ԹԱԳԱՒՈՐՈՒԹԵԱՆՑ ՉՈՐՐՈՐԴ 22 - Գրաբար Աստվածաշունչ (1895)1 Որդի ամաց ութից Յովսիա ի թագաւորել իւրում, եւ երեսուն եւ մի ամ թագաւորեաց յԵրուսաղէմ. եւ անուն մօր նորա Յեդիդա, դուստր Ադայեայ ի Բասուրովթայ։ 2 Եւ արար ուղղութիւն առաջի Տեառն, եւ գնաց յամենայն ճանապարհս Դաւթի հօր իւրոյ, եւ ոչ խոտորեցաւ յաջ կամ յահեակ։ 3 Եւ եղեւ յամի ութուտասներորդի Յովսեայ արքայի Յուդայ, յամսեանն եւթներորդի՝՝ առաքեաց արքայ զՍափան զորդի Եսելեայ որդւոյ Մեսողոմայ զդպրապետ տանն, եւ ասէ. 4 Երթ առ Քեղկիա քահանայ մեծ, զի ձուլեսցեն զարծաթն մտեալ ի տուն Տեառն, զոր ժողովեցին պահապանքն կշռով ի ժողովրդենէն. 5 եւ տացեն զայն ի ձեռս գործաւորաց գործոյն՝ ցվերակացուս տանն Տեառն։ Եւ ետուն ցգործաւորս գործոյն ի տան Տեառն, զօրացուցանել զբեդեկ տանն Տեառն, 6 ցհիւսունս եւ ցշինողս եւ ցճարտարս, գնել փայտ եւ քարինս կոփածոյս՝ առ ի կազմելոյ զբեդեկ տանն Տեառն՝՝։ 7 Բայց ոչ առնէին համար արծաթոյն տուելոյ նոցա, քանզի յաւատ գործէին։ 8 Եւ ասէ Քեղկիա քահանայ մեծ ցՍափան դպրապետ. Մատեան օրինաց գտի ի տան Տեառն։ Եւ ետ Քեղկիա ցՍափան. եւ ընթերցաւ զայն։ 9 Եւ տարաւ առ արքայ զպատգամն՝՝, եւ ասէ. Ձուլեցին ծառայք քո զարծաթն գտեալ ի տան Տեառն, եւ ետուն զայն ի ձեռս գործաւորաց գործոյն վերակացուաց ի տան Տեառն։ 10 Եւ խօսեցաւ Սափան դպրապետ ընդ արքայի եւ ասէ. Մատեան մի ետ ցիս Քեղկիա քահանայ. եւ ընթերցաւ զայն Սափան առաջի արքայի։ 11 Եւ եղեւ իբրեւ լուաւ արքայ զբանս մատենի օրինացն, պատառեաց զհանդերձս իւր։ 12 Եւ պատուէր ետ արքայ Քեղկեայ քահանայի, եւ Աքիկամայ որդւոյ Սափանայ եւ Աքոբորայ որդւոյ Միքէի եւ Սափանայ դպրապետի եւ Յասայեայ ծառայի արքայի, եւ ասէ. 13 Երթայք խնդրեցէք ի Տեառնէ վասն իմ եւ վասն ամենայն ժողովրդեանդ եւ վասն ամենայն Յուդայ, վասն բանից մատենիդ գտելոյ այդորիկ. զի մեծ բարկութիւն Տեառն բորբոքեալ է ի մեզ. փոխանակ զի ոչ լուան հարք մեր բանից մատենիդ այդորիկ առնել ըստ ամենայն գրելոցդ զմէնջ։ 14 Եւ գնաց Քեղկիա քահանայ եւ Աքիկամ եւ Աքոբովր եւ Սափան եւ Յասայիա՝ առ Ողդա մարգարէ՝ կին Սեղղովմայ որդւոյ Թեկուայ, որդւոյ Արասայ պատմուճակի. եւ նա բնակէր յԵրուսաղէմ ի Մասենա. եւ խօսեցան ընդ նմա։ 15 Եւ ասէ ցնոսա. Այսպէս ասէ Տէր Աստուած Իսրայելի. Ասացէք ցայրն որ առաքեաց զձեզ առ իս, 16 այսպէս ասէ Տէր. Ահա ածեմ չարիս ի վերայ տեղւոյդ այդորիկ եւ ի վերայ բնակչաց դորա ըստ ամենայն բանից մատենին զոր ընթերցաւ արքայ Յուդայ. 17 փոխանակ զի թողին զիս, եւ արկանէին խունկս աստուածոց օտարաց, զի բարկացուսցեն զիս գործովք ձեռաց իւրեանց, եւ բորբոքեսցի սրտմտութիւն իմ ի տեղւոջդ յայդմիկ, եւ մի՛ շիջցի։ 18 Եւ ցարքայ Յուդայ որ առաքեաց զձեզ խնդրել զՏէր՝ զայս ասասջիք. Այսպէս ասէ Տէր Աստուած Իսրայելի. Բանքն զոր լուար՝ այս են՝՝. 19 փոխանակ զի կակղացաւ սիրտ քո, եւ պատկառեցեր յերեսաց Տեառն իբրեւ լուար զոր ինչ խօսեցաւ ի վերայ տեղւոյդ այդորիկ եւ ի վերայ բնակչաց դորա լինել յապականութիւն եւ յանէծս, եւ պատառեցեր զհանդերձս քո, եւ լացեր առաջի իմ. եւ ես լուայ, ասէ Տէր։ 20 Վասն այդորիկ ես յաւելում զքեզ առ հարս քո, եւ ժողովեսցիս ի տեղւոջ քում յԵրուսաղէմ՝՝. եւ ոչ տեսցեն աչք քո զամենայն չարիսն զոր ես ածից ի վերայ տեղւոյդ այդորիկ։ |