ԳՈՐԾՔ ԱՌԱՔԵԼՈՑ 18 - Գրաբար Աստվածաշունչ (1895)ԵԳ. 1 Յետ այսորիկ մեկնեալ Պաւղոսի յԱթենացւոց անտի՝ եկն ի Կորինթոս. 2 եւ եգիտ զոմն Հրեայ, անուն Ակիւղաս, յազգէ Պոնտացի, այն ինչ եկեալ յԻտալիայ, եւ զՊրիսկիղա կին նորա, վասն հրամանին Կղաւդեայ՝ որոշել զամենայն Հրեայս ի Հռովմայ, եւ յարեցաւ ի նոսա։ 3 Եւ վասն զի համարուեստ էր, եղեւ առ նոսա եւ գործէր, քանզի էին խորանակարք արուեստիւ։ 4 Եւ խօսէր ի ժողովրդեանն ըստ ամենայն շաբաթուց, եւ հաւանեցուցանէր զՀրեայս եւ զհեթանոսս։ 5 Իբրեւ իջին ի Մակեդոնիայ Շիղա եւ Տիմոթէոս, ստիպէր հոգւովն Պաւղոս դնել վկայութիւն Հրէիցն թէ Յիսուս է Քրիստոսն։ 6 Եւ յընդդէմ դառնալ նոցա եւ ի հայհոյել, թօթափեաց զձորձս եւ ասէ ցնոսա. Արիւն ձեր ի գլուխ ձեր, քաւեալ եմ ես, յայսմ հետէ ի հեթանոսս երթամ։ 7 Եւ գնացեալ անտի՝ եմուտ ի տուն ուրումն, որոյ անուն էր Տիտոս Յուստոս, պաշտօնեայ Աստուծոյ. որոյ ապարանքն էին մերձ ի ժողովետղն։ 8 Կրիսպոս ժողովրդապետ հաւատաց ի Տէր ամենայն տամբ իւրով. եւ բազմաց ի Կորնթացւոցն լուեալ՝ հաւատացին եւ մկրտեցան։ 9 Եւ ասէ Տէր ի գիշերի տեսլեամբ ցՊաւղոս. Մի՛ երկնչիր, այլ խօսեաց եւ մի՛ լռեր, 10 քանզի ես ընդ քեզ եմ, եւ ոչ ոք ընդդէմ դարձցի քո՝ ի չարչարել զքեզ. քանզի ժողովուրդ է իմ բազում ի քաղաքիս յայսմիկ։ 11 Եւ նստաւ անդ տարի մի եւ ամիսս վեց՝ ուսուցանել նոցա զբանն Աստուծոյ։ ԵԴ. 12 Առ Գաղիովնաւ փոխանակաւ բդեշխին Աքայեցւոց յարեան միաբան Հրեայքն ի վերայ Պաւղոսի, եւ ածին զնա յատեան. 13 եւ ասէին եթէ՝ Արտաքոյ օրինաց պատրէ սա զմարդիկ՝ պաշտել զԱստուած։ 14 Եւ իբրեւ մերձ էր Պաւղոս բանալ զբերան իւր, ասէ Գաղիովն ցՀրեայսն. Եթէ էր ինչ անիրաւութիւն կամ խարդախութիւն չարեաց, ով Հրեայք, ի դէպ էր ինձ անսալ ձեզ։ 15 Ապա եթէ խնդիրք ինչ են վասն բանի եւ անուանց եւ օրինաց ձերոց՝ տեսէք ձեզէն, քանզի դատաւոր այդպիսի իրաց չկամիմ լինել։ 16 Եւ մերժեաց զնոսա յատենէ անտի։ 17 Եւ առեալ ամենեցուն Յունացն զՍոսթենէս ժողովրդապետն՝ հարկանէին առաջի ատենին, եւ ոչինչ զայնմանէ Գաղիովնի փոյթ լինէր։ 18 Բայց Պաւղոսի տակաւին մնացեալ աւուրս բազումս, յեղբարց հրաժարեալ՝ նաւէր յԱսորիս, եւ ընդ նմա Պրիսկիղա եւ Ակիւղաս, փոքրել զգլուխ ի Կենքրա, քանզի ուխտադիր էր։ 19 Եւ հասեալ յԵփեսոս՝ զնոսա եթող անդ, եւ ինքն մտեալ ի ժողովուրդն խօսէր ընդ Հրեայսն։ 20 Եւ աղաչեցին զնա բազում ժամանակս լինել անդ, եւ ոչ առ յանձն. 21 այլ հրաժարեաց ի նոցանէ եւ ասէ. Դարձեալ շրջեցայց Աստուծոյ կամօքն առ ձեզ։ 22 Ամբարձաւ յԵփեսեայ, եւ իջեալ ի Կեսարիայ՝ ել եւ ետ ողջոյն եկեղեցւոյն, էջ յԱնտիոք։ 23 Եւ եղեալ անդ ժամանակ ինչ՝ ել շրջել կարգաւ ընդ Գաղատացւոց աշխարհն եւ ընդ Փռիւգիա, հաստատել զամենայն աշակերտեալսն։ 24 Հրեայ ոմն Ապեղէս անուն Աղեքսանդրացի յազգէ, այր ճարտարաբան, եկն եհաս յԵփեսոս, զօրաւոր էր գրովք։ 25 Սա էր տեղեկացեալ ճանապարհին Տեառն, եւ եռայր հոգւով, խօսէր եւ ուսուցանէր ճշմարտութեամբ վասն Յիսուսի. գիտէր միայն զմկրտութիւնն Յովհաննու։ 26 Սա սկսաւ համարձակել ի ժողովրդեանն. եւ լուեալ ի նմանէ Ակիւղայ եւ Պրիսկիղայ՝ առին զնա առ իւրեանս, եւ ճշմարտագոյնս պատմեցին նմա զճանապարհն Աստուծոյ։ 27 Իբրեւ կամեցաւ նա գնալ յԱքայիա, յօժարեալ եղբարց՝՝ գրեցին առ աշակերտսն ընդունել զնա. որ իբրեւ եհաս անդր, բազում նպաստ լինէր հաւատացելոցն ի ձեռն շնորհացն։ 28 Քանզի պնդագոյն զՀրեայսն յանդիմանէր հրապարակաւ ցուցանել գրովք՝ եթէ Քրիստոսն է Յիսուս։ |