ԹԱԳԱՒՈՐՈՒԹԵԱՆՑ ԵՐԿՐՈՐԴ 23 - Գրաբար Աստվածաշունչ (1895)1 Եւ այս են բանք Դաւթի վերջինք. Հաւատարիմ Դաւիթ որդի Յեսսեայ, եւ հաւատարիմ այր, զոր կացոյց Տէր յօծեալ Աստուծոյ ի վերայ՝՝ Յակոբայ. եւ վայելուչ են երգք՝՝ Իսրայելի։ 2 Հոգի Տեառն խօսեցաւ յիս, եւ բան նորա ի լեզուի իմում։ 3 Ասէ Աստուած Իսրայելի, ընդ իս իսկ խօսեցաւ Պահապանն Իսրայելի. առակումն ասացի ի մարդ. ո՞վ է որ կալցի զերկիւղէ Տեառն եւ զԱստուծոյ, ի լոյս առաւօտու։ 4 Ծագեալ զարեգակն ընդ առաւօտս եւ ոչ նուաղեաց ի լուսոյ. եւ իբրեւ անձրեւոյ դալարւոյ յերկրէ։ 5 Զի ոչ եթէ այս տուն իմ է ընդ հզօրին Աստուծոյ.՝՝ ուխտ յաւիտենական եդ ինձ, պատրաստական յամենայն ժամանակի պահել, զի ամենայն փրկութիւն իմ եւ ամենայն կամք իմ Տէր։ 6 Զի մի՛ բողբոջեսցի անօրէնքն. իբրեւ զփուշ մերժեալ են ամենեքին նոքա՝ որ ոչ ձեռամբ առնուցուն։ 7 Եւ աշխատեսցի ի նոսա այր, եւ զամենայն երկաթ եւ զփայտ նիզակի հրով այրեսցէ, եւ բորբոքեսցին ամօթով իւրեանց։՝՝ 8 Այս անուանք են զօրավարացն Դաւթի. Յեբուսթէ Քանանացի՝ իշխան երիր մասինն, Ադինոն Ասովնացի,՝՝ ի վերայ ութ հարիւրոց վիրաւորաց ի միում նուագի։ 9 Եւ յետ նորա Եղէանան որդի հօրեղբօր նորա՝ որդի Սովացւոյն. ի մէջ երից զօրավարացն Դաւթի, յՌեմա ի նախատել նորա՝՝ զայլազգիս, ուր գումարեցան ի պատերազմ եւ խրախուսեաց այր Իսրայելի, 10 եւ նա յարեաւ եւ եհար յայլազգեացն մինչեւ մատզեցաւ ձեռն նորա սրովն. եւ՝՝ արար Տէր փրկութիւն մեծ յաւուր յայնմիկ. եւ զօրն նստէր յետոյ նորա, բայց միայն ի կապուտն։ 11 Եւ յետ նորա Սամաա որդի Սիսայ Արուկացի։ Եւ ժողովեցան այլազգիքն ի Ծնօտն, եւ անդ էր վիճակ անդի լի ոսպամբ, եւ զօրն փախեաւ յերեսաց այլազգեացն. 12 եւ արձանացաւ ի մէջ վիճակին եւ ապրեցոյց զնա, եւ եհար զայլազգիսն, եւ արար Տէր փրկութիւն մեծ։ 13 Եւ իջին երեք յերեսնից, եւ իջին ի Կասովա՝՝ առ Դաւիթ յայրն Ոդողոմայ, գունդք այլազգեացն բանակեալ էին ի հովիտս Ռափայնոցն։ 14 Եւ Դաւիթ էր յայնժամ յամրոցին, եւ ճամբար այլազգեացն էր յայնժամ ի Բեթղեհեմ։ 15 Եւ ցանկացաւ Դաւիթ եւ ասէ. Ո՜ արբուցանէր ինձ ջուր ի ջրհորոյն Բեթղեհեմի որ առ դրանն է։ 16 Եւ գունդք այլազգեացն էին ի Բեթղեհեմ։՝՝ Եւ հատին երեք զօրավարք զբանակն այլազգեաց, եւ հանին ջուր ի ջրհորոյն Բեթղեհեմի որ առ դրանն, եւ առին եւ եկին առ Դաւիթ. եւ ոչ կամեցաւ ըմպել զայն, այլ նուիրեաց զայն Տեառն. 17 եւ ասէ. Քաւ լիցի ինձ, Տէր, առնել զայդ, եթէ զարիւն արանց երթելոց ոգւովք չափ՝ ըմպիցեմ. եւ ոչ կամեցաւ ըմպել զայն։ Զայս արարին երեք զօրավարքն։ 18 Եւ Աբեսսա եղբայր Յովաբայ որդի Շարուհեայ, ինքն իշխան ի մէջ երիցն. եւ նա կանգնեաց զնիզակն իւր ի վերայ երեքհարիւրոց վիրաւորաց. եւ նորա անուն ի մէջ երիցն. 19 յայնցանէ փառաւորեալ, եւ եղեւ նոցա իշխան, եւ մինչեւ յերիսն ոչ եհաս։ 20 Եւ Բանեա որդի Յովիդայեայ, որդի առն զօրաւորի, որոյ բազում գործ գործեալ էր ի Կաբէսեղա. եւ նա եհար զերկուս որդիսն Արիելի Մովաբացւոյ, եւ նա էջ եւ սպան զառեւծն ի մէջ գբին յաւուր ձեան։ 21 Եւ նա սպան զայրն երեւելի՝ զայրն Եգիպտացի. եւ ի ձեռին Եգիպտացւոյն էր նիզակ իբրեւ զփայտ կամրջի՝՝. եւ էջ առ նա նիզակաւն, եւ յափշտակեաց զնիզակն ի ձեռաց Եգիպտացւոյն, եւ սպան զնա նորին նիզակաւ։ 22 Զայս արար Բանեա որդի Յովիդեայ. եւ նորա անուն ի մէջ երիցն զօրաւորաց. 23 յերիցն փառաւորեալ, եւ առ երիսն ոչ հասանէր. եւ կարգեաց զնա Դաւիթ ի վերայ համբարաց իւրոց։ 24 Եւ այս անուանք են զօրաւորացն Դաւթի արքայի.՝՝ Ասայէլ եղբայր Յովաբայ, նա էր ի մէջ երեսնիցն. Եղէանան՝ որդի Աղիուդայ հօրեղբօր նորա ի Բեթղեհեմ՝՝, 25 Սամաա Ռուդացի, Սելլոմ Կեղովթացի,՝՝ 26 Աղղաս Փեղղատացի, Իրաս՝ որդի Եսկաթայ Թեկուացի, 27 Աբիեզեր Անաթովթացի՝ յորդւոց Ասովթացւոյն, 28 Եղղոն Աղիոյացի, Նոերէ՝՝ Նետոփաթացի, 29 Աղափ՝ որդի Փամփանայ, Անաովէ Նեփղաթացի՝՝, Եթթի՝ որդի Ռիբայ ի Գաբաեթայ որդւոցն 30 Բենիամինի Եփրաթացւոյ՝՝, Ադդայի ի ձորոյն Գովասայ, 31 Աբիեղբոն ի դաշտավայրացն Ադդայի ի Նաքաղայ, Գասբիէ Ղադաբարացի, Ասմոն Բարասամացի՝՝, 32 Եղիաս Սաղաբոնացի, որդի Ասանայ՝ Յովնաթան, 33 Սամնան Արովդացի, Եղիան՝ որդի Արեդայ Արաթիրացի, 34 Աղիփաղեթ՝ որդի Ասիբացւոյ՝ որդի Ամաքայ, Եղիաբ՝ որդի Աքիտոփելայ Գաղամոնացւոյ, 35 Ասարէ Կարմեղացի, Տուուր Երքացի, 36 Գաղա՝ որդի Նաթանայ ի զօրութենէ որդի Գաղաադայ, 37 Եղիէ Ամմոնացի, Գեղովրէ Բեքրովթացի՝՝, կապարճակիր Յովաբայ որդւոյ Շարուհեայ, 38 Իրաս Յեթերացի, Գարէի Բեթանացի՝՝, Ուրիա Քետացի։ 39 Ընդ ամենայն երեսուն եւ եւթն. այլք ի հեղեղատէն Գադաբիելի որդւոյ Արաբովթացւոյն։՝՝ |