ԴԱՏԱՒՈՐՔ 3 - Գրաբար Աստվածաշունչ (1895)1 Եւ այս ազգք են զորս եթող Յեսու փորձել նոքօք զԻսրայէլ, զամենեսին որ ոչ գիտէին զամենայն պատերազմունս Քանանացւոց. 2 բայց վասն ազգաց որդւոցն Իսրայելի՝ ուսուցանել նոցա պատերազմ. սակայն եւ՝՝ որ յառաջագոյն քան զնոսա էին՝ ոչ գիտէին. 3 զհինգ նախարարութիւնս այլազգեաց, եւ զամենայն Քանանացին եւ զՍիդոնացին եւ զԽեւացին զբնակեալն ի Լիբանան ի լեռնէն Բաղհերմոնեայ մինչեւ ցԼաբովեմաթ։ 4 Եւ եղեւ ի փորձել նոքօք զԻսրայէլ, գիտել եթէ լսիցե՛ն պատուիրանացն Տեառն զորս պատուիրեաց հարցն նոցա ի ձեռն Մովսիսի։ 5 Եւ որդիքն Իսրայելի բնակեցին ի մէջ Քանանացւոյն եւ Քետացւոյն եւ Ամովրհացւոյն եւ Փերեզացւոյն եւ Խեւացւոյն եւ Յեբուսացւոյն եւ Գերգեսացւոյն՝՝։ 6 Եւ առին զդստերս նոցա իւրեանց ի կանայս, եւ զդստերս իւրեանց ետուն ուստերաց նոցա, եւ պաշտեցին զդիս նոցա։ 7 Եւ արարին որդիքն Իսրայելի չար առաջի Տեառն, եւ մոռացան զՏէր Աստուած իւրեանց եւ պաշտեցին զԲահաղ եւ զանտառսն։ 8 Եւ բարկացաւ սրտմտութեամբ Տէր Իսրայելի, եւ մատնեաց զնոսա ի ձեռս Քուսարսաթեմայ արքային Ասորւոց Միջագետաց. եւ ծառայեցին նմա ամս ութ։ 9 Եւ աղաղակեցին որդիքն Իսրայելի առ Տէր. եւ յարոյց Տէր փրկիչ Իսրայելի, եւ ետ նոցա զԳոդոնիէլ որդի Կենեզեայ, զեղբայր Քաղեբայ՝ կրտսեր քան զնա. եւ լուաւ նոցա։՝՝ 10 Եւ եղեւ ի նմա Հոգի Տեառն, եւ դատեաց զԻսրայէլ. եւ ել ի պատերազմ ընդ Քուսարսաթեմայ՝՝. եւ մատնեաց Տէր ի ձեռս նորա զՔուսարսաթեմ արքայ Ասորւոց. եւ սաստկացաւ ձեռն նորա ի վերայ Քուսարսաթեմայ։ 11 Եւ դադարեաց երկիրն ամս քառասուն. եւ մեռաւ Գոդոնիէլ որդի Կենեզի։ 12 Եւ յաւելին որդիքն Իսրայելի առնել չար առաջի Տեառն. եւ զօրացոյց Տէր զԵգղոմ արքայ Մովաբու ի վերայ Իսրայելի՝ վասն առնելոյ նոցա չար առաջի Տեառն։ 13 Եւ ժողովեաց ի վերայ նոցա զամենայն որդիսն Ամոնայ եւ զԱմաղէկ. եւ չոգաւ եհար զԻսրայէլ, եւ ժառանգեաց զքաղաքն Արմաւենեաց։ 14 Եւ ծառայեցին որդիքն Իսրայելի Եգղոմայ արքայի Մովաբու ամս ութուտասն։ 15 Եւ աղաղակեցին որդիքն Իսրայելի առ Տէր. եւ յարոյց նոցա Տէր փրկիչ զԱւովդ որդի Գերեայ՝ զորդի առն Յեմինեցւոյ, զերկոցունց ձեռաց աջողակն՝՝. եւ առաքեցին որդիքն Իսրայելի ի ձեռն նորա պատարագս Եգղոմայ արքայի Մովաբու։ 16 Եւ արար իւր Աւովդ սուր երկսայրի՝ թզաւ յերկայնութիւն, եւ եդ յաջոյ ազդեր իւրում ընդ տառատոկաւն, եւ գնաց։՝՝ 17 Եւ մատոյց զպատարագսն Եգղոմայ արքայի Մովաբու. եւ Եգղոմ էր այր յոյլ յոյժ։ 18 Եւ եղեւ իբրեւ վախճանեաց Աւովդ մատուցանել զպատարագսն, եւ արձակեաց զպատարագաբարձսն, 19 եւ Եգղոմ դարձաւ ի դրօշելոցն հանդերձ Գաղգաղաւն՝՝. եւ ասէ Աւովդ. Բանք ինչ են ինձ ընդ քեզ լռելեայն, արքայ։ Եւ ասէ Եգղոմ. Լուռ լեր։ Եւ ասէ ցամենեսին. Ի բաց գնացէք։՝՝ Եւ ելին արտաքս որ զնովաւն կային. 20 եւ նա՝՝ նստէր յամարանոցի ի վերնատանն իւրում միայն առանձինն. եւ ասէ Աւովդ. Պատգամ Աստուծոյ է իմ առ քեզ, արքայ։ Եւ յարեաւ Եգղոմ յաթոռոյն մերձ առ նա։ 21 Եւ եղեւ ընդ յառնելն նորա՝՝ ձգեաց Աւովդ զձեռն իւր զձախ, եւ առ զսուրն յաջոյ ազդերէ իւրմէ, եւ եհար ի կշտի Եգղոմայ, 22 արկ եւ զերախակալն եւս զհետ վիրին. եւ արգել ճարպն զվիրաբերանն՝՝, զի ոչ ձգեաց ի բաց զսուրն ի կշտէ նորա։ 23 Եւ ել ի պատշգամն, եւ անց ընդ վանդակապատսն, եւ՝՝ փակեաց զդուրս վերնատանն ընդդէմ նորա եւ աղխեաց. 24 եւ ինքն ել գնաց. եւ ծառայքն նորա մտին եւ տեսին, եւ ահա դուրք վերնատանն փակեալ էին, եւ ասեն. Գուցէ յաթոռն նստիցի ի պէտս ի սենեկին։ 25 Եւ կացին մնացին ամաչեցեալք. եւ ահա ոչ ոք էր որ՝՝ բանայր զդուրս վերնատանն. եւ առին զբանալին եւ բացին, եւ ահա տէրն իւրեանց անկեալ կայր մեռեալ ի գետնի։ 26 Եւ Աւովդ զերծաւ ի Սիրովթա՝ մինչ նոքա զաղմկաւն էին. եւ ոչ ոք էր որ փոյթ առնէր զնմանէ,՝՝ եւ նա անց առ դրօշելովքն՝՝, եւ զերծաւ անկաւ ի Սիրովթա։ 27 Եւ եղեւ իբրեւ եկն Աւովդ յերկիրն Իսրայելի՝՝, եհար փող ի լերինն Եփրեմայ. եւ իջին ընդ նմա որդիքն Իսրայելի ի լեռնէ անտի, եւ ինքն առաջի նոցա։ 28 Եւ ասէ ցնոսա. Իջէք զկնի իմ, զի մատնեաց Տէր Աստուած մեր՝՝ զթշնամիս մեր զՄովաբացիս ի ձեռս մեր։ Եւ իջին զկնի նորա, եւ կալան նախ զանցս Յորդանանու ի Մովաբայ, եւ ոչ թողին մարդոյ անցանել։ 29 Եւ հարին ի Մովաբայ յաւուր յայնմիկ իբրեւ տասն հազար արանց, զամենայն պատերազմողս ի նոցանէ եւ զամենայն այր զօրութեան, եւ ոչ ապրեցաւ եւ ոչ մի այր։ 30 Եւ վանեցաւ Մովաբ յաւուր յայնմիկ ընդ ձեռամբ Իսրայելի, եւ դադարեաց երկիրն ամս ութսուն. եւ դատեաց զնոսա Աւովդ մինչեւ մեռաւ։՝՝ 31 Եւ յետ նորա յարեաւ Սամեգար որդի Անաթայ, եւ եհար յայլազգեացն վեց հարեւր այր մաճով արօրոյ, եւ առ յաւարի արջառ եւ ոչխար բազում յոյժ, թող զորթս արջառոց՝՝. եւ փրկեաց նա զԻսրայէլ։ |