ՄԱՐԳԱՐԷՈՒԹԻՒՆ ԱՄՈՎՍԱՅ 5 - Գրաբար Աստվածաշունչ (1895)1 Լուարուք զբանս զայս՝ զոր ես առից ի վերայ ձեր ողբս։ 2 Անկաւ տունդ Իսրայելի՝՝, եւ ոչ եւս յաւելուցու յառնել կոյսն Իսրայելի. կործանեցաւ յերկրի իւրում, եւ չիք ոք որ կանգնիցէ զնա։ 3 Քանզի այսպէս ասէ Տէր Տէր. Ի քաղաքէ յորմէ ելանէին հազարք՝ մնասցէ հարեւր, եւ յորմէ ելանէին հարեւր՝ մնասցէ տասն տանդ Իսրայելի։ 4 Քանզի այսպէս ասէ Տէր առ տունդ Իսրայելի. Խնդրեցէք զիս եւ կեցջիք. 5 եւ մի՛ խնդրէք զԲեթէլ, եւ ի Գաղգաղա մի՛ մտանէք, եւ ի Ջրհորն երդման մի՛ ելանէք. զի Գաղգաղա գերելով գերեսցի, եւ Բեթէլ եղիցի իբրեւ զչեղեալ։ 6 Խնդրեցէք զՏէր եւ կեցջիք. զի մի՛ բորբոքեսցի իբրեւ զհուր տունն Յովսեփայ եւ կերիցէ զնա, եւ ոչ ոք իցէ որ շիջուցանիցէ տանդ Իսրայելի։ 7 Որ առնէ ի բարձունս իրաւունս, եւ արդարութիւն եդ յերկրի. 8 որ առնէ զամենայն եւ նորոգէ՝՝, եւ դարձուցանէ յայգ զստուերս մահու, եւ զտիւ ի գիշեր մթացուցանէ. որ կոչէ զջուրս ծովու եւ հեղու ի վերայ երեսաց երկրի. Տէր ամենակալ անուն է նորա. 9 որ բաշխէ զբեկումն ի վերայ զօրութեան, եւ ածէ զթշուառութիւն ի վերայ ամրոցաց՝՝։ 10 Ատեցին ի դրունս զյանդիմանիչս, եւ զբանս սուրբս՝՝ պիղծս արարին։ 11 Վասն այնորիկ փոխանակ զի կռփէիք զաղքատս եւ կաշառս ընտրանաւ առնուիք ի նոցանէն, ապարանս զարդարեալս շինեսջիք, եւ մի՛ բնակեսջիք ի նոսա, այգիս ցանկալիս տնկեսջիք, եւ զգինի նոցա մի՛ արբջիք։ 12 Զի գիտացի ես զբազում ամպարշտութիւնս ձեր. եւ սաստիկ են մեղք ձեր. առ ոտն կոխէիք զարդարն առնլով փոխանակս, եւ խոտորեցուցանէիք զաղքատն ի դրունս։ 13 Վասն այնորիկ որ իմաստունն է՝ ի ժամանակին յայնմիկ լռեսցէ, զի ժամանակն չար է։ 14 Խնդրեցէք զբարի եւ մի՛ զչար, զի կեցջիք, եւ եղիցի ընդ ձեզ Տէր Աստուած ամենակալ, զոր օրինակ ասացէքն՝ 15 թէ՝ Ատեցաք զչարիս, եւ սիրեցաք՝՝ զբարիս. հաստատեցէք զիրաւունս ի դրունս ձեր, զի ողորմեսցի Տէր Աստուած՝՝ մնացորդաց Յովսեփայ։ 16 Վասն այդորիկ այսպէս ասէ Տէր Աստուած ամենակալ՝՝. Յամենայն հրապարակս կոծ. եւ յամենայն ճանապարհս ասասցի Վա՜յ, վա՜յ, կոչեսցի մշակ ի սուգ եւ ի կոծ եւ ի ձայնարկուս. 17 եւ յամենայն ճանապարհս՝՝ կոծ, քանզի անցից ընդ մէջ քո, ասէ Տէր։ 18 Վա՜յ որ ցանկայ աւուրն Տեառն. զի՞ կայ ձեր եւ աւուր Տեառն, եւ նա խաւար է, եւ ոչ լոյս։ 19 Զոր օրինակ թէ փախիցէ մարդ յերեսաց առիւծու, եւ պատահեսցէ նմա արջ, եւ փախնուցու ի տուն, եւ յեցուսցէ զձեռս իւր յորմն, եւ հարկանիցէ զնա օձ. 20 ո՞չ ապաքէն խաւար է օր Տեառն, եւ ոչ լոյս, աղջամղջին, եւ ոչ գոյ ի նմա ճաճանչ։ 21 Ատեցի, մերժեցի զտօնս ձեր, եւ ի տարեկանս ձեր ոչ հոտոտեցայց։ 22 Զի թէ մատուցանիցէք զողջակէզս եւ զզոհս ձեր՝ ոչ ընկալայց, եւ յերեւելիս փրկութեանց՝՝ ձերոց ես ոչ հայեցայց։ 23 Ի բաց արա յինէն զձայն երգոց քոց, եւ զնուագս սրնգաց քոց ես ոչ լուայց։ 24 Եւ յորդեսցեն իբրեւ զջուր իրաւունք, եւ արդարութիւն իբրեւ զհեղեղ անհուն։ 25 Միթէ սպա՞նդ եւ զոհս մատուցէք ինձ յանապատի անդ զքառասուն ամ, տունդ Իսրայելի. 26 եւ առէք զխորանն Մողոքայ, եւ զաստղ աստուածոյն ձերոյ զՀռեմփայ, զպատկերս նոցա զոր արարէք ձեզ։ 27 Եւ փոխեցից զձեզ՝՝ անդր քան զԴամասկոս, ասէ Տէր, Աստուած ամենակալ անուն է նորա։ |