ԹԱԳԱՒՈՐՈՒԹԵԱՆՑ ՉՈՐՐՈՐԴ 24 - Գրաբար Աստվածաշունչ (1895)1 Յաւուրս նորա ել Նաբուքոդոնոսոր արքայ Բաբելոնի, եւ եղեւ նորա ծառայ Յովակիմ ամս երիս, եւ դարձաւ վտարանջեաց ի նմանէ։ 2 Եւ առաքեաց Տէր նմա զմեկնակազէնսն Քաղդէացւոց, եւ զմեկնակազէնսն Ասորւոց, եւ զմեկնակազէնսն Մովաբայ, եւ զմեկնակազէնսն որդւոցն Ամոնայ. եւ առաքեաց զնոսա յերկիրն Հրէաստանի՝ սատակել զնա ըստ բանին Տեառն զոր խօսեցաւ ի ձեռն ծառայից իւրոց մարգարէից։ 3 Քանզի բարկութիւն Տեառն էր՝՝ ի վերայ Յուդայ մերժել զնա յերեսաց իւրոց վասն մեղաց Մանասէի, ըստ ամենայնի զոր արար, 4 եւ վասն անպարտ արեանցն զոր եհեղ եւ ելից զԵրուսաղէմ անպարտ արեամբ. եւ ոչ կամեցաւ Տէր ցածնուլ։ 5 Եւ մնացորդք բանիցն Յովակիմայ եւ ամենայն ինչ զոր արար՝ ո՞չ աւանիկ գրեալ են ի գիրս բանից աւուրց թագաւորացն Յուդայ։ 6 Եւ ննջեաց Յովակիմ ընդ հարս իւր, եւ թագաւորեաց Յովաքին որդի նորա ընդ նորա։ 7 Եւ ոչ եւս յաւել արքայն Եգիպտացւոց ելանել յերկրէն իւրմէ. քանզի ա՛ռ արքայն Բաբելոնի ի հեղեղատէն Եգիպտացւոց մինչեւ ցգետն Եփրատ՝ զամենայն ինչ որ էր արքային Եգիպտացւոց։ 8 Որդի ամաց ութուտասնից էր Յովաքին ի թագաւորել իւրում, եւ երիս ամիսս թագաւորեաց յԵրուսաղէմ, եւ անուն մօր նորա Նեսթա՝ դուստր Եղամաթայ յԵրուսաղեմէ. 9 եւ արար չար առաջի Տեառն ըստ ամենայնի զոր արար հայր նորա։ 10 Ի ժամանակի յայնմիկ ել Նաբուքոդոնոսոր արքայ՝՝ Բաբելոնի յԵրուսաղէմ, եւ եկն քաղաքն ի պաշարումն։ 11 Եւ եմուտ արքայն Բաբելացւոց ի քաղաքն, եւ ծառայք նորա պաշարեալ պահէին զնա։ 12 Եւ ել Յովաքին արքայ Յուդայ առ արքայն Բաբելացւոց ինքն եւ ծառայք իւր, եւ մայր իւր եւ իշխանք իւր եւ ներքինիք իւր. եւ առ զնա արքայն Բաբելացւոց, յամի ութերորդի թագաւորութեան իւրոյ։ 13 Եւ եհան զամենայն գանձս տանն Տեառն, եւ զգանձս տան թագաւորին. եւ կոտորեաց զամենայն անօթս ոսկեղէնս զոր արար Սողոմոն արքայ Իսրայելի ի տաճարին Տեառն ըստ բանին Տեառն։ 14 Եւ խաղացոյց զամենայն Երուսաղէմ եւ զամենայն իշխանս եւ զամենայն զօրաւորս զօրութեամբ ի գերութեան, տասն հազար գերեաց, եւ զամենայն հիւսունս եւ զդահիճս, եւ ոչ ոք մնաց բաց յաղքատաց երկրին։ 15 Եւ խաղացոյց զՅովաքին ի Բաբելոն, եւ զմայր թագաւորին եւ զկանայս նորա եւ զներքինիս նորա. եւ զզօրաւորս երկրին վարեաց ի գերութիւն յԵրուսաղեմէ ի Բաբելոն։ 16 Եւ զամենայն արս զօրութեան՝ արս եւթն հազար. եւ զհիւսունս եւ զդահիճս հազար այր, ամենեքին զօրաւորք պատերազմօղք. եւ վարեաց զնոսա արքայն Բաբելացւոց ի գերութեան ի Բաբելոն։ 17 Եւ թագաւորեցոյց արքայն Բաբելացւոց զՄաթթանիա որդի նորա ընդ նորա. եւ եդ նմա անուն Սեդեկիա։ 18 Որդի քսան եւ մի ամաց էր Սեդեկիա ի թագաւորել իւրում, եւ մետասան ամ թագաւորեաց յԵրուսաղէմ. եւ անուն մօր նորա Ամատեղ դուստր Երեմիայի ի Ղոբնայ։ 19 Եւ արար չար առաջի Տեառն ըստ ամենայնի զոր արար Յովակիմ։ 20 Զի սրտմտութիւն Տեառն էր ի վերայ Երուսաղեմի եւ Յուդայ, մինչեւ ընկէց զնոսա յերեսաց իւրոց. եւ նշկահեաց Սեդեկիա զարքայն Բաբելացւոց։ |