ԵԼՔ 28 - Գրաբար Աստվածաշունչ (1895)1 Եւ դու մատուսցես առ քեզ զԱհարոն զեղբայր քո, եւ զորդիս նորա ընդ նմա՝ յորդւոցն Իսրայելի, քահանայանալ ինձ. զԱհարոն եւ զՆաբադ եւ զԱբիուդ եւ զԵղիազար եւ զԻթամար զորդիս Ահարոնի։ 2 Եւ արասցես պատմուճան սուրբ Ահարոնի եղբօր քում ի պատիւ եւ ի փառս։ 3 Եւ դու խօսեսցիս ընդ ամենայն իմաստունս մտօք, զորս լցուցից հոգւով իմաստութեան, եւ արասցեն պատմուճան սուրբ Ահարոնի ի սրբութիւն, որովք քահանայանայցէ ինձ։ 4 Եւ այս օրինակ պատմուճանացն՝՝ զոր առնիցեն. զպճղնաւորն եւ զվակաս զուսովք եւ զլանջօք, եւ զպատմուճանն բեհեզեայ՝՝ եւ խոյր եւ կամար. եւ արասցեն պատմուճան սուրբ Ահարոնի եղբօր քում եւ որդւոց նորա՝ քահանայանալ ինձ։ 5 Եւ առցեն նոքա ոսկի եւ կապուտակ եւ ծիրանի եւ կարմիր մանեալ եւ բեհեզ։ 6 Եւ արասցեն զվակասն յոսկւոյ սրբոյ եւ ի կապուտակէ եւ ի ծիրանւոյ եւ ի կարմրոյ մանելոյ եւ ի բեհեզոյ նիւթելոյ, գործ ոստայնի նկարակերպ՝՝։ 7 Երկու վակասք ընդ միմեանս խառնեալք, եւ եղիցին ի վերայ երկոցունց կողմանց նորա հաստատեալք։ 8 Եւ գործ վակասին որ իցէ ի վերայ նորա, ըստ նմին օրինակի գործ անդստին ի նմանէ լինիցի, յոսկւոյ սրբոյ եւ ի կապուտակէ եւ ի ծիրանւոյ եւ ի կարմրոյ մանելոյ եւ ի բեհեզոյ նիւթելոյ։ 9 Եւ առցես երկուս ականս զըմրուխտս, եւ գրեսցես ի նոսա զանուանս որդւոցն Իսրայելի։ 10 Զվեց անուն նոցա ի միում ական, եւ զայլն եւս վեց՝ յերկրորդում ականն, ըստ ազգս իւրեանց։ 11 Գործ ճարտարութեան ակնագործաց, քանդակ կնքոյ քանդակեսցես զերկոսին ականսն՝ ըստ անուանց որդւոցն Իսրայելի. տպաւորեալս եւ քանդակեալս ոսկւով՝՝ արասցես զնոսա։ 12 Եւ դիցես զերկուս ականսն ի վերայ ուսոց վակասին, զի լինիցին ականքն յիշատակ որդւոցն Իսրայելի. եւ բառնայցէ Ահարոն զանուանս որդւոցն Իսրայելի առաջի Տեառն ի վերայ երկուց ուսոց իւրոց ի յիշատակ վասն նոցա։ 13 Եւ արասցես վահանակս յոսկւոյ սրբոյ։ 14 Եւ արասցես երկուս վերջս յոսկւոյ սրբոյ, մանուածոյս ծաղկեալս՝ գործ հիւսկէն, եւ դիցես զվերջսն մանուածոյս ի վերայ երկոցուն վահանակացն առ վտաւակօքն նոցա առաջոյ կողմանէ՝՝։ 15 Եւ արասցես զտախտակն դատաստանաց գործ նկարակերպ. ըստ ձեւոյ՝՝ վակասին արասցես զնա, յոսկւոյ եւ ի կապուտակէ եւ ի ծիրանւոյ եւ ի կարմրոյ մանելոյ եւ ի բեհեզոյ նիւթելոյ։ 16 Եւ արասցես զնա չորեքանկիւնի՝՝, թզաւ յերկայնութիւն եւ թզաւ ի լայնութիւն։ 17 Եւ ընդելուզցես ի նմա ընդելուզածս, ըստ չորեքկարգեան ականց. կարգ ականցն, առաջին՝ զըմրուխտ եւ սարդիոն եւ տպազիոն, կարգ մի։ 18 Եւ կարգն երկրորդ՝ կարկեհան եւ շափիղա եւ յասպիս։ 19 Եւ կարգն երրորդ՝ գոճազմ եւ ակատ եւ սուտակ։ 20 Եւ կարգն չորրորդ՝ յակինթ եւ բիւրեղ եւ եղունգն, ընդելուզեալ, յոսկի կապեալ՝ յիւրաքանչիւր կարգս կայցեն՝՝։ 21 Եւ եղիցին ականքն յանուանց որդւոցն Իսրայելի երկոտասան, ըստ անուանց նոցա գրեալք քանդակաւ՝ իւրաքանչիւր ըստ անուան իւրում լիցին, ըստ ազգացն երկոտասանից։ 22 Եւ արասցես տախտակ մի հիւսկէն վերջիւք, գործ շղթայագործ՝՝ յոսկւոյ սրբոյ։ 23 Եւ արասցես ի վերայ տախտակին երկուս օղս ոսկիս, եւ դիցես զերկուս օղսն ոսկիս ի վերայ երկուց ծայրից տախտակին։ 24 Եւ դիցես զերկուս շղթայագործսն ոսկիս ի վերայ երկոցուն օղոցն առ ծայրիւք տախտակին։ 25 Եւ զերկուս ծայրս երկուց շղթայագործիցն տացես ի վերայ երկոցունց մած. եւ դիցես ի վերայ թիկանց վակասին ի ճակատ երեսաց նորա։ 26 Եւ արասցես երկուս օղս ոսկիս, եւ տացես զնոսա ի վերայ երկուց ծայրից տախտակին, առ եզերբն՝ որ իցէ հանդէպ վակասին ի ներքոյ կողմանէ։ 27 Եւ արասցես երկուս օղս ոսկիս, եւ տացես զնոսա ի վերայ երկուց ուսոց վակասին ի ներքոյ կողմանէ՝ յանդիման միմեանց միաբան. եւ զաղխս նորա ի վերայ մենքենայից՝՝ վակասին։ 28 Եւ պինդ ունիցին զտախտակն յօղոց նորա մինչեւ ցօղս վակասին, ի նիւթոյ կապուտակէ. զի իցէ ի վերայ մենքենայից վակասին, եւ մի՛ զերծանիցի տախտակն ի վակասէ անտի։ 29 Եւ առցէ Ահարոն զանուն որդւոցն Իսրայելի ի վերայ տախտակի դատաստանին ի լանջս իւր, ի մտանել իւրում ի սրբութիւնն ի յիշատակ հանապազորդ առաջի Աստուծոյ։ 30 Եւ դիցես ի վերայ տախտակի դատաստանին զվերջսն շղթայագործս, յերկոցունց կողմանց տախտակին դիցես. եւ զերկուս վահանակսն դիցես ի վերայ երկուց ուսոց վակասին յերեսաց կողմանէ ի ներքուստ։՝՝ Եւ դիցես ի վերայ տախտակի դատաստանին զՅանդիմանութիւն եւ զՃշմարտութիւն՝՝. եւ եղիցի ի վերայ լանջացն Ահարոնի յորժամ մտանիցէ ի սրբութիւնն առաջի Տեառն. եւ տարցի Ահարոն զդատաստանս որդւոցն Իսրայելի ի վերայ լանջաց իւրոց առաջի Տեառն հանապազ։ 31 Եւ արասցես վտաւակս պճղնաւորս՝՝ համակ կապուտակ։ 32 Եւ զօձիսն գրապանաւ արարեալ, բոլորակ ձեւեսցես շուրջանակի՝ գործ անկուածոյ, եւ զխառնուածսն անկեալ անդստին ի նմանէ. զի մի՛ արատիցի՝՝։ 33 Եւ արասցես առ ստորոտով վտաւակացն ի ներքոյ կողմանէ՝ իբրեւ նռնաձեւս ծաղկեալս՝՝, ի կապուտակէ եւ ի ծիրանւոյ եւ ի կարմրոյ մանելոյ եւ ի բեհեզոյ նիւթելոյ՝՝, առ ստորոտով վտաւակացն շուրջանակի, եւ տեսիլ նորա նռնաձեւ՝՝, եւ զանգակս ոսկիս ի մէջ նոցա շուրջանակի։ 34 Զանգակ ոսկի եւ նռնաձեւ՝ ծաղկեալ առ ստորով վտաւակացն՝՝ շուրջանակի։ 35 Եւ եղիցի ի վերայ Ահարոնի, յորժամ պաշտիցէ, հնչիւն բարբառոյ ի մտանել իւրում ի սրբութիւնն առաջի Տեառն եւ յելանել նորա, զի մի՛ մեռանիցի։ 36 Եւ արասցես թիթեղն յոսկւոյ սրբոյ, եւ քանդակեսցես ի նմա քանդակ կնքոյ՝ ՍՐԲՈՒԹԻՒՆ ՏԵԱՌՆ։ 37 Եւ դիցես զնա ի վերայ կապուտակին մանելոյ՝՝։ 38 Եւ եղիցի խուրին յերեսաց կողմանէ՝՝ ի վերայ ճակատուն Ահարոնի, եւ բարձցէ Ահարոն զմեղս նուիրացն, որչափ ինչ նուիրիցեն որդիքն Իսրայելի, ըստ ամենայն տրոց սրբութեանցն իւրեանց. եւ եղիցի ի վերայ ճակատուն Ահարոնի հանապազ յընդունելութիւն նոցա առաջի Տեառն։ 39 Եւ զպճղնաւոր պատմուճանն՝՝ ի բեհեզոյ, եւ արասցես ապարօշ բեհեզեղէնս, եւ կամար՝ գործ նկարակերպ։ 40 Եւ որդւոցն Ահարոնի արասցես պատմուճանս եւ կամարս եւ խոյրս՝՝, ի պատիւ եւ ի փառս։ 41 Եւ զգեցուսցես զայն Ահարոնի եղբօր քում, եւ որդւոց նորա ընդ նմա, եւ օծցես զնոսա, եւ լցցես զձեռս՝՝ նոցա, եւ սրբեսցես զնոսա զի քահանայասցին ինձ։ 42 Եւ արասցես նոցա անդրավարտիս կտաւիս, ծածկել զառականս մարմնոյ իւրեանց, միջովք չափ եւ բարձիւք չափ։ 43 Եւ ունիցի զայն Ահարոն եւ որդիք նորա, յորժամ մտանիցեն ի խորանն վկայութեան, կամ յորժամ մերձենայցեն ի սեղանն սրբութեան պաշտել, եւ մի՛ ածիցեն ի վերայ իւրեանց մեղս, զի մի՛ մեռանիցին. օրէն յաւիտենական նմա եւ զաւակի իւրում յետ նորա։ |