ԴԱՏԱՒՈՐՔ 11 - Գրաբար Աստվածաշունչ (1895)1 Եւ Յեփթայէ Գաղաադացի էր այր հզօր զօրութեամբ, եւ նա որդի կնոջ պոռնկի. եւ ծնաւ Գաղաադու զՅեփթայէ։ 2 Եւ ծնաւ կինն Գաղաադու նմա որդիս. եւ հաստատեցան որդիք կնոջն, եւ մերժեցին զՅեփթայէ, եւ ասեն ցնա. Ոչ ժառանգեսցես ի տան հօր մերոյ, զի որդի կնոջ պոռնկի ես դու։ 3 Եւ փախեաւ Յեփթայէ յերեսաց եղբարց իւրոց, եւ բնակեցաւ յերկրին ի Տովբ. եւ ժողովէին առ Յեփթայէ արք սրիկայք. եւ ելանէին ընդ նմա։ 4 Եւ եղեւ յետ աւուրց, եւ պատերազմեցան որդիքն Ամոնայ ընդ Իսրայելացիսն։ 5 Եւ եղեւ յորժամ ետուն պատերազմ որդիքն Ամոնայ ընդ Իսրայելի՝ չոգան ծերք Գաղաադու առնուլ զՅեփթայէ յերկրէն Տովբայ։ 6 Եւ ասեն ցՅեփթայէ. Եկ եւ եղիցիս մեզ ի զօրավար, եւ տացուք պատերազմ ընդ որդիսն Ամոնայ։ 7 Եւ ասէ Յեփթայէ ցծերսն Գաղաադու. Ո՞չ ապաքէն դուք ատեցէք զիս, եւ հանէք ի տանէ հօր իմոյ, եւ արձակեցէք զիս ի ձէնջ.՝՝ եւ արդ զի՞ եկիք առ իս յորժամ նեղեցայքդ։ 8 Եւ ասեն ծերքն Գաղաադու ցՅեփթայէ. Ոչ այդպէս է. այլ եկաք՝՝ առ քեզ, եւ երթիցես ընդ մեզ, եւ տացուք պատերազմ ընդ որդիսն Ամոնայ. եւ եղիցիս մեզ ի գլուխ ամենայն բնակչացս Գաղաադու։ 9 Եւ ասէ Յեփթայէ ցծերսն Գաղաադու. Եթէ դարձուցանիցէք զիս պատերազմել ընդ որդիսն Ամոնայ, եւ մատնեսցէ զնոսա Տէր առաջի իմ, ես եղէ՞ց իշխան։ 10 Եւ ասեն ծերքն Գաղաադու ցՅեփթայէ. Տէր կացցէ լսօղ ի միջի մերում, եթէ ոչ ըստ բանիդ քում նոյնպէս եւ արասցուք։ 11 Եւ գնաց Յեփթայէ ընդ ծերսն Գաղաադու. եւ կացուցին զնա ժողովուրդն ի վերայ իւրեանց գլուխ եւ առաջնորդ. եւ խօսեցաւ Յեփթայէ զամենայն զբանս իւր առաջի Տեառն ի Մասփա։ 12 Եւ առաքեաց Յեփթայէ հրեշտակս առ թագաւոր որդւոցն Ամոնայ եւ ասէ. Զի՞ կայ իմ եւ քո, զի եկեալ ես առ իս պատերազմել յերկրի իմում։ 13 Եւ ասէ արքայ որդւոցն Ամոնայ ցհրեշտակսն Յեփթայեայ. Ընդէ՞ր ա՛ռ Իսրայէլ զերկիր իմ յելանել իւրում յԵգիպտոսէ՝ յԱռնոնայ մինչեւ ցՅաբոկ եւ մինչեւ ցՅորդանան. եւ արդ դարձո զնա առ իս խաղաղութեամբ եւ գնացից։ Եւ դարձան հրեշտակքն առ Յեփթայէ՝՝։ 14 Եւ յաւել եւս Յեփթայէ առաքել հրեշտակս առ արքայ որդւոցն Ամոնայ, 15 եւ ասէ ցնա. Այսպէս ասէ Իսրայէլ եւ՝՝ Յեփթայէ. Ոչ ա՛ռ Իսրայէլ զերկիրն Մովաբայ եւ զերկիր որդւոցն Ամոնայ յելանել իւրեանց յԵգիպտոսէ. 16 այլ գնաց Իսրայէլ ընդ անապատն մինչեւ ցծովն Կարմիր, եւ եկն մինչեւ ցԿադէս. 17 եւ առաքեաց Իսրայէլ հրեշտակս առ արքայ Եդոմայ եւ ասէ. Թող անցից ընդ երկիր քո։ Եւ ոչ անսաց արքայն Եդոմայ. եւ առաքեաց առ արքայն Մովաբու. եւ ոչ կամեցաւ. եւ նստաւ Իսրայէլ ի Կադէս։ 18 Եւ շրջեցաւ ընդ անապատն, եւ պատեցաւ զերկրաւն Եդոմայ եւ զերկրաւն Մովաբայ. եւ եկն առ արեւելիւք երկրին Մովաբու, եւ բանակեցաւ յայնկոյս Առնոնայ, եւ ոչ մտին ի սահմանս Մովաբու. քանզի Առնովն էր սահման Մովաբու։ 19 Եւ առաքեաց Իսրայէլ հրեշտակս առ Սեհոն արքայ Ամովրհացւոց՝ թագաւոր Եսեբոնայ եւ Ամովրհացւոց՝՝, եւ ասէ ցնա Իսրայէլ. Թող անցից ընդ երկիր քո մինչեւ ցտեղի իմ։ 20 Եւ ոչ կամեցաւ Սեհոն զԻսրայէլ անցանել ընդ սահմանս իւր։ Եւ ժողովեաց Սեհոն զամենայն ժողովուրդ իւր, եւ բանակեցաւ յԱսսա. եւ ետ պատերազմ ընդ Իսրայելի։ 21 Եւ մատնեաց Տէր Աստուած Իսրայելի զՍեհոն եւ զամենայն ազգն նորա ի ձեռս Իսրայելի, եւ եհար զնոսա, եւ ժառանգեաց Իսրայէլ զերկիր Ամովրհացւոյն բնակելոյն յերկրին յայնմիկ։ 22 Եւ ժառանգեաց Իսրայէլ զամենայն սահմանս Ամովրհացւոյն յԱռնոնայ մինչեւ ցՅաբոկ, եւ յանապատէն մինչեւ ցՅորդանան։ 23 Եւ արդ Տէր Աստուած Իսրայելի եբարձ զԱմովրհացին յերեսաց ժողովրդեան իւրոյ Իսրայելի. եւ դո՞ւ ժառանգիցես զնա։ 24 Ո՞չ ապաքէն զոր ժառանգեցոյց քեզ Քամովս աստուածն քո՝ զայն ժառանգեսցես. եւ զամենայն զոր ժառանգեցոյց Տէր Աստուած մեր յերեսաց ձերոց՝ զայն մեք ժառանգեսցուք։ 25 Իսկ արդ՝ միթէ լա՞ւ ինչ իցես դու քան զԲաղակ որդի Սեպփովրայ՝ զարքայն Մովաբու. միթէ մարտի՞ւ մարտեաւ ընդ Իսրայելի, կամ պատերազմաւ պատերազմեցա՞ւ ընդ նոսա, 26 ի բնակելն Իսրայելի յԵսեբոն եւ ի դստերս նորա, եւ յԱրոյէր եւ ի դստերս նորա, եւ յամենայն քաղաքս որ առ եզերբ Յորդանանու ամս երեք հարեւր. զի՞ է զի ոչ թափեցին զնոսա ի ժամանակին յայնմիկ։ 27 Եւ ես ոչ ինչ մեղայ քեզ, եւ դու առնես ընդ իս չարութիւն՝ տալ ընդ իս պատերազմ. դատեսցէ Տէր որ դատելոցն է այսօր ի մէջ որդւոցն Իսրայելի եւ ի մէջ որդւոցն Ամոնայ։ 28 Եւ ոչ անսաց արքայ որդւոցն Ամոնայ բանիցն Յեփթայեայ զորս առաքեաց առ նա։ 29 Եւ եղեւ ի վերայ Յեփթայեայ Հոգի Տեառն, եւ անց ընդ Գաղաադ եւ ընդ Մանասէ, եւ անց ընդ դիտանոցն Գաղաադու, եւ ի դիտանոցէն Գաղաադու յայնկոյս որդւոցն Ամոնայ։ 30 Եւ ուխտեաց Յեփթայէ ուխտ Տեառն եւ ասէ. Եթէ մատնելով մատնեսցես զորդիսն Ամոնայ ի ձեռս իմ, 31 եւ եղիցի որ ելանելով ելանիցէ ի դրանց տան իմոյ ընդ առաջ իմ ի դառնալն իմում խաղաղութեամբ յորդւոցն Ամոնայ, եղիցի՝ զի մատուցից զնա Տեառն յողջակէզ։ 32 Եւ անց Յեփթայէ առ որդիսն Ամոնայ պատերազմել ընդ նոսա. եւ մատնեաց զնոսա Տէր ի ձեռս նորա։ 33 Եւ եհար զնոսա յԱրոյէրայ մինչեւ ի մուտս Մէննիթայ, քսան քաղաքք, մինչեւ ցՅաբէլ այգեստանեացն, հարուածս մեծամեծս յոյժ. եւ վանեցան որդիքն Ամոնայ յերեսաց որդւոցն Իսրայելի։ 34 Եւ եկն Յեփթայէ ի Մասփա ի տուն իւր. եւ ահա դուստր իւր ելանէր ընդ առաջ նորա թմբկօք եւ պարուք. եւ նա էր միամօր սիրելի նորա, եւ ոչ գոյր նորա բաց ի նմանէ ուստր կամ դուստր։ 35 Եւ եղեւ իբրեւ ետես զնա, պատառեաց զհանդերձս իւր եւ ասէ. Վա՜յ է ինձ, դուստր իմ, ընկճեցեր զիս, խոչընդակն եղեր ինձ՝՝. զի ես բացի զբերան իմ վասն քո՝՝ առ Տէր, եւ ոչ կարացից դարձուցանել։ 36 Եւ ասէ ցնա. Եթէ վասն իմ՝՝ բացեր զբերան քո առ Տէր, արա զիս որպէս ել ի բերանոյ քումմէ, փոխանակ զի արար քեզ Տէր վրէժխնդրութիւն ի թշնամեաց քոց յորդւոցն Ամոնայ։ 37 Եւ ասէ ցհայր իւր. Արա ինձ զբանս զայս. թողացո ինձ զերկուս ամիսս, եւ երթայց շրջեցայց ընդ լերինս եւ լացից զկուսութիւնս իմ ես եւ ընկերք իմ։ 38 Եւ ասէ ցնա. Երթ։ Եւ արձակեաց զնա զերկուս ամիսս. եւ չոգաւ ինքն եւ ընկերք իւր, եւ ելաց զկուսութիւն իւր ի վերայ լերանց։ 39 Եւ եղեւ յետ կատարելոյ երկուց ամսոցն, դարձաւ առ հայր իւր. եւ արար նովաւ զուխտն զոր ուխտեաց. եւ նա ոչ գիտէր զայր։ 40 Եւ եղեւ ի կրօնս ի մէջ Իսրայելի ողբալ զդուստրն Յեփթայեայ՝՝. աւուրց յաւուրս ժողովէին դստերք Իսրայելի ողբալ զդուստրն Յեփթայեայ Գաղաադացւոյ չորս աւուրս ի տարւոջ։ |