ԱՌ ԵՓԵՍԱՑԻՍ ԹՈՒՂԹ 3 - Գրաբար Աստվածաշունչ (1895)

¹ Վասն այսորիկ ես Պաւղոս, կապեալ Յիսուսի Քրիստոսի վասն ձեր հեթանոսաց.

² թերեւս լուեալ իցէ ձեր զտնտեսութիւն շնորհացն Աստուծոյ, որ տուեալ են ինձ ի ձեզ,

³ զի ըստ յայտնութեան ցուցաւ ինձ խորհուրդն, որպէս յառաջագոյն գրեցի առ ձեզ սակաւուք.

⁴ առ ի կարող լինելոյ ընթեռնուլ եւ ի միտ առնուլ զիմաստութիւնն զիմ ի խորհրդեանն Քրիստոսի.

⁵ զի այլոց ազգաց ոչ ցուցաւ որդւոց մարդկան, որպէս այժմ յայտնեցաւ սրբոց իւրոց առաքելոց եւ մարգարէից Հոգւովն.

⁶ լինել հեթանոսաց ժառանգակիցս եւ մարմնակիցս, եւ հաղորդս աւետեացն ի Քրիստոս Յիսուս աւետարանաւն,

⁷ որոյ եղէ ես Պաւղոս սպասաւոր ըստ պարգեւաց շնորհացն Աստուծոյ որ տուան ինձ ըստ յաջողութեան զօրութեան նորա,

⁸ (ինձ՝ որ տրուպս եմ ամենայն սրբոց, տուան շնորհքս այս,) ի հեթանոսս աւետարանել զանքնին մեծութիւնն Քրիստոսի,

⁹ եւ լուսաւոր առնել զամենեսին, թէ զինչ է տնտեսութիւն խորհրդոյն որ ծածկեալ էր յամենայն յաւիտեանց առ Աստուծոյ որ զամենայն ինչ արար.

¹⁰ զի յայտնեսցի արդ իշխանութեանց եւ պետութեանց որ յերկինս են՝ ի ձեռն եկեղեցւոյ բազմապատիկ իմաստութիւնն Աստուծոյ։

¹¹ Ըստ յառաջադրութեան յաւիտեանցն զոր արար ի ձեռն Տեառն մերոյ Յիսուսի Քրիստոսի.

¹² որով ունիմք զհամարձակութիւն եւ զնուաճութիւն յուսով ի ձեռն հաւատոց նորա։

¹³ Վասն որոյ աղաչեմ, մի՛ ձանձրանալ ի նեղութեանս մերում որ վասն ձեր է, որ է փառք մեր։

¹⁴ Վասն այսորիկ դնեմ ծունր առ Հայր Տեառն մերոյ Յիսուսի Քրիստոսի,

¹⁵ ուստի ամենայն նահապետութիւն յերկինս եւ յերկրի անուանի,

¹⁶ զի տացէ ձեզ ըստ մեծութեան փառաց իւրոց, հաստատել զօրութեամբ ի ձեռն Հոգւոյն իւրոյ ի ներքին մարդն.

¹⁷ բնակել Քրիստոսի հաւատովք ի սիրտս ձեր, սիրով արմատացեալք եւ հաստատեալք։

¹⁸ Զի կարող լինիջիք հասանել ընդ ամենայն սուրբս, զինչ է լայնութիւն եւ երկայնութիւն եւ բարձրութիւն եւ խորութիւն.

¹⁹ ճանաչել զառաւելութիւն գիտութեան սիրոյն Քրիստոսի, զի լցջիք ամենայն լրութեամբն Աստուծոյ։

²⁰ Այլ այնմ որ կարողն է առաւել քան զամենայն ինչ առնել յաճախութեամբ քան զոր խնդրեմքն եւ իմանամք, ըստ զօրութեանն որ յաջողեալն է ի մեզ,

²¹ նմա փառք յեկեղեցւոջն եւ ի Քրիստոս Յիսուս յամենայն ազգս յաւիտենից յաւիտեանս։ Ամէն։