ԵՐԿՐՈՐԴՈՒՄՆ ՕՐԻՆԱՑ 1 - Գրաբար Աստվածաշունչ (1895)1 Այս են պատգամք զոր խօսեցաւ Մովսէս ընդ ամենայն Իսրայելի յայնկոյս Յորդանանու յանապատին յարեւմուտս՝ մերձ ի ծովն Կարմիր, ի մէջ Փառանտիփողայ, եւ Ղոբանայ, եւ Հանգրուանացն եւ Ոսկեկայ՝՝։ 2 (Մետասանօրեայ ճանապարհ ի Քորեբայ ցլեառն Սէիր՝՝ մինչեւ ցԿադեսբառնեայ)։ 3 Եւ եղեւ ի քառասներորդում ամի, յամսեանն մետասաներորդում, որ օր մի էր ամսոյն, խօսեցաւ Մովսէս ընդ ամենայն որդիսն Իսրայելի, ըստ ամենայնի որպէս պատուիրեաց նմա Տէր առ նոսա, 4 յետ հարկանելոյ զՍեհոն արքայ Ամովրհացւոց զբնակեալն յԵսեբոն, եւ զՈվգ արքայ Բասանու զբնակեալն յԱստարովթ եւ յԵդրային. 5 յայնկոյս Յորդանանու յերկրին Մովաբու սկսաւ Մովսէս մեկնել զօրէնս զայսոսիկ եւ ասէ. 6 Տէր Աստուած մեր խօսեցաւ ընդ մեզ ի Քորեբ եւ ասէ. Շատ լիցի ձեզ բնակելդ ի լերինս յայսմ. 7 դարձարուք եւ չուեցէք դուք աստի, եւ մտանիցէք ի լեառնն Ամովրհացւոց, եւ առ ամենեսին որ շուրջ բնակեալ իցեն զԱրաբացւովք ի լերինս եւ ի դաշտս՝՝ ընդ հարաւ եւ ընդ ծովեզրն Քանանացւոց, եւ յաներն Լիբանանու՝՝ մինչեւ ցգետն մեծ ցգետն Եփրատ։ 8 Տեսէք զի ահա մատնեցի առաջի ձեր զերկիրն, մտէք ժառանգեցէք զերկիրն զոր երդուայ ես հարցն ձերոց, Աբրահամու եւ Իսահակայ եւ Յակոբայ, տալ նոցա եւ զաւակի նոցա յետ նոցա զերկիրն որ բղխէ զկաթն եւ զմեղր՝՝։ 9 Եւ խօսեցայ ընդ ձեզ ի ժամանակին յայնմիկ եւ ասեմ. Ոչ կարեմ միայն հանդարտել ձեզ. 10 Տէր Աստուած մեր բազմացոյց զձեզ, եւ ահաւադիկ էք դուք այսօր իբրեւ զաստեղս երկնից բազմութեամբ։ 11 Տէր Աստուած հարցն մերոց յաւելցէ ի ձեզ եւս քան որչափ էքդ հազարապատիկ, եւ օրհնեսցէ զձեզ որպէս եւ խօսեցաւ ընդ ձեզ։ 12 Եւ զիա՞րդ կարիցեմ միայն կրել զաշխատութիւն ձեր եւ զաղխս ձեր եւ զհակառակութիւնս ձեր։ 13 Արդ տուք ի ձէնջ արս իմաստունս եւ խորհրդականս եւ հանճարեղս ի վերայ՝՝ ցեղից ձերոց, եւ կացուցից ի վերայ ձեր իշխանս ձեզ։ 14 Եւ պատասխանի տուեալ ասացէք ցիս. Բարւոք է բանդ զոր խօսեցար առնել։ 15 Եւ առի ի ձէնջ զցեղապետսն, արս իմաստունս եւ հանճարեղս եւ խորհրդականս, եւ կացուցի զնոսա ի վերայ ձեր առաջնորդս. հազարապետս եւ հարիւրապետս եւ յիսնապետս եւ տասնապետս եւ ատենադպիրս դատաւորացն ձերոց։ 16 Եւ պատուիրեցի դատաւորացն ձերոց ի ժամանակին յայնմիկ եւ ասեմ. Լուարուք ատենի ի մէջ եղբարց ձերոց, եւ դատեցարուք արդարութեամբ ի մէջ առն եւ եղբօր իւրոյ, եւ ի մէջ եկին իւրոյ. 17 եւ մի՛ առնուցուս ակն ի դատաստանի, ըստ փոքուն եւ ըստ մեծին դատիցիս՝՝. եւ մի՛ խորշիցիս յերեսաց մարդոյ, զի դատաստանն Աստուծոյ է. եւ բան ինչ որ ծանրագոյն քան զձեզ իցէ, հասուսջիք առ իս եւ լուայց։ 18 Եւ պատուիրեցի ձեզ ի ժամանակին յայնմիկ զամենայն բանս զոր առնիցէք։ 19 Եւ չուեալ ի Քորեբայ շրջեցաք ընդ ամենայն անապատն ընդ մեծ եւ ընդ ահագին, զոր դուք իսկ տեսէք, զճանապարհ լերինն Ամովրհացւոց, որպէս պատուիրեաց Տէր Աստուած մեր մեզ, եւ եկաք մինչեւ ցԿադեսբառնեայ։ 20 Եւ ասացի ցձեզ. Եկայք մինչեւ ցլեառնն Ամովրհացւոց զոր Տէր Աստուած մեր տացէ ձեզ։ 21 Տեսէք զի Տէր Աստուած մեր մատնեաց առաջի երեսաց ձերոց զերկիրն. ելէք, ժառանգեցէք՝՝ որպէս ասաց Տէր Աստուած հարցն մերոց ձեզ՝՝. մի՛ երկնչիցիք եւ մի՛ զանգիտիցէք՝՝։ 22 Եւ մատեայք առ իս ամենեքեան եւ ասացէք. Առաքեսցուք յառաջագոյն քան զմեզ արս, եւ դիտեսցեն մեզ զերկիրն, եւ պատմեսցեն մեզ զհանգամանս ճանապարհին ընդ որ ելանիցեմք անդր, եւ զքաղաքացն յորս մտանիցեմք։ 23 Եւ հաճոյ թուեցաւ առաջի իմ բանն. եւ առի ի ձէնջ երկոտասան այր, այր մի ըստ ցեղի։ 24 Եւ գնացին ելին ի լեառնն, եւ հասին մինչեւ ի Ձորն ողկուզի, եւ լրտեսեցին զնա։ 25 Եւ առին ի ձեռս իւրեանց ի պտղոյ երկրին, եւ իջին առ մեզ եւ բերին մեզ զրոյց. ասեն. Բարի է երկիրն զոր Տէր Աստուած տալոց է մեզ։ 26 Եւ ոչ կամեցայք ելանել, եւ հեստեցէք բանին Տեառն Աստուծոյ մերոյ. 27 եւ տրտնջեցէք ի վրանս ձեր եւ ասացէք. Առ ատելութեան Տեառն եհան զմեզ յերկրէն Եգիպտացւոց՝ մատնել զմեզ ի ձեռս Ամովրհացւոց, սատակել զմեզ։ 28 Արդ յո՞ ելանիցեմք. եւ եղբարք ձեր զանգիտեցուցին զսիրտս ձեր եւ ասեն. Ազգ մեծ եւ բազում եւ զօրագոյն քան զմեզ, եւ քաղաքք մեծամեծք եւ պարսպաւորք մինչեւ յերկինս. այլ եւ որդիս սկայից՝՝ տեսաք մեք անդ։ 29 Եւ ասացի ցձեզ. Մի՛ զանգիտիցէք եւ մի՛ զարհուրիք ի նոցանէ. 30 Տէր Աստուած մեր որ երթայ առաջի երեսաց ձերոց, նա տայ պատերազմ ընդ նոսա փոխանակ ձեր, ըստ ամենայնի զոր արար ձեզ յերկրին Եգիպտացւոց առաջի աչաց ձերոց։ 31 Եւ յանապատիս յայսմիկ զոր տեսէք, զի սնոյց զքեզ Տէր Աստուած քո, որպէս սնուցանիցէ ոք զորդի իւր, ըստ ամենայն ճանապարհին զոր գնացէք մինչեւ եկիք ի տեղիս յայս։ 32 Եւ ի բանիս յայսմիկ ոչ հաւատացէք Տեառն Աստուծոյ ձերոյ, 33 որ երթայ առաջի ձեր ի ճանապարհիդ ընտրել ձեզ զտեղին, առաջնորդել ձեզ հրով ի գիշերի, ցուցանել ձեզ ճանապարհ ընդ որ գնայցէք, եւ ամպով ի տուէ։ 34 Եւ լուաւ Տէր զձայն բանիցն ձերոց, եւ բարկացեալ երդուաւ եւ ասէ. 35 Թէ տեսանիցէ ոք յարանցդ յայդցանէ զերկիրն բարի զոր երդուայ տալ հարցն նոցա. 36 բայց Քաղէբ որդի Յեփոնեայ, նա տեսցէ զնա, եւ նմա տաց զերկիրն յոր եհաս եւ որդւոցն նորա, վասն յարելոյ նորա ի Տէր։ 37 Եւ ինձ բարկացաւ Տէր վասն ձեր եւ ասէ. Եւ դու մի՛ մտցես անդր։ 38 Այլ Յեսու որդի Նաւեայ սպասաւոր քո, նա մտցէ անդր. զնա զօրացո, զի նա ժառանգեցուսցէ զնա Իսրայելի։ 39 Եւ ծնունդք եւ որդիք ձեր զորոց ասացէք թէ ի յափշտակութիւն լինիցին, եւ ամենայն մանուկ մատաղ որ ոչ գիտիցէ այսօր զբարի եւ զչար, նոքա մտցեն անդր, եւ նոցա տաց զնա, եւ նոքա ժառանգեսցեն զնա։ 40 Եւ դուք դարձարուք եւ չուեցէք յանապատն ընդ ճանապարհ Կարմիր ծովուն։ 41 Եւ պատասխանի ետուք ինձ եւ ասացէք. Մեղաք առաջի Տեառն Աստուծոյ մերոյ. ելցուք մեք, տացուք պատերազմ, որպէս պատուիրեաց մեզ Տէր Աստուած մեր. եւ առեալ իւրաքանչիւր զգործի պատերազմի իւրոյ՝ գումարեցայք ելէք ի լեառնն։ 42 Եւ ասէ ցիս Տէր. Ասա ցնոսա. Մի՛ ելանէք եւ մի՛ մարտնչիք, զի չեմ ընդ ձեզ, գուցէ խորտակիցիք առաջի թշնամեաց ձերոց։ 43 Եւ խօսեցայ ընդ ձեզ, եւ ոչ լուարուք ինձ, եւ անցէք զբանիւ Տեառն, եւ անսաստեցէք ելէք ի լեառնն։ 44 Եւ ելեալ Ամովրհացին, որ բնակեալն էր ի լերինն յայնմիկ, ընդդէմ ձեր՝ հալածեաց զձեզ, որպէս պատիցի մեղու, եւ խոցոտեցին զձեզ ի Սէիրայ մինչեւ ցՀերմա։ 45 Եւ նստեալ լայիք առաջի Տեառն, եւ ոչ լուաւ Տէր ձայնի ձերում, եւ ոչ անսաց ձեզ։ 46 Եւ նստայք ի Կադէս աւուրս բազումս, որչափ աւուրս երբեմն նստայք անդր։ |