ԴԱՏԱՒՈՐՔ 20 - Գրաբար Աստվածաշունչ (1895)1 Եւ ելին ամենայն որդիքն Իսրայելի, եւ եկեղեցացաւ ժողովուրդն իբրեւ զայր մի ի Դանայ մինչեւ ցԲերսաբէէ եւ երկիրն Գաղաադու՝ առ Տէր ի Մասփա։ 2 Եւ եկաց կողմն՝՝ ամենայն ժողովրդեանն, եւ ամենայն ցեղք Իսրայելի յամենայն եկեղեցւոջ ժողովրդեանն Աստուծոյ, չորեք հարեւր հազար արանց սուսերամերկաց։ 3 Եւ լուան որդիքն Բենիամինի, եթէ ելին որդիքն Իսրայելի ի Մասփա։ Եւ ասեն որդիքն Իսրայելի. Խօսեցարուք թէ ո՞ւր եղեւ այսպիսի չարութիւն։ 4 Պատասխանի ետ այրն Ղեւտացի այր կնոջն սպանելոյ, եւ ասէ. Ի Գաբաա Բենիամինի եկի ես եւ հարճ իմ ագանել։ 5 Եւ յարեան ի վերայ իմ արք Գաբաացիք, եւ պատեցին շուրջ զինեւ զտունն զցայգ, եւ զիս կամեցան սպանանել. եւ զհարճն իմ լլկեցին եւ հեղձուցին՝՝, եւ մեռաւ. 6 եւ առի զհարճն իմ եւ յօշեցի զնա, եւ առաքեցի յամենայն սահմանս ժառանգութեան Իսրայելի. զի արարին վնաս մեծ եւ անզգամութիւն ի մէջ Իսրայելի։ 7 Եւ ահաւասիկ մեք ամենեքեան որդիք Իսրայելի, տուք մեզ բան եւ խորհուրդ։ 8 Եւ յարեաւ ամենայն ժողովուրդն իբրեւ զայր մի, եւ ասեն. Ոչ մտցուք այր իւրաքանչիւր ընդ յարկաւ իւրով, եւ ոչ խոտորեսցուք այր իւրաքանչիւր ի տուն իւր։ 9 Եւ արդ այս բան է զոր արասցուք ընդ Գաբաա. ելցուք ի վերայ նորա վիճակաւ։ 10 Բայց առցուք տասն այր ի հարիւրոց յամենայն ցեղիցդ Իսրայելի, եւ հարեւր ի հազարաց, եւ հազարս ի բիւրուց. առնուլ պաշար զօրուն բովանդակ երթողաց ի Գաբաա Բենիամինի, ըստ ամենայն անզգամութեան զոր արարին ի մէջ Իսրայելի։ 11 Եւ ժողովեցաւ ամենայն Իսրայէլ իբրեւ զայր մի եկեալք ի քաղաքաց։ 12 Եւ առաքեցին ցեղքն Իսրայելի արս յամենայն ցեղն Բենիամինի եւ ասեն. Զի՞նչ է չարութիւնդ այդ եղեալ ի միջի ձերում։ 13 Եւ արդ տեսէք զարսն զամպարիշտս զԳաբաացիս զորդիսն Բելիարայ, եւ սպանցուք զնոսա եւ բարձցուք զչարիսն յԻսրայելէ։ Եւ ոչ կամեցան որդիքն Բենիամինի լսել ձայնի եղբարց իւրեանց որդւոցն Իսրայելի։ 14 Եւ ժողովեցան որդիքն Բենիամինի ի քաղաքաց իւրեանց ի Գաբաա, ելանել ի պատերազմ ընդ որդիսն Իսրայելի։ 15 Եւ հանդէս արարին որդիքն Բենիամինի յաւուր յայնմիկ յիւրաքանչիւր քաղաքաց, քսան եւ հինգ հազար արանց սուսերամերկաց. թող զբնակիչս Գաբաացւոց, որ անցին ի հանդիսի՝ եւթն հարիւր այր, 16 երիտասարդք ընտիրք յամենայն ժողովրդենէն, յերկոցունց ձեռացն աջողակք՝՝. ամենեքին նոքա պարսաւորք, որ ձգէին քարինս եւ ի մազէ ոչ վրիպէին։ 17 Եւ ամենայն այր Իսրայելի անցին ի հանդիսի, առանց որդւոցն Բենիամինի, չորեք հարեւր հազարք արանց սուսերամերկաց, ամենեքին նոքա արք պատերազմօղք։ 18 Եւ յարեան ելին ի Բեթէլ, եւ հարցին զԱստուած եւ ասեն որդիքն Իսրայելի. Ո՞վ ելցէ մեզ առաջնորդ պատերազմել ընդ որդիսն Բենիամինի։ Եւ ասէ Տէր. Յուդա ելցէ առաջնորդ՝՝։ 19 Եւ յարեան որդիքն Իսրայելի ընդ առաւօտն եւ բանակեցան զԳաբաաւ։ 20 Եւ ել այր Իսրայելացի պատերազմել ընդ Բենիամինի. եւ ճակատեցան ընդ նոսա այր Իսրայելի ի պատերազմ առ Գաբաաւ։ 21 Եւ ելին որդիքն Բենիամինի ի քաղաքէն, եւ սատակեցին յԻսրայելէ քսան եւ երկու հազար արանց յաւուր յայնմիկ, եւ արկին տապաստ յերկիր։ 22 Եւ զօրացան դարձեալ այր Իսրայելացի, եւ յաւելին ճակատել ի պատերազմի ի տեղւոջ ուր ճակատեցան յաւուրն առաջնում։ 23 Եւ ելին որդիքն Իսրայելի եւ լացին առաջի Տեառն մինչեւ ցերեկոյ. եւ հարցին զՏէր եւ ասեն. Եթէ յաւելցո՞ւք մարտնչել ի պատերազմ ընդ Բենիամինի եղբօր մերում։ Եւ ասէ Տէր. Ելէք ի վերայ նոցա։ 24 Եւ ելին որդիքն Իսրայելի ի պատերազմ ընդ որդիսն Բենիամինի յաւուրն երկրորդի։ 25 Եւ ել Բենիամին ընդդէմ նոցա ի պատերազմ յաւուրն երկրորդի. եւ սատակեաց միւսանգամ ի ժողովրդենէ անտի ութ հազար արանց յերկիր, ամենեքեան նոքա սուսերաձիգք։ 26 Եւ ելին ամենայն որդիքն Իսրայելի եւ ամենայն ժողովուրդն եւ եկին ի Բեթէլ. եւ նստան լացին առաջի Տեառն, եւ պահեցին յաւուր յայնմիկ, եւ մատուցին ողջակէզս փրկութեան առաջի Տեառն. 27 քանզի անդ էր տապանակ ուխտին Տեառն Աստուծոյ յաւուրսն յայնոսիկ. եւ Փենեէս որդի Եղիազարու որդւոյ Ահարոնի կայր առաջի նորա յաւուրսն յայնոսիկ։ 28 Եւ հարցին որդիքն Իսրայելի զՏէր, եւ ասեն. Յաւելցո՞ւք միւսանգամ ելանել ի պատերազմ ընդ որդիսն Բենիամինի եղբօր մերում, թէ դադարեսցուք։ Եւ ասէ Տէր. Ելէք, եւ վաղիւ տաց զնա ի ձեռս ձեր։ 29 Եւ եդին որդիքն Իսրայելի դարանակալս շուրջ զԳաբաաւ։ 30 Եւ ելին որդիքն Իսրայելի ի վերայ Բենիամինի յաւուրն երրորդի, եւ ճակատեցան զԳաբաաւ որպէս միանգամն եւ միւսանգամն։ 31 Եւ ելին որդիքն Բենիամինի ընդդէմ ժողովրդեանն, եւ ձգեցան ի քաղաքէ անտի, եւ սկսան հարկանել ի ժողովրդենէ անտի վիրաւորս, որպէս միանգամն եւ միւսանգամն, առ ճանապարհօքն որ մին ելանէր ի Բեթէլ, եւ մեւսն ելանէր ի Գաբաա, եւ հարին յանդի անդ իբրեւ արս երեսուն յԻսրայելէ։ 32 Եւ ասեն որդիքն Բենիամինի. Կոտորելոց են սոքա առաջի մեր իբրեւ զառաջինն։ Եւ որդիքն Իսրայելի ասեն. Փախիցուք եւ մերժեսցուք զնոսա ի քաղաքէն ի ճանապարհս։ 33 Եւ ամենայն այր Իսրայելի յարեան յիւրաքանչիւր ի տեղւոջէ իւրմէ, եւ ճակատեցան ի Բաաղթամար. եւ դարանակալքն Իսրայելի կռուէին ի տեղւոջէ իւրեանց յարեւմտից՝՝ Գաբաայ։ 34 Եւ եկին հանդէպ Գաբաայ տասն հազար արանց ընտրելոց յամենայն Իսրայելէ. եւ ծանրացաւ պատերազմն, եւ նոքա ոչ գիտէին թէ հասեալ են ի վերայ նոցա չարիք։ 35 Եւ վանեաց Տէր զԲենիամին առաջի որդւոցն Իսրայելի, եւ սատակեցին որդիքն Իսրայելի ի Բենիամինէ յաւուր յայնմիկ քսան եւ հինգ հազար եւ հարեւր այր, ամենեքին նոքա սուսերաձիգք։ 36 Իբրեւ տեսին որդիքն Բենիամինի եթէ ի պարտութիւն մատնեալ են. տեղի ետուն այր Իսրայելեան Բենիամինի. զի յուսացեալ էին ի դարանամուտսն որ էին զԳաբաաւ։ 37 Եւ յարձակեցան դարանամուտքն եւ հեղան զԳաբաաւ. եւ մտին եւ հարին զքաղաքն ամենայն սրով սուսերի։ 38 Եւ ժամադրութիւն էր առն Իսրայելի առ դարանակալսն հրով հանել նոցա զբոց ծխոյ քաղաքին։ 39 Եւ դարձաւ այր Իսրայելացի ի պատերազմէն՝՝. եւ Բենիամին սկսաւ հարկանել վիրաւորս ի դարանակալացն Իսրայելի իբրեւ արս երեսուն. զի ասացին թէ՝ Վանելով վանին առաջի մեր իբրեւ զպատերազմն զառաջին։ 40 Եւ նշանակն ամբարձաւ յորդեալ ի վերայ քաղաքին իբրեւ սիւն ծխոյ. եւ հայեցաւ Բենիամին ի թիկունս իւր, եւ ահա ելանէր վախճան քաղաքին յերկինս։ 41 Եւ այր Իսրայելացի դարձաւ անդրէն, եւ տագնապեցաւ այր Բենիամինի. զի տեսին հասեալ ի վերայ նոցա զչարիսն։ 42 Եւ խոյս ետուն յերեսաց առն Իսրայելի ընդ ճանապարհ անապատին, եւ պատերազմն ժամանեաց նոցա. եւ որ ի քաղաքացն ելանէին՝ սատակէին զնոսա ի մէջ իւրեանց։ 43 Եւ հարին զԲենիամին, եւ մտին զհետ նորա ի Նուայ մինչեւ հանդէպ Գաբաայ՝ յարեւելից կողմանէ։ 44 Եւ անկան ի Բենիամինէ ութուտասն հազար արանց, ամենեքեան նոքա արք զօրաւորք։ 45 Եւ տեսեալ մնացորդացն փախեան յանապատն ապաստան ի վէմն Ռեմոնայ. եւ ճռաքաղ արարին ի նմանէ ի ճանապարհին հազարս հինգ արանց. եւ պնդեցան զհետ նոցա մինչեւ ցԳաղաադ, եւ հարին ի Բենիամինէ երկուս հազարս արանց։ 46 Եւ եղեն ամենայն անկեալքն ի Բենիամինէ քսան եւ հինգ հազար արանց սուսերամերկաց յաւուր յայնմիկ, ամենեքեան նոքա արք զօրութեան։ 47 Եւ խուսեալ մնացորդացն փախեան յանապատն ապաստան ի վէմն Ռեմոնայ՝ արք վեց հարեւր. եւ նստան ի վիմին Ռեմոնի չորս ամիսս։ 48 Եւ այր Իսրայելի դարձան ընդ կրուկն որդւոցն՝՝ Բենիամինի. եւ հարին զնոսա սրով սուսերի ի քաղաքէ կարգաւ մինչեւ ցանասուն, մինչեւ ցամենայն գտեալ յամենայն քաղաքս՝՝. եւ զքաղաքսն ապրեալս առաքեցին եւ՝՝ այրեցին հրով։ |