ՄԱՐԳԱՐԷՈՒԹԻՒՆ ԵԶԵԿԻԵԼԻ 46 - Գրաբար Աստվածաշունչ (1895)1 Այսպէս ասէ Տէր Աստուած. Դուռնն որ ի ներքնում սրահին՝՝ հայի ընդ արեւելս՝ եղիցի փակեալ զվեց աւուրսն արգոյս, եւ յաւուրն շաբաթու բացցի, եւ յաւուրն ամսագլխոյն բացցի։ 2 Եւ մտցէ առաջնորդն ընդ ճանապարհ կամարի դրանն արտաքնոյ, եւ կացցէ ի վերայ սեմոց դրանն. եւ արասցեն վասն նորա ողջակէզս քահանայքն, եւ զփրկութեանցն վասն՝՝ նորա. եւ երկիր պագցէ ի վերայ սեմոց դրանն, եւ ելցէ. եւ դուռն մի՛ փակեսցի մինչեւ ցերեկոյ։ 3 Եւ երկիր պագանիցէ ժողովուրդ երկրին առաջի մտից դրանն յաւուր շաբաթուց եւ յամսագլուխս՝ առաջի Տեառն։ 4 Եւ զողջակէզսն զոր մատուսցէ Տեառն առաջնորդն յաւուր շաբաթուց՝՝ վեց որոջ անարատ եւ խոյ մի անարատ. 5 եւ մաննա եփեալ առ խոյն եւ առ որոջսն եւ զոհս եւ տուրս ըստ ձեռին նորա, եւ քսեստ իւղոյ ըստ հացին՝՝։ 6 Եւ յաւուրն ամսամտից զուարակ մի՝ որդի պառակամօր՝՝ անարատ. եւ վեց որոջքն եւ խոյն անարատ եղիցին։ 7 Եւ նաշիհ ըստ զուարակին եւ նաշիհ եւ մաննա ըստ խոյին եւ ըստ որոջացն, որպէս եւ պատրաստեսցի ի ձեռս իւր, եւ եւղ ըստ նաշհոյն։ 8 Եւ ի մտանել առաջնորդին՝ ընդ ճանապարհ կամարի դրանն մտցէ, եւ ընդ նոյն ճանապարհ դրանն՝՝ ելցէ։ 9 Եւ յորժամ մտանիցէ ժողովուրդ երկրին առաջի Տեառն ի տօնս, որ մտանիցէ ընդ ճանապարհ դրանն հիւսիսոյ երկիր պագանել, ելցէ ընդ ճանապարհ դրանն հարաւոյ. եւ որ մտանիցէ ընդ ճանապարհ դրանն հարաւոյ՝ ելցէ ընդ ճանապարհ դրանն հիւսիսոյ. եւ մի՛ դարձցի ընդ ճանապարհ դրանն ընդ որ եմուտ, այլ ուղղորդ ընդ նոյն ելցէ։ 10 Եւ առաջնորդն ի մէջ նոցա՝ ի մտանելն նոցա ընդ նոսին մտցէ, եւ ընդ ելանելն նոցա՝ ընդ նոսին ելցէ։ 11 Եւ ի տօնս եւ ի ժողովս՝ եղիցի մաննա եփեալ ըստ զուարակին, եւ մաննա ըստ խոյին, եւ ըստ որոջացն, որպէս պատրաստեսցի ի ձեռս նորա եւ քսեստ մի իւղոյ ըստ հացին։ 12 Ապա թէ առնիցէ առաջնորդն զխոստովանութեան ողջակէզս եւ զկամաւն փրկութեան Տեառն, բացցէ իւր զդուռնն որ հայի ընդ արեւելս, եւ արասցէ զողջակէզսն իւր եւ զվասն փրկութեանն, ըստ օրինակին որպէս եւ առնիցէ յաւուր շաբաթուցն. եւ ելցէ, եւ փակեսցէ զդրունսն յետ ելանելոյն իւրոյ։ 13 Եւ բուծ մի տարեւոր անարատ արասցէ յողջակէզ Տեառն, հանապազօր այգուն այգուն արասցէ զայն. 14 եւ մաննա ընդ նմին այգուն այգուն՝ զվեցերորդ մասն չափոյն, եւ երրորդ մասն քսեստի եւղ խառնեալ ի նաշիհն մաննա Տեառն՝ հրաման յաւիտենական. 15 հանապազ մատուցանիցեն զգառնն եւ զմաննայն, եւ զեւղն արասցէ՝՝ այգուն այգուն ողջակէզ հանապազորդ։ 16 Այսպէս ասէ Տէր Տէր. Եթէ տացէ առաջնորդն պարգեւ միում յորդւոց իւրոց ի ժառանգութենէ իւրմէ, եղիցի այն որդւոց նորա ի կալուածս ժառանգութեան։ 17 Եւ եթէ տացէ պարգեւ ի ժառանգութենէ իւրմէ միում ի ծառայից իւրոց, եղիցի նմա այն մինչեւ ցտարին թողութեան, եւ ապա դարձցի անդրէն առ առաջնորդն. բայց ժառանգութիւն որդւոց նորա՝ նոցին եղիցի։ 18 Եւ մի՛ առցէ առաջնորդն ի ժառանգութենէ ժողովրդեանն իւրոյ բռնադատել զնոսա. այլ յիւրմէ կալուածոց եւ յիւրմէ ժառանգութենէ ժառանգեցուսցէ՝՝ որդւոց իւրոց, զի մի՛ ցրուեսցի ժողովուրդն իմ յիւրաքանչիւր բնակութենէ։ 19 Եւ տարաւ զիս ընդ ճանապարհ դրանն հարաւոյ ի պատշգամ՝՝ սրբութեանց քահանայիցն՝ որ հայէր ընդ հիւսիսի, եւ ահա անդ տեղի զատեալ. 20 եւ ասէ ցիս. Այս է տեղի յորում եփիցեն քահանայքն զվասն անգիտութեանն եւ զվասն մեղացն. անդ եփեսցեն եւ զմաննայն, ամենեւին մի՛ ելանել ի սրահն՝՝ արտաքին սրբել զժողովուրդն։ 21 Եւ եհան զիս ի սրահն արտաքին, եւ շրջեցոյց զիս ընդ չորս կողմանս սրահին. եւ ահա գաւիթ առ գաւիթս ընդ չորս կողմանս սրահին։ 22 Գաւթին փոքու քառասուն կանգուն երկայնութիւն եւ երեսուն կանգուն լայնութիւն, մի չափ էր չորեցունց՝՝։ 23 Եւ պատշգամք շուրջանակի զչորեքումբք, եւ խոհակերոցք շինեալք ի ներքոյ պատշգամացն շուրջանակի։ 24 Եւ ասէ ցիս. Այս տունք են խոհակերաց՝ ուր հասուցանիցեն պաշտօնեայքն տանն զզենլիս ժողովրդեանն։ |