ԹԱԳԱՒՈՐՈՒԹԵԱՆՑ ՉՈՐՐՈՐԴ 21 - Գրաբար Աստվածաշունչ (1895)1 Որդի երկոտասանից ամաց Մանասէ ի թագաւորել իւրում, եւ յիսուն եւ ինն ամ թագաւորեաց յԵրուսաղէմ. եւ անուն մօր նորա Եփսիբա։ 2 Եւ արար չար առաջի Տեառն ըստ գարշութեան ազգացն, զորս եբարձ Տէր յերեսաց որդւոցն Իսրայելի։ 3 Եւ դարձաւ շինեաց զբարձունսն զոր կործանեաց Եզեկիա հայր նորա, եւ կանգնեաց զսեղանն Բահաղու, եւ արար անտառ՝ որպէս արար Աքաաբ արքայ Իսրայելի. եւ երկիր եպագ ամենայն զօրութեան երկնից եւ ծառայեաց նոցա. 4 եւ շինեաց սեղան ի տան Տեառն, որպէս ասաց Տէր. ՅԵրուսաղէմ եդից զաթոռ իմ։ 5 Եւ շինեաց սեղանս ամենայն զօրութեան երկնից յամենայն սրահս՝՝ տանն Տեառն։ 6 Եւ անցոյց զորդիս իւր ընդ հուր, եւ հմայէր եւ հաւահարց լինէր. եւ արար վհուկս եւ գէտս. եւ յաճախեաց առնել չար առաջի Տեառն առ ի բարկացուցանելոյ զնա։ 7 Եւ եդ զդրօշեալս անտառաց ի տան Տեառն՝՝, զորմէ ասաց Տէր ցԴաւիթ եւ ցՍողոմոն որդի նորա, թէ՝ Ի տանս յայսմիկ եւ յԵրուսաղէմ զոր ընտրեցի յամենայն ցեղիցն Իսրայելի՝ եդից զանուն իմ յաւիտեան, 8 եւ ոչ յաւելից շարժել զոտն Իսրայելի յերկրէդ զոր ետու հարց նոցա, որք զգուշանայցեն առնել զամենայն որ ինչ պատուիրեցի նոցա ըստ ամենայն պատուիրանին զոր պատուիրեաց նոցա ծառայ իմ Մովսէս։ 9 Եւ ոչ լուան. եւ մոլորեցոյց զնոսա Մանասէ առնել չար առաջի Տեառն՝՝ առաւել քան զազգսն զորս ապականեաց Տէր յերեսաց որդւոցն Իսրայելի։ 10 Եւ խօսեցաւ Տէր ի ձեռն ծառայից իւրոց մարգարէից՝ եւ ասէ. 11 Փոխանակ զի արար Մանասէ արքայ Յուդայ զգարշելիսդ զայդոսիկ, զչարս առաւել քան զամենայն զոր արար Ամովրհացին առաջի իմ, եւ յանցեաւ Յուդա կռովք իւրեանց՝՝, 12 վասն այնորիկ այսպէս ասէ Տէր Աստուած Իսրայելի. Ահա ես ածեմ չարիս ի վերայ Երուսաղեմի եւ ի վերայ Յուդայ, զի ամենայնի որ լսիցէ՝ հնչեսցեն երկոքին ականջք իւր։ 13 Եւ ձգեցից ի վերայ Երուսաղեմի զչափն Սամարիայ եւ զկշիռ տանն Աքաաբու, եւ ջնջեցից զԵրուսաղէմ որպէս շիշ մի ջնջեալ որ կործանիցի՝՝ ի վերայ երեսաց իւրոց։ 14 Եւ մերժեցից զմնացորդս ժառանգութեան իմոյ, եւ մատնեցից զնոսա ի ձեռս թշնամեաց իւրեանց, եւ եղիցին ի յափշտակութիւն եւ յաւար ամենայն թշնամեաց իւրեանց. 15 փոխանակ զի արարին չար առաջի իմ, եւ բարկացուցանէին զիս յօրէ յորմէհետէ հանի զնոսա յԵգիպտոսէ մինչեւ ցայսօր։ 16 Նա եւ արիւն անպարտ եհեղ Մանասէ բազում յոյժ, մինչեւ ելից զԵրուսաղէմ ծայր ի ծայր. թող զմեղս իւր որովք մեղոյցն զՅուդա առնել չար առաջի Տեառն։ 17 Եւ մնացորդք բանից Մանասէի եւ ամենայն ինչ զոր արար եւ մեղք նորա զոր մեղաւ, ո՞չ աւանիկ գրեալ են ի գիրս բանից աւուրց թագաւորացն Յուդայ։ 18 Եւ ննջեաց Մանասէ ընդ հարս իւր, եւ թաղեցաւ ի պարտիզի տան իւրոյ, ի պարտիզին Ոզիայ. եւ թագաւորեաց Ամոն որդի նորա ընդ նորա։ 19 Որդի քսան եւ երկուց ամաց Ամոն ի թագաւորել իւրում, եւ երկոտասան ամ՝՝ թագաւորեաց յԵրուսաղէմ. եւ անուն մօր նորա Մեսողոմիթ՝ դուստր Արուսայ Յետեբեղայ։ 20 Եւ արար չար առաջի Տեառն, որպէս արար Մանասէ հայր նորա. 21 եւ գնաց յամենայն ճանապարհս յոր գնաց հայր նորա, եւ պաշտեաց զկուռս զոր պաշտեաց հայր նորա, եւ երկիր եպագ նոցա. 22 եւ եթող զՏէր Աստուած հարց իւրոց, եւ ոչ գնաց ի ճանապարհս Տեառն։ 23 Եւ գումարեցան ծառայք Ամոնայ ի վերայ նորա, եւ սպանին զարքայ ի տան իւրում։ 24 Եւ եհար ամենայն ժողովուրդն զամենայն գումարեալսն ի վերայ արքայի Ամոնայ, եւ թագաւորեցոյց ժողովուրդ երկրին զՅովսիա որդի նորա ընդ նորա։ 25 Եւ մնացորդք բանից Ամոնայ զոր արար, ո՞չ աւանիկ գրեալ են ի գիրս բանից աւուրց թագաւորացն Յուդայ։ 26 Եւ ննջեաց Ամոն ընդ հարս իւր,՝՝ եւ թաղեցին զնա ի գերեզմանի իւրում ի պարտիզին Ոզիայ. եւ թագաւորեաց Յովսիա որդի նորա ընդ նորա։ |