ԹԱԳԱՒՈՐՈՒԹԵԱՆՑ ԵՐԿՐՈՐԴ 21 - Գրաբար Աստվածաշունչ (1895)1 Եւ եղեւ սով յաւուրս Դաւթի զերիս ամս՝ ամ զամի զկնի, եւ խնդրեաց Դաւիթ յերեսաց Տեառն. եւ ասէ Տէր. Վասն Սաւուղայ եւ վասն արեանց տան նորա է վնասդ այդ, զի կոտորեաց զԳաբաւոնացիսն։ 2 Եւ կոչեաց արքայ Դաւիթ զԳաբաւոնացիսն, եւ ասէ ցնոսա. եւ Գաբաւոնացիքն չեն որդիք Իսրայելի, այլ յարենէ Ամովրհացւոցն՝՝, եւ որդիքն Իսրայելի երդուան նոցա. եւ խնդրեաց Սաւուղ հարկանել զնոսա, նախանձ առեալ վասն որդւոցն Իսրայելի եւ Յուդայ։ 3 Եւ ասէ Դաւիթ ցԳաբաւոնացիսն. Զի՞նչ արարից ձեզ եւ ի՞ւ քաւեցից, եւ օրհնիցէք զժառանգութիւն Տեառն։ 4 Եւ ասեն ցնա Գաբաւոնացիքն. Ոչ գոյ մեր արծաթ եւ ոսկի առ Սաւուղայ եւ ի տան նորա, եւ ոչ պիտի մեզ այր սպանանել յԻսրայելէ։ Եւ նա ասէ. Եւ արդ զի՞նչ ասէք զի արարից ձեզ։ 5 Եւ ասեն ցարքայ. Այր որ սպառեաց զմեզ եւ հալածեաց զմեզ, որ համարեցաւ սատակել զմեզ, զնա ապականեսցուք. զի մի՛ կացցէ՝՝ յամենայն սահմանս Իսրայելի, 6 տացին մեզ եւթն արք յորդւոց նորա, եւ յարագեսցուք զնոսա Տեառն ի Գաբաա Սաւուղայ ընտիրս Տեառն։ Եւ ասէ արքայ. Ես տաց ձեզ։ 7 Եւ խնայեաց արքայ ի Մեմփիբոսթէ որդի Յովնաթանու որդւոյ Սաւուղայ վասն երդմանն Տեառն որ ի մէջ Յովնաթանու որդւոյ Սաւուղայ եւ ի մէջ Դաւթի։ 8 Եւ ա՛ռ արքայ զերկուս որդիսն Ռեսփայ դստեր Այիայ զորս ծնաւ Սաւուղայ, զԵրմոնթի եւ զՅեբուսթէ, եւ զհնգեսին որդիսն Մերոբայ դստեր Սաւուղայ, զորս ծնաւ Եսդրիելի որդւոյ Բերզելեայ Մովլաթացւոյ, 9 եւ ետ զնոսա ի ձեռս Գաբաւոնացւոցն. եւ յարագեցին զնոսա ի լերինն առաջի Տեառն. եւ անդ անկան եւթանեքին նոքա ի միասին. եւ մեռան նոքա յաւուրս հնձոց, յառաջաւոր՝ ի սկզբան հնձոց գարեաց։ 10 Եւ ա՛ռ Ռեսփա դուստր Այիայ քուրձ եւ արկ ի վերայ նոցա՝՝ ի վիմին ի սկզբան հնձոց գարեաց, մինչեւ կաթեաց ի վերայ նոցա ջուր յերկնից. եւ ոչ տայր թոյլ թռչնոց երկնից հանգչել ի վերայ նոցա ի տուէ, եւ ոչ գազանաց անապատի ի գիշերի։ 11 Եւ պատմեցաւ Դաւթի զոր ինչ արար Ռեսփա դուստր Այիայ՝ հարճ Սաւուղայ, եւ լքան. եւ եհաս ի վերայ նոցա Դան որդի Յովասայ՝ ի ծննդոց սկայից։՝՝ 12 Եւ չոգաւ Դաւիթ եւ առ զոսկերսն Սաւուղայ եւ զոսկերսն Յովնաթանու որդւոյ նորա յարանց Յաբիսայ Գաղաադու, որ գողացան զնոսա ի հրապարակացն Բեթսանայ. զի արձանացուցին զնոսա անդ այլազգիքն յաւուր յորում հարին զնոսա այլազգիքն ի Գեղբուէ. 13 եւ եհան անտի զոսկերսն Սաւուղայ եւ զոսկերսն Յովնաթանու որդւոյ նորա. 14 ժողովեաց եւ զյարագելոցն յերկրին Բենիամինի, ի գերեզմանն որ է մերձ առ Կիս հայր նորա, եւ անդ թաղեցան՝՝. եւ արարին զամենայն ինչ զոր հրամայեաց արքայ, եւ լուաւ Աստուած երկրին յետ այնորիկ։ 15 Եւ եղեւ միւսանգամ պատերազմ այլազգեացն ընդ Իսրայելի, եւ էջ Դաւիթ եւ ծառայք նորա ընդ նմա, եւ պատերազմեցան ընդ այլազգիսն. եւ լքաւ Դաւիթ։ 16 Եւ Աբեսսա ի Յեսբէ՝՝, որ էր ի ծննդոցն Ռափայ, եւ կշիռ նիզակի նորա յերեքհարեւր սկեղէ կուռ պղնձոյ, եւ ինքն ունէր ընդ մէջ իւր թուր, եւ խորհէր հարկանել զԴաւիթ։ 17 Եւ օգնեաց Դաւթի Աբեսսա որդի Շարուհեայ, եւ եհար զայլազգին եւ սպան զնա. յայնժամ երդուան արք Դաւթի եւ ասեն, եթէ՝ Ոչ եւս ելցես ընդ մեզ ի պատերազմ, եւ ոչ շիջուսցես զճրագդ Իսրայելի։ 18 Եւ եղեւ յետ այնորիկ, եղեւ միւսանգամ պատերազմ ի Գէթ ընդ այլազգիսն. յայնժամ եհար Սովբաք Ովսացի զՍեփտոն ի ծննդոցն Ռափայ։ 19 Եւ եղեւ միւսանգամ պատերազմ յՌովբ ընդ այլազգիսն. եւ եհար Եղէանան որդի Արիովդիմայ Բեթղեհեմացւոյ զԳողիադ Գեթացի, եւ փայտ նիզակի նորա իբրեւ ստորի ոստայնանկաց։ 20 Եւ եղեւ միւսանգամ պատերազմ ի Գէթ. եւ էր անդ այր մի Մաովն, եւ մատունք ձեռաց նորա եւ ոտից վեց վեց քսան եւ չորք թուով. եւ նա ծնաւ Ռափայ։ 21 Եւ նախատէր զԻսրայէլ. եւ եհար զնա Յովնաթան որդի Սամաայ եղբօր Դաւթի։ 22 Չորեքին սոքա ծնան Ռափայ ի տան ի Գէթ. եւ անկան ի ձեռս Դաւթի եւ ի ձեռս ծառայից նորա։ |