ՄԱՐԳԱՐԷՈՒԹԻՒՆ ԵԶԵԿԻԵԼԻ 41 - Գրաբար Աստվածաշունչ (1895)1 Եւ տարաւ զիս ի տաճարն, զորոյ չափեաց զկամարն՝ վեց կանգուն զլայնութիւն ի միոջէ կողմանէ, եւ վեց կանգուն զերկայնութիւն կամարին ի միւսմէ կողմանէ՝՝։ 2 Եւ զլայնութիւն դրանն տասն կանգուն, եւ զխոյակս կոճոց՝՝ դրանն յայսկոյս յայնկոյս հինգ հինգ կանգուն. եւ չափեաց զերկայնութիւն նորա քառասուն կանգուն, եւ զլայնութիւն նորա քսան կանգուն։ 3 Եւ եմուտ ի ներքին սրահն, եւ չափեաց զկամար մտին երկուս կանգունս, եւ զմուտսն վեց կանգուն, եւ զխոյակս կոճոց մտիցն յայսկոյս յայնկոյս եւթն եւթն կանգուն։ 4 Եւ չափեաց զերկայնութիւն դրանն՝ քառասուն կանգուն, եւ զլայնութիւնն քսան կանգուն՝ առաջի տաճարին. եւ ասէ ցիս. Այս է սրբութիւն սրբութեանցն։ 5 Եւ չափեաց զորմ տաճարին ի վեց կանգնոյ, եւ զլայնութիւն կողման տանն ի չորից կանգնոց շուրջ շրջանակաւ։ 6 Եւ ի կողմանէ ի կողմն երեսուն եւ երիս կանգունս կրկին. եւ անջրպետ ի մէջ որմոց տաճարին շուրջանակի շուրջ զկողմամբքն. զի լինիցի այնոցիկ որք անկանիցին զնոքօք հայել, եւ ամենեւին մի՛ մերձենայցեն յորմ տաճարին։ 7 Եւ զլայնութիւն կողմանց վերին դրանն, ըստ առանցից կողմանց յորմոցն առ ի վերին կողմն շուրջ զտամբն. զի ընդարձակութիւն լինիցի տանն ի վերուստ եւ ի ներքուստ, որոց ելանիցենն ի վերնայարկսն, եւ ի միջնայարկացն յերրորդ յարկսն։ 8 Եւ ձեղուան տանն բարձրութիւն շուրջ շրջանակաւ զանջրպետօք կողմանցն՝ հաւասար ձողոյն ի վեց կանգնոյ անջրպետ մի։ 9 Եւ լայնութիւն որմոյ արտաքին կողմանն ի հինգ կանգնոյ։ 10 Եւ առանցք ի մէջ կողմանց տանն եւ ի մէջ պատշգամացն ի լայնութիւն քսան կանգուն, եւ շրջանակաւ շրջանակք տանն։ 11 Եւ դուրք պատշգամացն՝ յառանցս դրան միոյ որ ընդ հիւսիսի, եւ դուռն մի ընդ հարաւ. եւ լայնութիւն տեղւոյն ընդարձակութեան վասն լուսոյ առանցիցն՝ հինգ կանգուն ի լայնութիւն շուրջանակի։ 12 Եւ անջրպետ ընդդէմ առանցիցն ի ծովակողմ ճանապարհին՝ յերկայնութիւն եւթանասուն կանգուն, եւ լայնութիւն որմոյն անջրպետի հինգ կանգուն, եւ երկայնութիւն նորին իննսուն կանգուն։ 13 Եւ չափեաց առաջի տանն յերկայնութիւն հարեւր կանգուն. եւ խորշքն եւ անջրպետք եւ որմք նոցա՝ յերկայնութիւն հարեւր կանգուն։ 14 Եւ լայնութիւն առաջի տանն, եւ խորշքն յանդիման նորին՝ հարեւր կանգուն։ 15 Եւ չափեաց զերկայնութիւն անջրպետին ընդդէմ խորշիցն ի թիկանց տանն. եւ զխորշսն աստի եւ անտի հարեւր կանգուն յերկայնութիւն։ 16 Եւ տաճարն արտաքին եւ անկիւնքն եւ կամարքն եւ յարկքն եւ պատուհանքն վանդակապատքն, լուսանցոյցք շուրջ զերեքումբք վասն հայելոյ. եւ տունն, եւ որ զնովաւ յարկքն առ հասարակ շուրջ շրջանակաւ տախտակամած ի յատակացն մինչեւ ի պատուհանսն. եւ պատուհանք բացեալք երեքկին առ ի հայել, որպէս եւ ի ներքոյ կողմանն մինչեւ յարտաքինն։ 17 Եւ ի վերայ ամենայն տանն շուրջ շրջանակաւ, եւ ի վերայ ամենայն տանն շուրջանակի ներքոյ եւ արտաքոյ,՝՝ 18 քերովբ քանդակեալ եւ արմաւենիք. եւ արմաւենի մի ի մէջ քերովբէիցն, եւ երկու քերովբէքն հանդէպ միմեանց՝՝. 19 միոյ քերովբէին դէմքն մարդոյ՝ ի միոջէ կողմանէ արմաւենւոյն, եւ դէմք առիւծու՝ ի միւսմէ կողմանէ արմաւենւոյն. եւ այսպէս քանդակեալ էր ամենայն տաճարն շուրջանակի։ 20 Յատակաց մինչեւ ցյարկսն քերովբէք եւ արմաւենիք քանդակեալք։ 21 Եւ սրբութիւնն եւ տաճարն թռուցեալ եւ բացեալ չորեքկուսի։ 22 Եւ դէմ յանդիման սրբութեանցն տեսիլ՝ իբրեւ նմանութիւն փայտեղէն սեղանոյ՝՝, երեք կանգուն ի բարձրութիւն, եւ երկու կանգուն յերկայնութիւն, եւ երկու կանգուն ի լայնութիւն. եւ եղջեւրք ի նմա. եւ յատակքն նորա եւ որմք՝՝ փայտեղէնք. եւ ասէ ցիս. Այս է սեղան երեսաց Տեառն։ 23 Եւ երկու մուտք տաճարին. եւ երկու մուտք սրբութեանցն. 24 երկոցունց շրջանակաւ մտիցն՝ երկու մուտք միոյ, եւ երկու մուտք միւսոյ դրանն. 25 եւ քանդակագործք ի վերայ նոցա, եւ ի վերայ մտից տաճարին քերովբէք եւ արմաւենիք քանդակեալք ըստ քանդակի սրբութեանցն. եւ փայտակերտ ազնիւ դէմ յանդիման կամարին արտաքուստ կողմանէ. եւ պատուհանք ծածուկք։ 26 Եւ չափեաց յայսկոյս յայնկոյս զյարկս կամարին, եւ զկողմանս տանն խառնեալ ընդ միմեանս։՝՝ |