ԵՐԿՐՈՐԴՈՒՄՆ ՕՐԻՆԱՑ 29 - Գրաբար Աստվածաշունչ (1895)1 Այս բանք են ուխտին զոր պատուիրեաց Տէր Մովսիսի, հաստատել որդւոցն Իսրայելի յերկրին Մովաբու, թող զայն ուխտ զոր ուխտեաց նոցա ի Քորեբ։ 2 Եւ կոչեաց Մովսէս զամենայն որդիսն Իսրայելի եւ ասէ ցնոսա. Դուք ձեզէն տեսէք զամենայն ինչ զոր արար Տէր յԵգիպտոս առաջի ձեր, ընդ փարաւոն եւ ընդ ծառայս նորա, եւ ընդ ամենայն երկիր նորա. 3 զփորձանսն մեծամեծս զոր տեսին աչք ձեր, զնշանսն եւ զարուեստս մեծամեծս զայնոսիկ, զձեռն հզօր եւ զբազուկ բարձր.՝՝ 4 եւ ոչ ետ ձեզ Տէր Աստուած ձեր՝՝ սիրտ գիտելոյ եւ աչս տեսանելոյ եւ ականջս լսելոյ մինչեւ ցայսօր։ 5 Եւ ած զձեզ զքառասուն ամ ընդ անապատն. ոչ հնացան ձորձք ձեր եւ ոչ մաշեցան կօշիկք յոտից ձերոց. 6 հաց ոչ կերայք եւ գինի եւ ցքի ոչ արբէք, զի ծանիջիք թէ ես եմ Տէր Աստուած ձեր։ 7 Եւ եկիք մինչեւ ի տեղիս այս, եւ ել Սեհոն թագաւոր Եսեբոնայ, եւ Ովգ թագաւոր Բասանու ընդդէմ մեր պատերազմաւ. 8 եւ հարաք զնոսա եւ առաք զերկիր նոցա, եւ ետու զնա ի ժառանգութիւն Ռուբենի եւ Գադայ եւ կիսոյ ցեղին Մանասէի։ 9 Եւ զգուշասջիք առնել զամենայն բանս ուխտիս այսորիկ, զի իմանայցէք զամենայն՝՝ զոր առնիցէք։ 10 Դուք կայք աւադիկ այսօր ամենեքեան առաջի Տեառն Աստուծոյ ձերոյ, ցեղապետք ձեր եւ ծերակոյտ ձեր եւ դատաւորք ձեր եւ ատենադպիրք ձեր, եւ ամենայն այր Իսրայելի, 11 եւ կանայք ձեր եւ որդիք ձեր, եւ եկն որ ի միջի բանակին ձերում, ի փայտակոտորէ ձերմէ մինչեւ ցջրբեր ձեր. 12 յանցանել քո զուխտիւ Տեառն Աստուծոյ քո, եւ զնզովիւք նորա զոր Տէր Աստուած քո ուխտէ քեզ այսօր, 13 զի կացուսցէ զքեզ իւր ժողովուրդ, եւ նա եղիցի քեզ Աստուած որպէս եւ ասաց, եւ զոր օրինակ երդուաւ հարցն քոց Աբրահամու եւ Իսահակայ եւ Յակոբայ։ 14 Եւ ոչ ձեզ միայն ուխտեմ ես զուխտս զայս եւ զնզովս զայսոսիկ՝՝, 15 այլ ե՛ւ որոց աստ ընդ մեզ իցեն այսօր առաջի Տեառն Աստուծոյ մերոյ, ե՛ւ որոց չիցեն ընդ մեզ այսօր. 16 զի դուք ինքնին գիտէք, ո՛րպէս բնակեցաք յերկրին Եգիպտացւոց, եւ ո՛րպէս անցաք ընդ մէջ ազգացն ընդ որս անցէք դուք. 17 եւ տեսէք զգարշելիս նոցա եւ զկուռս իւրեանց, զփայտն եւ զքար, զարծաթն եւ զոսկի որ է առ նոսա։ 18 Մի՛ ոք իցէ ի ձէնջ այր կամ կին, կամ ազգ կամ ցեղ որոյ միտք իւր խոտորեալ իցեն ի Տեառնէ Աստուծոյ մերմէ, երթալ պաշտել զդիս ազգացն այնոցիկ, մի՛ ոք իցէ ի ձէնջ՝՝ արմատ ի վեր բուսեալ դառնութեան եւ դաժանութեան. 19 եւ եղիցի եթէ լուիցէ զպատգամս նզովիցս այսոցիկ, եւ խոկասցի ի սրտի իւրում եւ ասիցէ. Քաւութիւնք եղիցին՝՝ ինձ, եթէ ես ըստ մոլորութեան սրտի իմոյ գնայցեմ. զի մի՛ կորուսանիցէ մեղաւորն զանմեղն՝՝. 20 եւ ոչ հաճեսցի Աստուած ներել նմա. այլ յայնժամ բորբոքեսցի բարկութիւն նորա եւ նախանձ նորա ի մարդն յայն, եւ հասցեն նմա ամենայն նզովք ուխտիս այսորիկ՝ գրեալք ի գրի օրինացս այսոցիկ, եւ ջնջեսցէ Տէր զանուն նորա ի ներքոյ երկնից. 21 եւ զատուսցէ զնա Տէր ի չարիս յամենայն որդւոցն Իսրայելի, ըստ ամենայն նզովից ուխտիս գրելոյ ի գիրս օրինացս այսոցիկ. 22 եւ ասիցեն ազգքն մեւս եւ՝՝ որդիքն ձեր որ յարիցեն յետ ձեր, եւ օտարոտին որ գայցէ յերկրէ հեռաստանէ, տեսանիցեն զհարուածս երկրին այնորիկ եւ զախտս նոցա զոր առաքեաց Տէր ի վերայ նորա, 23 զծծումբն եւ զաղն այրեցեալ. յամենայն ի հող նորա մի՛ սերմանեսցի եւ մի՛ բուսցի, եւ մի՛ ելցէ ի վերայ նորա ամենայն դեղ դալար, որպէս կործանեցան Սոդոմ եւ Գոմոր, Ադամա եւ Սեբոյիմ, զորս կործանեաց Տէր սրտմտութեամբ եւ բարկութեամբ։ 24 Եւ ասասցեն ամենայն ազգքն. Ընդէ՞ր արար Տէր այնպէս երկրին այնմիկ, զի՞նչ իցէ սրտմտութիւն մեծ բարկութեանն այնորիկ։ 25 Պատասխանի տացեն եւ ասասցեն. Զի թողին զուխտն Աստուծոյ հարց իւրեանց, զոր ուխտեաց հարցն նոցա յորժամ եհան զնոսա յերկրէն Եգիպտացւոց, 26 եւ գնացեալ պաշտեցին զաստուածս օտարս, եւ երկիր պագին նոցա զոր ոչն ճանաչէին, եւ ոչ բաժանեաց նոցա։ 27 Եւ բարկացաւ Տէր սրտմտութեամբ ի վերայ երկրին այնորիկ, ածել ի վերայ նորա ըստ ամենայն նզովից ուխտիս գրելոյ ի մատենի օրինացս այսոցիկ՝՝. 28 եւ եբարձ զնոսա Տէր յերկրէ իւրեանց բարկութեամբ եւ սրտմտութեամբ եւ զայրացմամբ մեծաւ յոյժ, եւ մերժեաց զնոսա յերկիր օտար մինչեւ ցայժմ։ 29 Ծածուկքն Տեառն Աստուծոյ մերում, եւ յայտնիքն մեզ եւ որդւոց մերոց յաւիտեան, առնել զամենայն պատգամս օրինացս այսոցիկ։ |