ՄԱՐԳԱՐԷՈՒԹԻՒՆ ԵԶԵԿԻԵԼԻ 48 - Գրաբար Աստվածաշունչ (1895)1 Եւ այս են սահմանք ցեղիցն։ Ի սկզբանէ կողմանն հիւսիսոյ ըստ կողման զառիթափին, որ զատանէ ընդ մուտս Եմաթու հանգրուանին Աւնանու. սահման Դամասկոսի առ հիւսիսով ըստ կողման բնակութեանն Եմաթայ. եւ եղիցի նոցա՝՝ արեւելակողմ մինչեւ ի ծովակողմ՝ Դանայ բաժին մի։ 2 Եւ ի սահմանաց անտի Դանայ յարեւելակողմ մինչեւ ի ծովակողմ՝ Ասերայ բաժին մի։ 3 Եւ ի սահմանացն Ասերայ յարեւելից կուսէ մինչեւ ցծովակողմ՝ Նեփթաղիմայ բաժին մի։ 4 Եւ ի սահմանացն Նեփթաղիմայ յարեւելից կուսէ մինչեւ ցծովակողմ՝ Մանասէի բաժին մի։ 5 Եւ ի սահմանացն Մանասէի յարեւելից կուսէ մինչեւ ցծովակողմ՝ Եփրեմի բաժին մի։ 6 Եւ ի սահմանացն Եփրեմի յարեւելից կուսէ մինչեւ ի ծովակողմ՝ Ռուբենի բաժին մի։ 7 Եւ ի սահմանացն Ռուբենի յարեւելից կուսէ մինչեւ ցծովակողմ՝ Յուդայի բաժին մի։ 8 Եւ ի սահմանացն Յուդայի յարեւելից կողմանէ մինչեւ ցծովակողմ՝ եղիցի պտուղ նուիրաց քսան եւ հինգ հազար յերկայնութիւն եւ տասն հազար ի լայնութիւն՝՝ իբրեւ զմի ի վիճակաց ի կողմանցն արեւելից մինչեւ ցծովակողմն. եւ եղիցի սուրբ ի մէջ նոցա։ 9 Պտուղ զոր նուիրիցեն՝՝ Տեառն, յերկայնութիւն քսան եւ հինգ հազար եւ ի լայնութիւն տասն հազար։ 10 Եղիցի պտուղ՝՝ սրբութեանց քահանայիցն, ընդ հարաւակողմն՝ յերկայնութիւն քսան եւ հինգ հազար, եւ ընդ ծովակողմն՝ ի լայնութիւն տասն հազար, եւ ընդ արեւելս՝ ի լայնութիւն տասն հազար, եւ ընդ հիւսիսակողմն՝ յերկայնութիւն քսան եւ հինգ հազար. եւ եղիցի սահման սրբութեանցն ի միջի նոցա՝՝ 11 քահանայիցն սրբեցելոց, որդւոցն Սադովկայ, որք պահեն զպահպանութիւնս տանն Տեառն՝՝, որք ոչ մոլորեցան ի մոլորութիւն որդւոցն Իսրայելի՝ որպէս մոլորեցան Ղեւտացիքն։ 12 Եւ եղիցի նոցա պտուղ տուեալ ի պտղոյ՝՝ երկրին սրբութիւն սրբութեանցն, ի սահմանաց Ղեւտացւոցն։ 13 Եւ Ղեւտացւոցն որ զհետ սահմանաց՝՝ քահանայիցն՝ իցէ յերկայնութիւն քսան եւ հինգ հազար, եւ ի լայնութիւն տասն հազար. 14 ոչ վաճառեսցի ի նոցանէն, եւ ոչ չափեսցի, եւ ոչ առցի առաջին արդեանց՝՝ երկրին. զի սրբութիւն Տեառն է։ 15 Բայց հինգ հազարն աւելորդ լայնութեամբ առ քսան եւ հինգ հազարին, պատուար արտաքոյ քաղաքին լինիցի՝՝ ի բնակութիւն եւ յարձակավայրս նորին. եւ եղիցի քաղաքն ի միջի նորա։ 16 Եւ այս է չափ նորա. ի կողմանէ հիւսիսոյ՝ չորք հազար եւ հինգ հարեւր, եւ ի կողմանէ հարաւոյ՝ չորք հազար եւ հինգ հարեւր, եւ ի կողմանէ արեւելից՝ չորք հազար եւ հինգ հարեւր, եւ ի կողմանէ ծովուն՝ չորք հազար եւ հինգ հարեւր։ 17 Եւ եղիցի բացատ քաղաքին ընդ հիւսիսի՝ երկերիւր եւ յիսուն, եւ ընդ հարաւ՝ երկերիւր եւ յիսուն, եւ ընդ արեւելս՝ երկերիւր եւ յիսուն, եւ ընդ ծով՝ երկերիւր եւ յիսուն։ 18 Եւ աւելորդ երկայնութեանն մերձ առ երախայրեօք սրբութեանցն տասն հազար ընդ արեւելս, եւ տասն հազար ընդ ծով. եւ եղիցին երախայրիք ի սրբութեանն՝՝. եւ եղիցին արդիւնք նորա ի հաց գործաւորի քաղաքին։ 19 Եւ գործաւորք քաղաքին գործեսցեն զնա յամենայն ցեղիցն Իսրայելի։ 20 Եւ ամենայն պտուղ քսան եւ հինգ հազար՝ առ քսան եւ հինգ հազար. չորեքկուսի զատանիջիք զպտուղ սրբութեանն ի բնակութենէ՝՝ քաղաքին։ 21 Եւ աւելորդն նորին՝ գլխաւորին եղիցի. եւ անտի ի պտուղ սրբութեանն, եւ ի նիստ քաղաքին յանդիման նորին, քսան եւ հինգ հազար յերկայնութիւն՝՝ մինչեւ ի սահմանս արեւելից կողմանն, եւ ի ծովակողմ դէմ յանդիման նմին, քսան եւ հինգ հազար՝՝ մինչեւ ի սահմանս ծովակողմանն մերձ առ վիճակ գլխաւորին։ Եւ եղիցի պտուղ՝՝ սրբութեանցն եւ սրբութիւն տաճարին ի մէջ նորա։ 22 Եւ ի ժառանգութենէ Ղեւտացւոցն, եւ ի բնակութենէ քաղաքին՝ միջոցն գլխաւորացն եղիցի. եւ՝՝ ի մէջ սահմանացն Յուդայ, եւ ի մէջ սահմանացն Բենիամինի՝ գլխաւորին եղիցի։ 23 Եւ աւելորդ ցեղիցն՝ ի կողմանցն արեւելից մինչեւ ցծովակողմ՝ Բենիամինի բաժին մի։ 24 Եւ ի սահմանացն Բենիամինի՝ ի կողմանցն արեւելից մինչեւ ի ծովակողմ՝ Շմաւոնի բաժին մի։ 25 Եւ ի սահմանացն Շմաւոնի ի կողմանցն արեւելից մինչեւ ի ծովակողմ՝ Իսաքարայ բաժին մի։ 26 Եւ ի սահմանացն Իսաքարայ՝ ի կողմանցն արեւելից մինչեւ ի ծովակողմ՝ Զաբուղոնի բաժին մի։ 27 Եւ ի սահմանացն Զաբուղոնի ի կողմանցն արեւելից մինչեւ ի ծովակողմ՝ Գադայ բաժին մի։ 28 Եւ ի սահմանացն Գադայ մինչեւ ցհարաւ եղիցի սահմանք նորա, ի Թեմանայ եւ ի ջրոցն Ռաբովթ Կադէս՝ ժառանգութիւն մի մինչեւ ցծովն՝՝ մեծ։ 29 Այս երկիր է զոր բաժանիցէք վիճակաւ ազգացն Իսրայելի, եւ այս բաժինք նոցա, ասէ Տէր Աստուած։ 30 Եւ այս ելամուտ քաղաքին. ընդ կողմ հիւսիսոյ չորք հազար եւ հինգ հարեւր չափովն։ 31 Եւ դրունք քաղաքին ըստ անուանց ազգացն Իսրայելի. դրունք երեք ընդ կողմ հիւսիսոյ. դուռն մի Ռուբենի եւ դուռն մի Յուդայ եւ դուռն մի Ղեւեայ։ 32 Եւ ընդ կողմ արեւելից չորք հազարք եւ հինգ հարեւր չափովն, եւ դրունք երեք. դուռն մի Յովսեփայ եւ դուռն մի Բենիամինի եւ դուռն մի Դանայ։ 33 Եւ ընդ կողմ հարաւոյ չորք հազարք եւ հինգ հարեւր չափովն, եւ դրունք երեք. դուռն մի Շմաւոնի եւ դուռն մի Իսաքարայ եւ դուռն մի Զաբուղոնի։ 34 Եւ ընդ կողմն ծովու չորք հազար եւ հինգ հարեւր չափովն, եւ դրունք երեք. դուռն մի Գադայ եւ դուռն մի Ասերայ եւ դուռն մի Նեփթաղիմայ։ 35 Շուրջ շրջանակաւ՝ ութուտասն հազար. եւ անուն քաղաքին յորմէհետէ լինիցի. Անդ Տէր եղիցի անուն նորա՝՝։ |