ՄԱՐԳԱՐԷՈՒԹԻՒՆ ԵՍԱՅԵԱՅ 21 - Գրաբար Աստվածաշունչ (1895)1 Տեսիլ անապատին ի ծովու։ Իբրեւ մրրիկ ընդ անապատ անցցէ, յանապատէ եկեալ յերկրէ։ 2 Ահագին է տեսիլն, եւ խստութիւն պատմեցաւ ինձ. որ արհամարհելոցն է՝ արհամարհէ, եւ որ անօրինելոցն է՝ անօրինէ։ Ի վերայ իմ հասին Եղամացիք, եւ հրեշտակք Պարսից գան ի վերայ իմ. արդ հեծեծեցից եւ մխիթարեցից զանձն իմ։՝՝ 3 Վասն այսորիկ լցաւ մէջ իմ դողութեամբ, եւ երկունք կալան զիս իբրեւ զծննդական. պնդեցայ՝ զի մի՛ լուայց, փութացայ՝ զի մի՛ տեսից։ 4 Սիրտ իմ դարձաւ ի մոլորութիւն, եւ անօրէնութիւն դեռ ընկղմէր զիս. անձն իմ եկաց ի դողութեան. գիտեա զդիտաւորութիւն քո։ 5 Պատրաստեա սեղան, կեր արբ. արիք, իշխանք, պատրաստեցէք վահանս։՝՝ 6 Զի այսպէս ասաց ցիս Տէր. Գնա դու անձամբ անձին դէտ լինիջիր, եւ զոր ինչ տեսանիցես պատմեսջիր։ 7 Եւ տեսի հեծեալս երկուս. հեծեալ մի իշոյ եւ հեծեալ մի ուղտու. լսել լուր բազում ունկնդրութեան. եւ կոչեա զՈւրիա ի դիտանոցդ, ասէ Տէր։ 8 Եւ կացի զտիւն ողջոյն եւ զգիշերն ամենայն ի վերայ բանակին. 9 եւ տեսի զի գայր նոյն հեծեալ երկձի.՝՝ պատասխանի ետ եւ ասէ. Անկաւ կործանեցաւ Բաբելոն, եւ ամենայն պատկերք նորա եւ ձեռագործք իւր՝՝ կործանեցան յերկիր։ 10 Լուարուք մնացորդք եւ ցաւագնեալք, լուարուք զոր լուայ ի Տեառնէ զօրութեանց, զոր Աստուած Իսրայելի պատմեաց մեզ։՝՝ 11 Տեսիլ Եդովմայեցւոցն։ Առ իս կոչեա ի Սէիր լեռնէ. Պահեցէք զմահարձանս. 12 պահեցից ըստ առաւօտն եւ զցայգ. եթէ խնդրեսցես, խնդրեսջիր եւ առ իս բնակեսջիր։՝՝ 13 Առած ի վերայ Արաբացւոց։ Ընդ երեկոյս ննջեսցես յանտառի ճանապարհին Դովդանիմ՝՝։ 14 Բերէք ջուր ընդ առաջ ծարաւեաց, բնակիչք Թեմանու. հացիւ ընդ առաջ ելէք փախստէից։ 15 Վասն բազմութեան սպանելոցն, եւ վասն բազմութեան մոլորելոցն, եւ վասն բազմութեան սրոյն, եւ վասն բազմութեան աղեղանցն լարելոց, եւ վասն բազմութեան անկելոցն ի պատերազմի։՝՝ 16 Զի այսպէս ասաց ցիս Տէր. Ամ մեւս եւս իբրեւ զտարի վարձկանի, եւ պակասեսցեն փառք որդւոցն Կեդարու։ 17 Եւ մնացորդք աղեղնաւորաց զօրաւորաց որդւոցն Կեդարու եղիցին սակաւաւորք. զի Տէր Աստուած Իսրայելի խօսեցաւ։ |