ՄԱՐԳԱՐԷՈՒԹԻՒՆ ԵՍԱՅԵԱՅ 44 - Գրաբար Աստվածաշունչ (1895)1 Բայց արդ լուր, Յակոբ ծառայ իմ, եւ Իսրայէլ, զոր ընտրեցիդ։ 2 Այսպէս ասէ Տէր Աստուած որ արար զքեզ, եւ որ ստեղծ զքեզ յորովայնէ, եւ տակաւին օգնականութիւն գտցես. մի՛ երկնչիր, ծառայ իմ Յակոբ, եւ սիրեցեալդ իմ Իսրայէլ, զոր ընտրեցի. 3 զի ես տաց ջուր ի ծարաւ որոց գնան յանջրդւոջ. եդից՝՝ զՈգի իմ ի վերայ զաւակի քո՝ եւ զօրհնութիւնս իմ ի վերայ որդւոց քոց։ 4 Եւ զուարճասցին իբրեւ զխոտ ջրարբի՝՝, եւ որպէս զուռ ի մէջ գնացից ջրոց։ 5 Մին ասասցէ. Աստուծոյ եմ ես, եւ մեւսն խրախոյս բարձցէ յանուն Աստուծոյ Յակոբայ. եւ մեւսն գիր հանցէ ձեռամբ իւրով թէ Աստուծոյ եմ ես՝՝, եւ յանուն Իսրայելի խրախոյս բարձցէ՝՝։ 6 Այսպէս ասէ Աստուած Թագաւորն Իսրայելի, եւ որ փրկեացն զնա Աստուած՝՝ զօրութեանց. Ես առաջին՝ եւ ես առ յապայ, բաց յինէն այլ ոչ գոյ Աստուած։ 7 Ո՞վ է իբրեւ զիս, յառաջ կացցէ, ձայն տացէ, պատմեսցէ եւ պատրաստեսցի ինձ՝ յորմէ հետէ արարի զմարդն յաւիտեան. եւ որ ինչ գալոցն իցէ, մինչչեւ եկեալ իցէ պատմեսցեն ձեզ։՝՝ 8 Մի՛ զարմանայք եւ մի՛ պատկառէք. ո՞չ ապաքէն ի սկզբանէ լուարուք՝՝ եւ պատմեցի ձեզ. դուք ձեզէն իսկ վկայէք ինձ, թէ գուցէ՞ այլ Աստուած բաց յինէն։ 9 Եւ յայնժամ իսկ ոչ ինչ էին ամենեքեան որ ստեղծանէին եւ դրօշէին զսնոտիսն, որ առնէին ըստ ցանկութեան իւրեանց, որք ոչ օգնիցեն նոցա. եւ վկայք դուք էք նոցա. զի ոչ տեսանեն եւ ոչ իմանան։ 10 Զի ամաչեսցէ որ ստեղծանէ զստեղծուածն՝՝, եւ ձուլէ զդրօշեալն յանօգուտ, 11 եւ ամենեքին որ հաղորդեսցին նմա. այլ ամաչեսցեն ամենեքեան որ ստեղծանեն կուռս, եւ դրօշեն զանօգուտսն. եւ ամենեքեան ուստի եղենն՝ ցամաքեցան, խլացեալք՝՝ ի մարդկանէ. ժողովեսցին ամենեքեան՝ յանդիման կացցեն ի միասին. ամաչեսցեն եւ յամօթ լիցին առ հասարակ։ 12 Զի թեքեաց հիւսն զգործի իւր, ուրագ սրեաց եւ կոփեաց նովաւ. դրով գործեաց եւ դրօշեաց զնա, եւ զօրութեամբ բազկի իւրոյ կանգնեաց զնա. քաղցիցէ եւ տկարասցի, եւ ոչ արբցէ ջուր։ 13 Ընտրեաց հիւսն փայտ, չափով կշռեաց զնա՝ եւ դրօշեաց ի նմանութիւն պատկերի. դրով կարգեաց զնա, եւ մածոյց սոսնձով, եւ արար ի պատկեր առն եւ ի զարդ գեղոյ երեսաց մարդոյ. հաստատեաց զնա ի տան իւրում։ 14 Զայն փայտ զոր եհատն, զսարոյն կամ զսօսն, զկաղնին կամ զթեղօշն, զոր տնկեաց Տէր եւ աճեցոյց անձրեւ՝ 15 զի իցէ մարդկան այրելի, առեալ ի նմանէ այրեաց եւ ջեռաւ, եւ ի կիսոյն արար հաց, եւ զկէսն արար պատկեր եւ երկիր եպագ նոցա. եւ զոր իւրովին պատկեր գործեաց, անկեալ առաջի այնմ երկիր պագանէ։ 16 Զորոյ զկէսն այրեաց ի խարուկի, եւ եփեաց կայծակամբք նորա հաց եւ խորովեաց միս, կերաւ եւ յագեցաւ եւ ջեռաւ,՝՝ եւ ասէ. Վա՛շ ինձ զի ջեռայ եւ տեսի զկրակ։ 17 Եւ զկէսն արար յԱստուած դրօշեալ. եւ խոնարհեալ երկիր եպագ նմա. յաղօթս կայ առ նա եւ ասէ. Փրկեա զիս, զի աստուած իմ ես դու։ 18 Ոչ առին ի միտ իմանալ, զի շլացան տեսանել աչօք իւրեանց, եւ իմանալ սրտիւք իւրեանց։ 19 Եւ ոչ ածին զմտաւ զի ոչ ծանեան խորհրդովք՝ թէ զկէս փայտին այրեցին ի հուր, եւ ի վերայ կայծականց նորա հաց արարին, եւ միս խորովեցին եւ կերան, եւ զկէսն ի նմանէ արարին պատկեր եւ երկիր պագանեն նմա։ 20 Գիտասջիր զի մոխիր է սիրտ նոցա, եւ մոլորեալ են. եւ ոչ ոք ի նոցանէ կարէ փրկել զանձինս նոցա. տեսէք եւ ոչ ասացէք թէ՝ Խաբէութիւն է ի ձեռս ձեր։՝՝ 21 Յուշ լիցի քեզ այդ, Յակոբ, եւ Իսրայէլ, զի ծառայ իմ ես դու. ինձ ստեղծի զքեզ ի ծառայութիւն. եւ Իսրայէլ, մի՛ մոռանար զիս՝՝. 22 զի ահաւասիկ ջնջեցի իբրեւ զամպ զանօրէնութիւնս քո, եւ իբրեւ զմէգ զմեղս քո. դարձ առ իս, եւ փրկեցից զքեզ։ 23 Ուրախ լերուք, երկինք, զի ողորմեցաւ Աստուած Իսրայելի՝՝. փող հարէք, հիմունք երկրի. գոչեցէք, լերինք, զուրախութիւն, բլուրք եւ ամենայն ծառք որ ի նոսա. զի փրկեաց Աստուած զՅակոբ, եւ Իսրայէլ՝՝ փառաւորեսցի։ 24 Այսպէս ասէ Տէր որ փրկեացն զքեզ եւ ստեղծ զքեզ յորովայնէ. Ես եմ Տէր որ առնեմ կատարեմ զամենայն. ձգեցի զերկինս միայն, եւ հաստատեցի զերկիր։ 25 Ո՞ այլ ոք ցրեաց՝՝ զնշանս վհկաց, եւ զըղձութիւնս ի սրտից՝՝. ո՞ դարձուցանէ զիմաստունս յետս, եւ զխորհուրդս նոցա յիմարեցուցանէ, 26 եւ հաստատէ զբանս ծառայից իւրոց, եւ զխորհուրդս հրեշտակաց իւրոց արդարացուցանէ։ Ես եմ որ ասեմ ցԵրուսաղէմ թէ՝ Բնակեսջիր, եւ ցքաղաքս Հրէաստանի թէ՝ Շինեսջիք վերստին. եւ զաւերակս նորա կանգնեցից. 27 որ ասեմ ցանդունդս թէ՝ Աւերեսջիր, եւ զգետս նորա՝՝ ցամաքեցուցից. 28 որ ասեմ ցԿիւրոս թէ՝ Իմաստնասջիր, եւ զամենայն կամս իմ արասցես. որ ասեմ ցԵրուսաղէմ թէ՝ Շինեսջիր, եւ զտաճարն իմ սուրբ հաստատեցից՝՝։ |