ՄԱՐԳԱՐԷՈՒԹԻՒՆ ԵԶԵԿԻԵԼԻ 43 - Գրաբար Աստվածաշունչ (1895)1 Եւ ած զիս ի դուռնն որ հայէր ընդ արեւելս, եւ եհան զիս ընդ այն։ 2 Եւ ահա փառքն Աստուծոյ Իսրայելի գային ընդ ճանապարհն արեւելից, եւ ձայն բանակին իբրեւ զձայն կրկնելոյ՝՝ բազմաց. եւ երկիրն լուսաւորեցաւ ի նմանութիւն լուսաւորաց ի փառացն շուրջանակի՝՝։ 3 Եւ տեսիլն զոր տեսանէի, էր ըստ տեսլեանն զոր տեսանէի ի ժամանակի իբրեւ մտանէի օծանել զքաղաքն. եւ տեսիլ կառացն զոր տեսի, էր՝՝ ըստ տեսլեանն զոր տեսի ի վերայ Քոբար գետոյ. եւ անկայ ի վերայ երեսաց իմոց։ 4 Եւ փառքն Տեառն մտին ի տաճարն ընդ ճանապարհ դրանն՝ որ հայէր ընդ արեւելս։ 5 Եւ համբարձ զիս Հոգին, եւ տարաւ զիս ի սրահն ներքին. եւ ահա լի էր փառօք Տեառն տաճարն։ 6 Եւ կայի անդ, եւ ահա՝՝ ձայն ի տաճարէ անտի որ խօսէր ընդ իս. եւ այր մի կայր մօտ առ իս. 7 եւ ասէ ցիս. Որդի մարդոյ, տեսե՞ր զտեղի՝՝ աթոռոյ իմոյ եւ զտեղի հետոց ոտից իմոց, որովք բնակեսցէ անուն իմ ի մէջ տանն՝՝ Իսրայելի յաւիտեան, եւ մի՛ եւս պղծեսցեն տունն Իսրայելի զանուն իմ սուրբ, ինքեանք եւ առաջնորդք իւրեանց պոռնկութեամբ իւրեանց եւ սպանութեամբք իշխանացն որ ի մէջ նոցա. 8 ի դնել ինձ զդրանդս իմ ի մէջ դրանդեաց նոցա, եւ զսեամս իմ առ սեամս նոցա. եւ արկին զպարիսպս նեղել՝՝ ընդ իս եւ ընդ նոսա, եւ պղծեցին զանուն իմ սուրբ անօրէնութեամբ իւրեանց զոր առնէին. եւ խորտակեցի զնոսա բարկութեամբ իմով եւ սպանմամբ՝՝։ 9 Գոնեայ արդ մերժեսցեն զպոռնկութիւնս իւրեանց, եւ զսպանութիւնս իշխանաց նոցա՝՝ յինէն, եւ բնակեցայց ի մէջ նոցա յաւիտեան։ 10 Եւ դու, որդի մարդոյ, ցոյց տանդ Իսրայելի զտաճարդ, եւ դադարեսցեն ի մեղաց իւրեանց, զտեսիլ դորա եւ զձեւ եւ զյօրինուած. 11 եւ նոքա ընկալցին զտանջանս իւրեանց վասն ամենայնի զոր արարին։ Եւ նկարեսցես զտունդ եւ զպատրաստութիւնդ իւր՝՝, եւ զել եւ զմուտ դորա եւ զկահ, եւ զամենայն հրամանս դորա եւ զամենայն օրէնս եւ զիրաւունս դորա ցուցցես նոցա, եւ գրեսցես առաջի նոցա. եւ պահեսցեն զամենայն իրաւունս եւ զհրամանս իմ՝՝, եւ արասցեն զնոսա։ 12 Եւ նկարագիր տանն ի վերայ գլխոյ լերինն, եւ ամենայն սահմանք նորա շուրջանակի, սրբութիւն սրբութեանց են. այս օրէն է տաճարին։ 13 Եւ այս չափ սեղանոյն. կանգուն մի ի կանգնոց, եւ կանգուն մի եւ ուղուկ գոգած խորութեան նորա՝՝. եւ կանգուն մի լայնութիւն, եւ պսակ շուրջ զծնօտիւք նորա շուրջանակի թզաւ մի. եւ այս բարձրութիւն սեղանոյն 14 ի խորութենէ սկզբան փորուածոյն մինչեւ ի մեծ քաւութիւնն, կանգունք երկուք ի ներքուստ՝՝, եւ ի լայնութիւն կանգուն մի. եւ ի փոքր քաւութենէն մինչեւ ի մեծ քաւութիւնն՝՝ կանգունք չորք, եւ ի լայնութիւն կանգուն մի. 15 եւ բունն ի չորից կանգնոց, եւ ի բնէն ի վեր ցեղջեւրսն՝ կանգուն մի։ 16 Եւ բունն յերկոտասան կանգնոյ՝՝ առ երկոտասան կանգուն ի լայնութիւն, չորեքկուսի ի չորեսին կողմանս իւր։ 17 Եւ քաւութիւնն չորեքտասան կանգուն յերկայնութիւն, եւ չորեքտասան կանգուն ի լայնութիւն, հասարակ ի չորեցունց կողմանց. եւ ծնօտքն պատուածոյք շուրջանակի պատեալ զնովաւ ի կէս կանգնոյ, եւ բոլորակն նորա՝՝ շուրջանակի կանգուն մի, եւ աստիճանքն նորա ընդ արեւելս։ 18 Եւ ասէ ցիս Տէր. Որդի մարդոյ, այսպէս ասէ Տէր Տէր. Այս հրամանք են սեղանոյն յաւուր գործուածոյ իւրոյ. մատուցանել ի վերայ նորա ողջակէզս, եւ հեղուլ առ նովաւ արիւն։ 19 Եւ տացես քահանայիցն Ղեւտացւոց որք ի զաւակէ Սադովկայ մերձեսցին առ իս, ասէ Տէր Տէր, պաշտել զիս, զուարակ մի յանդւոյ վասն մեղաց։ 20 Եւ առցեն յարենէ նորա, եւ դիցեն ի վերայ չորեցունց եղջերաց սեղանոյն, եւ ի վերայ չորեցունց անկեանց քաւութեանն, եւ շուրջ զյատակաւն, եւ ցանեսցեն եւ քաւեսցեն։ 21 Եւ առցեն՝՝ զզուարակն զվասն մեղացն, եւ այրեսցի ի զատեալ տեղւոջ տաճարին՝ արտաքոյ սրբութեանցն։ 22 Եւ յաւուրն երկրորդի առցեն նոխազս երկուս յայծեաց անարատից՝՝ վասն մեղաց, եւ քաւեսցեն զսեղանն՝ որպէս քաւեցին զուարակաւն։ 23 Եւ յետ վախճանելոյ զքաւութիւնն, մատուսցեն զուարակ յարջառոց անարատ, եւ խոյ ի հօտից անարատ։ 24 Եւ մատուսցեն առաջի Տեառն, եւ ցանեսցեն ի վերայ նոցա քահանայքն աղ, եւ հանցեն զնոսա յողջակէզս Տեառն։ 25 Զեւթն օր արասցեն նոխազ մի վասն մեղաց հանապազ, եւ զուարակ մի յարջառոց, եւ խոյ մի ի հօտից անարատ արասցեն։ 26 Զեւթն օր քաւեսցեն զսեղանն եւ սրբեսցեն զնա, եւ կատարեսցեն զձեռս իւրեանց։ 27 Եւ վախճանեսցեն զաւուրսն, եւ եղիցի յօրէն ութերորդէ եւ անդր՝ արասցեն քահանայքն ի վերայ սեղանոյն զողջակէզս ձեր, եւ զվասն փրկութեան ձերոյ՝՝, եւ ընկալայց զձեզ, ասէ Տէր Տէր։ |