ԹԱԳԱՒՈՐՈՒԹԵԱՆՑ ՉՈՐՐՈՐԴ 18 - Գրաբար Աստվածաշունչ (1895)1 Եւ եղեւ յամին երրորդի Ովսէի որդւոյ Եղայ արքայի Իսրայելի թագաւորեաց Եզեկիա որդի Աքազու արքայի Յուդայ։ 2 Որդի քսան եւ հինգ ամաց էր ի թագաւորել իւրում, եւ քսան եւ ինն ամ թագաւորեաց յԵրուսաղէմ. եւ անուն մօր նորա Աբութ՝ դուստր Զաքարեայ։ 3 Եւ արար ուղղութիւն առաջի Տեառն ըստ ամենայնի զոր արար Դաւիթ հայր նորա։ 4 Նա եբարձ զբարձունսն եւ խորտակեաց զամենայն արձանսն՝՝ եւ կոտորեաց զանտառսն, եւ զօձն պղնձի զոր արար Մովսէս, զի մինչեւ ցայն աւուրս զոհէին նմա որդիքն Իսրայելի, եւ կոչեցին զնա Նէեսթան։ 5 Ի Տէր Աստուած Իսրայելի յուսացաւ. եւ յետ նորա նման նմա ոչ եղեւ յամենայն թագաւորս Յուդայ եւ յեղեալսն յառաջագոյն քան զնա։ 6 Յարեցաւ ի Տէր եւ ոչ մեկնեցաւ ի գնացից նորա, եւ պահեաց զպատուիրանս նորա զոր պատուիրեաց Մովսէս։ 7 Եւ էր Տէր ընդ նմա, յամենայնի զոր ինչ եւ առնէր՝ խելամուտ լինէր, եւ նշկահեաց զարքայն Ասորեստանի եւ ոչ ծառայեաց նմա։ 8 Նա եհար զայլազգիսն մինչեւ ցԳազա եւ մինչեւ ցսահմանս նորա, յաշտարակէ պահապանացն մինչեւ ցքաղաքն ամուր։ 9 Եւ եղեւ յամին չորրորդի Եզեկեայ արքայի, այն է ամ եւթներորդ Ովսեայ որդւոյ Եղայ արքայի Իսրայելի, ել Սաղմանասար արքայ Ասորեստանեայց ի վերայ Սամարիայ, եւ պաշարեաց զնա. 10 եւ առ զնա ի կատարել ամաց երից, յամի վեցերորդի Եզեկեայ, այն ամ իններորդ էր Ովսեայ արքայի Իսրայելի, առաւ Սամարիա։ 11 Եւ խաղացոյց արքայն Ասորեստանեայց զՍամարիա յԱսորեստանեայս, եւ նստոյց զնոսա յԱղաթ եւ յԱբովր՝ առ գետովն Գովզանայ եւ լերամբքն Մարաց. 12 զի ոչ լուան ձայնի Տեառն Աստուծոյ իւրեանց, եւ անցին զուխտիւ նորա ըստ ամենայնի զոր պատուիրեաց նոցա Մովսէս ծառայ Տեառն. ոչ լուան եւ ոչ արարին։ 13 Եւ յամի չորեքտասաներորդի արքայի Եզեկեայ, ել Սենեքերիմ արքայ Ասորեստանեայց ի վերայ ամուր ամուր քաղաքացն Յուդայ, եւ առ զնոսա։ 14 Եւ առաքեաց Եզեկիա արքայ Յուդայ հրեշտակս առ արքայ Ասորեստանեայց ի Լաքիս եւ ասէ. Մեղայ, դարձիր յինէն, եւ զոր ինչ դիցես ի վերայ իմ՝ բարձից։ Եւ եդ արքայն Ասորեստանեայց ի վերայ Եզեկեայ արքայի Յուդայ երեքհարեւր տաղանդ արծաթոյ եւ երեսուն տաղանդ ոսկւոյ։ 15 Եւ ետ Եզեկիա զամենայն արծաթ գտեալ ի տան Տեառն եւ ի գանձս տան թագաւորին։ 16 Ի ժամանակի յայնմիկ կոտորեաց Եզեկիա զդրունս տաճարին Տեառն, եւ զսեամսն զոր պատեաց ոսկւով Եզեկիա արքայ Յուդայ, եւ ետ զայն արքային Ասորեստանեայց։ 17 Եւ առաքեաց արքայ Ասորեստանեայց զԹարաթա եւ զՌաբսարիս եւ զՌափսակ ի Լաքիսայ առ արքայ Եզեկիա զօրու ծանու ի վերայ Երուսաղեմի. եւ ելին եւ եկին յԵրուսաղէմ, եւ կացին ի վերայ ջրմղին վերնոյ աւազանին, որ է ի ճանապարհի ագարակին թափչի. 18 եւ աղաղակեցին առ Եզեկիա. եւ եկին առ նոսա Եղիակիմ որդի Քեղկեայ հազարապետ, եւ Սովմնաս դպրապետ, եւ Յովաք որդի Ասափայ որ ի վերայ յիշատակաց։ 19 Եւ ասէ ցնոսա Ռափսակ. Ասացէք ցԵզեկիա, այսպէս ասէ արքայ մեծ, արքայն Ասորեստանեայց. Զի՞նչ իցէ յոյսն յոր դու յուսացեալ իցես. 20 բայց եթէ ասիցես թէ՝ Բանք շրթանց, եւ խորհուրդ եւ զօրութիւն պիտոյ իցէ ի պատերազմ՝՝. եւ արդ յո՞ յուսացեալ նշկահեցեր զիս։ 21 Ահա յուսացեալ իցես ի ցուպն եղեգնեայ ջաղջախեալ՝ յԵգիպտոս, յոր թէ յենուցու այր՝ մտանիցէ ընդ ձեռս նորա, եւ խոցիցէ զնա. այնպէս փարաւոն արքայ Եգիպտացւոց ամենայն յուսացելոց իւրոց։ 22 Եւ զի ասացեր ցիս՝ թէ ի Տէր Աստուած յուսացեալ եմք, ո՞չ դա այն է՝ զորոյ մերժեաց Եզեկիա զբարձունս նորա եւ զսեղանս նորա, եւ ասէ ցՅուդա եւ ցԵրուսաղէմ. Առաջի սեղանոյս այսորիկ երկիր պագէք յԵրուսաղէմ։ 23 Եւ արդ աղէ խառնեցարուք ի տէր իմ արքայ Ասորեստանեայց, եւ տաց քեզ երկուս հազարս երիվարաց, եթէ կարասցես տալ դու քեզ հեծեալս ի վերայ նոցա։ 24 Եւ զի՞արդ կարիցես զդէմ ունել միոյ ուրուք կուսակալի ի ծառայից տեառն իմոյ ի յետնոց, զի յուսացեալդ ես յԵգիպտոս ի կառս եւ յերիվարս։ 25 Իսկ արդ առանց Տեա՞ռն ինչ ելանիցեմք ի տեղիս յայս ապականել զսա. Տէր ասաց ցիս. Ել յերկիրն յայն եւ ապականեա զնա։ 26 Եւ ասէ Եղիակիմ որդի Քեղկեայ եւ Սովմնաս եւ Յովաք Ասափայ՝ ցՌափսակ. Խօսեաց ընդ ծառայս քո Ասորերէն, քանզի լսեմք մեք. եւ մի՛ խօսիր Հրեարէն յականջս ժողովրդեանդ որ կան ի պարսպիդ։ 27 Եւ ասէ ցնոսա Ռափսակ. Միթէ առ տէրն քո եւ առ քե՞զ առաքեաց զիս տէր իմ խօսել զբանս զայսոսիկ. ո՞չ ապաքէն առ արսդ որ նստին ի վերայ պարսպիդ՝ ուտել զաղբ իւրեանց եւ ըմպել զմէզ իւրեանց ձեւք հանդերձ։ 28 Եւ յարեաւ Ռափսակ, եւ աղաղակեաց մեծաձայն Հրեարէն եւ խօսեցաւ եւ ասէ. Լուարուք զպատգամս արքային մեծի, արքային Ասորեստանեայց. 29 այսպէս ասէ արքայ. Մի՛ հպարտացուսցէ զձեզ Եզեկիա, զի ոչ կարէ ապրեցուցանել զձեզ ի ձեռաց իմոց. 30 եւ մի՛ յուսացուսցէ զձեզ Եզեկիա ի Տէր, եւ ասասցէ եթէ՝ Փրկելով փրկէ զմեզ Տէր, եւ ոչ մատնեսցի քաղաքս ի ձեռս արքային Ասորեստանեայց։ 31 Մի՛ լսէք Եզեկեայ, զի այսպէս ասէ արքայն Ասորեստանեայց. Արարէք ընդ իս օրհնութիւն, եւ ելէք առ իս. եւ կերիցէ այր իւրաքանչիւր զայգի իւր եւ զթզենի իւր, եւ արբցէ ջուր ի ջրհորոյ իւրմէ, 32 մինչեւ եկից առից եւ տարայց զձեզ յերկիրն որ իբրեւ զերկիրս ձեր է, երկիր ցորենոյ եւ գինւոյ, այգեաց եւ հացի, երկիր ձիթենեաց՝ իւղոյ եւ մեղու. եւ կեցէք եւ ոչ մեռանիցիք. եւ մի՛ լսէք Եզեկեայ, զի խաբէ զձեզ եւ ասէ, թէ Տէր փրկեսցէ զմեզ։ 33 Միթէ փրկելով փրկեցի՞ն աստուածք ազգացն զիւրաքանչիւր աշխարհ ի ձեռաց արքային Ասորեստանեայց։ 34 Ո՞ւր է աստուածն Եմաթայ եւ Արփաթայ, եւ ո՞ւր է աստուածն Սեփարուիմայ քաղաքին, Անայ եւ Աւայ. միթէ փրկեցի՞ն զՍամարիա ի ձեռաց իմոց. 35 ո՞վ ոք յամենայն աստուածոց աշխարհաց որ փրկեցին զերկիր իւրեանց ի ձեռաց իմոց, զի փրկեսցէ Տէր զԵրուսաղէմ ի ձեռաց իմոց։ 36 Եւ լռեցին եւ ոչ ետուն նմա պատասխանի, զի պատուէր տուեալ էր արքայի թէ՝ Մի՛ տայցէք նմա պատասխանի։ 37 Եւ եմուտ Եղիակիմ որդի Քեղկեայ հազարապետ եւ Սովմնաս դպրապետ եւ Յովաք որդի Ասափայ որ ի վերայ յիշատակաց՝ առ Եզեկիա, պատառեալ զհանդերձս, եւ պատմեցին նմա զպատգամս Ռափսակայ։ |