանց։ Եւ եգել զաղիս նորա կապուտ երանգոցն՝ Սիսարայ, կապուտ երանգոցն գոյնագոյն նկարուց, նարօտ պէսպէս նկարուց. այն էր պարանոցին նորա կապուտ՝՝։ 31 Այսպէս կորիցեն ամենայն թշնամիք քո, Տէր, եւ որք սիրիցենն զնա՝ իբրեւ զելս արեգական ի զօրութեան նորա։ 32 Եւ դադարեաց երկիրն ամս քառասուն։ |