ԾՆՈՒՆԴՔ 23 - Գրաբար Աստվածաշունչ (1895)1 Եւ եղեն կեանք Սառայի հարեւր եւ քսան եւ եւթն ամ։ 2 Եւ մեռաւ Սառա ի քաղաքի Արբոկայ ի ձորն, այն ինքն է Քեբրոն յերկրին Քանանացւոց. եւ եկն Աբրահամ կոծել զՍառա եւ սուգ առնուլ։ 3 Եւ յարեաւ Աբրահամ ի մեռելոյ անտի իւրմէ, եւ խօսեցաւ ընդ որդիսն Քետայ եւ ասէ. 4 Պանդուխտ եւ նժդեհ եմ ես ի միջի ձերում. արդ տուք ինձ ստացուած գերեզմանի ընդ ձեզ եւ թաղեցից զմեռեալս իմ։ 5 Պատասխանի ետուն որդիքն Քետայ Աբրահամու եւ ասեն. 6 Ունկն դիր մեզ, Տէր. թագաւոր յԱստուծոյ ես ի միջի մերում. յընտիր շիրմաց մերոց թաղեա զմեռեալդ քո. զի ոչ ոք ի մէնջ արգելու ի քէն զշիրիմս։ 7 Յարեաւ Աբրահամ եւ երկիր եպագ ժողովրդեան երկրին, որդւոցն Քետայ։ 8 Եւ խօսեցաւ ընդ նոսա Աբրահամ եւ ասէ. Եթէ յօժարիցէք ի մտի ձերում թաղել զմեռեալդ իմ յերեսաց իմոց, ունկն դիք ինձ, եւ խօսեցարուք վասն իմ ընդ Եփրոնի որդւոյ Սահառայ, 9 եւ տացէ ինձ զայրն կրկին՝՝, որ է ի վիճակի ագարակին իւրոյ, արծաթոյ՝ որչափ եւ արժան իցէ. տացէ զնա ինձ ի միջի ձերում ի ստացուած բնակաց։ 10 Եւ Եփրոն նստէր ի մէջ որդւոցն Քետայ։ Պատասխանի ետ Եփրոն Քետացի Աբրահամու եւ ասէ լու ի լու որդւոցն Քետայ եւ ամենեցուն որ մտանէին ընդ դուռն քաղաքին նորա։ 11 Եւ ասէ. Յիս դարձ, Տէր, եւ ունկն դիր ինձ. զագարակն ետու քեզ, եւ զայրն որ ի նմա՝ տաց քեզ. առաջի ամենայն քաղաքակցաց իմոց ետու քեզ. թաղեա զմեռեալն քո։ 12 Եւ երկիր եպագ Աբրահամ առաջի ժողովրդեան երկրին։ 13 Եւ խօսեցաւ ընդ Եփրոնի յականջս ժողովրդեան երկրին եւ ասէ. Որովհետեւ անսացեր ինձ, ունկն դիր ինձ. տաց քեզ արծաթ ընդ ագարակին, ա՛ռ յինէն եւ թաղեցից անդ զմեռեալս։ 14 Պատասխանի ետ Եփրոն Աբրահամու եւ ասէ ցնա. 15 Ոչ տէր իմ. լուայ թէ՝՝ գետինն չորեքհարեւր սատեր արծաթոյ է. ընդ իս եւ ընդ քեզ զի՞նչ է այն. բայց դու թաղեա զմեռեալն քո։ 16 Եւ իբրեւ լուաւ Աբրահամ յԵփրոնէ, կշռեաց զարծաթն Եփրոնի, զոր խօսեցաւ յականջս որդւոցն Քետայ, չորեքհարեւր սատեր արծաթոյ ընտրոյ վաճառականաց։ 17 Եւ հաստատեցաւ ագարակն Եփրոնի, որ է առ կրկնով այրիւն՝՝ յանդիման Մամբրէի, ագարակն եւ այրն որ է ի նմա, եւ ամենայն ծառատունկ որ էր յագարակի անդ շուրջ յամենայն սահմանս նորա, 18 ի ստացուածս Աբրահամու առաջի որդւոցն Քետայ, որ մտանէին ընդ դուռն քաղաքին նորա։ 19 Եւ յետ այնորիկ թաղեաց Աբրահամ զՍառա զկին իւր ի կրկնում այրի ագարակին, որ է՝՝ յանդիման Մամբրէի, այն է Քեբրոն՝ յերկրին Քանանացւոց։ 20 Եւ հաստատեցաւ ագարակն եւ այրն որ է ի նմա՝ Աբրահամու, ի ստացուածս շիրմաց յորդւոցն Քետայ։ |