ԵԼՔ 39 - Գրաբար Աստվածաշունչ (1895)1 Եւ արար պատմուճանս պաշտամանն, պաշտել նոքօք ի սրբութեանն. եւ արար պատմուճանս սրբութեանցն որ իցեն Ահարոնի քահանայի, որպէս հրամայեաց Տէր Մովսիսի։ 2 Եւ արարին զվակասն յոսկւոյ եւ ի կապուտակէ եւ ի ծիրանւոյ եւ ի կարմրոյ մանելոյ եւ ի բեհեզոյ նիւթելոյ։ 3 Եւ հատանէին զթիթղունս ոսկւոյն թելս թելս՝ անկանել ընդ կապուտակին եւ ընդ ծիրանւոյն եւ ընդ կարմրոյ մանելոյ եւ ընդ բեհեզոյ նիւթելոյ։ 4 Գործ անկուածոյ վակասի գործեցին զնա՝՝, խառնեալ յերկոցունց կողմանց ընդ միմեանս հիւսկէն. գործ անկուածոյ ի միմեանս ի նոյն՝՝։ 5 Եւ ի նմանէ գործեցին ըստ իւրում գործուածոյ, յոսկւոյ եւ ի կապուտակէ եւ ի ծիրանւոյ եւ ի կարմրոյ մանելոյ եւ ի բեհեզոյ նիւթելոյ. որպէս եւ հրամայեաց Տէր Մովսիսի։ 6 Եւ գործեաց զերկոսին ականսն զըմրուխտս՝ ժապաւինեալս եւ՝՝ ընդելուզեալս ոսկւով, քանդակեալս եւ մածուցեալս՝՝ ի քանդակ կնքոյ, յանուանց որդւոցն Իսրայելի։ 7 Եւ հաստատեաց զնոսա ի վերայ ուսոց վակասին, ականս յիշատակի որդւոցն Իսրայելի, որպէս եւ հրամայեաց Տէր Մովսիսի։ 8 Եւ արար զտախտակն գործ անկուածոյ նկարակերպ՝՝ ըստ գործոյ վակասին, յոսկւոյ եւ ի կապուտակէ եւ ի ծիրանւոյ եւ ի կարմրոյ մանելոյ եւ ի բեհեզոյ նիւթելոյ։ 9 Չորեքկուսի եւ կրկին գործեաց զտախտակն. թզաւ յերկայնութիւն եւ թզաւ ի լայնութիւն։ 10 Եւ անկանէր ընդ նմին անկուած ականակապ չորեքկարգեան ականց. կարգն առաջին՝ սարդիոն եւ տպազիոն եւ զըմրուխտ, կարգ մի։ 11 Եւ կարգն երկրորդ՝ կարկեհան եւ շափիղա եւ յասպիս։ 12 Եւ կարգն երրորդ՝ սուտակ եւ գոճազմ եւ ակատ։ 13 Եւ կարգն չորրորդ՝ ոսկեակն եւ եղունգն եւ բիւրեղ. պատեալ եւ ընդելուզեալ ոսկւով։ 14 Եւ ականքն ըստ անուանց որդւոցն Իսրայելի էին. երկոտասանք յանուանց նոցա գրեալք եւ քանդակեալք, ըստ իւրաքանչիւր անուանց ազգացն երկոտասանից։ 15 Եւ արարին ընդ տախտակաւն վերջս փողփողեալս ի վերայ երկուց օղոցն, գործ հիւսկէն յոսկւոյ սրբոյ։ 16 Եւ արարին երկուս վահանակս ոսկիս եւ երկուս օղս ոսկիս. եւ եդին զերկուս օղսն ոսկիս յերկոսին առաջս տախտակին։ 17 Եւ եդին զվերջսն փողփողեալս ի վերայ երկուց օղոցն յերկոսին կողմանս տախտակին։ 18 Եւ յերկոսին խառնուածսն զերկուս վերջսն փողփողեալս եդին ի վերայ երկուց վահանակացն. եւ զնոսա եդին ի վերայ ուսոց վակասին դէմ յանդիման յերեսաց կողմանէ։ 19 Եւ արարին երկուս օղս ոսկիս, եւ եդին ի վերայ երկոցունց թեւոցն ի ծայրս տախտակին, ի գլուխ թիկանց վակասին ի ներքոյ կողմանէ։ 20 Եւ արարին երկուս օղս ոսկիս, եւ եդին ի վերայ երկոցունց ուսոց վակասին ի ներքոյ կողմանէ յերեսաց նորա՝ ըստ վերնոյ խառնուածոյ անկուածոյ վակասին։ 21 Եւ պնդեցին զտախտակն յօղից նորա մինչեւ ցօղս վակասին, խառնեալ ընդ միմեանս ի կապուտակէ, հիւսեալս ընդ միմեանս յանկուած՝՝ վակասին, զի մի՛ զերծանիցի տախտակն ի վակասէ անտի, որպէս հրամայեաց Տէր Մովսիսի։ 22 Եւ արարին զվտաւակսն ի վերայ վակասին՝՝, գործ անկուածոյ համակ կապուտակ։ 23 Եւ օձիք վտաւակացն անդէն ի նորին ի միջի անկուածոյ հիւսկէն՝ գրապանաւ օձիքն շուրջանակի անքակ՝՝։ 24 Եւ արարին առ ստորոտով վտաւակացն իբրեւ ծաղկեալս նռնաձեւս ի կապուտակէ եւ ծիրանւոյ եւ ի կարմրոյ մանելոյ եւ ի բեհեզոյ նիւթելոյ։ 25 Եւ արարին զանգակս յոսկւոյ սրբոյ, եւ եդին զզանգակսն ի մէջ նռնաձեւացն առ ստորոտով վտաւակացն շուրջանակի։ 26 Ի մէջ նռնաձեւացն զանգակս ոսկիս եւ նռնաձեւ, զանգակ եւ նռնաձեւ՝ առ ստորոտով վտաւակացն շուրջանակի ի սպաս պաշտամանն, որպէս հրամայեաց Տէր Մովսիսի։ 27 Եւ արարին պատմուճանս բեհեզեղէնս գործ անկուածոյ՝ Ահարոնի եւ որդւոց նորա։ 28 Եւ զապարօշսն ի բեհեզոյ, եւ զխոյրն ի բեհեզոյ, եւ զանդրավարտիսն տաբատ ի նիւթոյ բեհեզոյ՝՝։ 29 Եւ զկամարս նոցա՝՝ ի բեհեզոյ նիւթելոյ եւ ի կապուտակէ եւ ի ծիրանւոյ եւ ի կարմրոյ մանելոյ, գործ նկարու, զոր օրինակ հրամայեաց Տէր Մովսիսի։ 30 Եւ արարին զթիթեղն ոսկի նուէր՝՝ սրբութեանն յոսկւոյ սրբոյ. եւ գրեցին ի նմա գիր դրոշմեալ քանդակի, ՍՐԲՈՒԹԻՒՆ ՏԵԱՌՆ։ 31 Եւ եդին առ կապուտակեայ ժապաւինեաւն՝՝, զի կայցէ ի խուրին ի վերոյ կողմանէ, զոր օրինակ հրամայեաց Տէր Մովսիսի։ 32 Եւ կատարեցաւ ամենայն գործ խորանին յարկի վկայութեան. եւ արարին որդիքն Իսրայելի ըստ ամենայնի որպէս եւ հրամայեաց Տէր Մովսիսի. նոյնպէս եւ արարին։ Եւ զաւելորդ զոսկի նուիրացն՝ արարին կահ պաշտելոյ նոքօք առաջի Տեառն։՝՝ 33 Եւ բերին զպատմուճանսն ի խորանն՝՝ առ Մովսէս, զյարկն եւ զամենայն զկահ նորա, եւ զառանցսն եւ զտախտակս նորա, եւ զպարզունակս նորա, եւ զսիւնակս նորա, եւ զխարիսխս նորուն, 34 եւ զմաշկսն, եւ զմորթս խոյոցն ներկեալս կարմրով, եւ զվիժակսն կապուտակեայս՝՝, եւ զսրահակն որ ծածկէր, 35 զտապանակ կտակարանացն, եւ զլծակսն, եւ զքաւութիւնն, 36 զսեղանն զառաջաւոր եւ զամենայն զկահ նորա, եւ զհացն երեսաց, 37 եւ զաշտանակն սուրբ եւ զճրագարանս նորա եւ զճրագունսն այրելոյ, եւ զամենայն զկահ նորա, եւ զեւղն լուսոյ, 38 եւ զսեղանն ոսկի, եւ զեւղն օծութեան, եւ զխունկսն հանդերձանաց, եւ զսրահակս դրանն, եւ զխորանն՝՝, 39 եւ զսեղանն պղնձի եւ զլծակս նորա, եւ զամենայն զկահ նորա, եւ զաւազանն եւ զխարիսխս նորա, 40 եւ զառագաստ սրահին՝՝ եւ զսիւնս նորա եւ զխարիսխս նորա, եւ զվարագոյր դրան խորանին եւ զդրան սրահին՝՝, եւ զապաւանդակս նորա եւ զցիցս նորա, եւ զամենայն զկահ խորանին յարկի վկայութեանն, 41 եւ զպատմուճանսն պաշտաման պաշտել ի սրբութեանն, եւ զպատմուճանսն սրբութեանն որ իցեն Ահարոնի քահանայի, եւ զպատմուճանս որդւոց նորա ի քահանայութիւն։ 42 Ըստ ամենայնի զոր միանգամ պատուիրեաց Տէր Մովսիսի՝ նոյնպէս եւ արարին որդիքն Իսրայելի զամենայն կազմածն։ 43 Եւ ետես Մովսէս զամենայն գործն, եւ էր գործեալ ըստ օրինակին որպէս հրամայեաց Տէր Մովսիսի. նոյնպէս եւ արարին. եւ օրհնեաց զնոսա Մովսէս։ |