ԹԱԳԱՒՈՐՈՒԹԵԱՆՑ ՉՈՐՐՈՐԴ 12 - Գրաբար Աստվածաշունչ (1895)1 Յամին եւթներորդի Յէուայ թագաւորեաց Յովաս, եւ քառասուն ամ թագաւորեաց յԵրուսաղէմ. եւ անուն մօր նորա Սաբիա ի Բերսաբէէ։ 2 Եւ արար Յովաս ուղղութիւն առաջի Տեառն զամենայն աւուրս զորս լուսաւորեաց զնա Յովիդայէ քահանայ. 3 բայց ի բարձանցն ոչ մեկնեցան, եւ անդ տակաւին զոհէր ժողովուրդն, եւ արկանէր խունկս ի բարձունսն։ 4 Եւ ասէ Յովաս ցքահանայսն. Զամենայն արծաթ սրբութեանցն մտեալ ի տուն Տեառն, արծաթ՝ իւրաքանչիւր առն անցելոյ ի համարի ոգւոց, զամենայն արծաթ որ անկանիցի ի սիրտ մարդոյ բերել ի տուն Տեառն, 5 առցեն յիւրեանս քահանայքն, այր իւրաքանչիւր ի վաճառէ իւրեանց. եւ նոքա կազմեսցեն զբեդեկ տանն Տեառն՝ յամենայն իմիք ուր գտանիցի անդ բեդեկ։ 6 Եւ եղեւ ի քսաներորդի եւ յերրորդի ամի Յովասու արքայի՝ ոչ կազմեցին քահանայքն զբեդեկ տանն Տեառն։ 7 Եւ կոչեաց արքայ Յովաս զՅովիդայէ քահանայ եւ զքահանայսն եւ ասէ ցնոսա. Ընդէ՞ր ոչ կազմեցէք զբեդեկ տանն Տեառն. եւ արդ մի՛ եւս առնուցուք արծաթ յամենայն վաճառացն՝՝ ձերոց, այլ ի բեդեկ տանն Տեառն տաջիք զայն։ 8 Եւ ուխտեցին քահանայքն չառնուլ արծաթ ի ժողովրդենէն, եւ ոչ կազմել զբեդեկ տանն։ 9 Եւ ա՛ռ Յովիդայէ քահանայ տապանակ մի, եւ ծակեաց ծակ ի բերան նորա, եւ եդ զնա ի կողմանէ սեղանոյն Տեառն. եւ ետուն՝՝ քահանայքն որ պահէին զդուռնն՝ զամենայն արծաթ գտեալ ի տանն՝՝ Տեառն։ 10 Եւ եղեւ իբրեւ ետես եթէ բազում է ի տապանակի անդ, ել դպրապետն արքունի եւ քահանայն մեծ, եւ պնդեցին՝՝ զարծաթն գտեալ ի տան Տեառն. 11 եւ ետուն զարծաթն զպատրաստեալն ի ձեռս գործելեաց զգործս կահի տանն Տեառն. եւ ետուն ցհիւսունս փայտից եւ ցշինօղս գործել ի տան Տեառն, 12 եւ ցնկարիչս եւ ցճարտարս՝՝ եւ ցքարակոփս քարանց դնել փայտ եւ քարս տաշեալս, կազմել զբեդեկ տանն Տեառն, յամենայն ինչ յոր ելանիցէ ի տունն կազմել։ 13 Բայց զի մի՛ լինիցին՝՝ տանն Տեառն դրունք արծաթիք, բեւեռք եւ տաշտք եւ փողք, ամենայն անօթ ոսկի եւ անօթ արծաթի՝ յարծաթոյ մտելոյ ի տուն Տեառն, 14 այլ զի գործօնաց գործոյն տացեն զայն. եւ կազմեսցեն զտունն Տեառն։ 15 Եւ ոչ առնէին համար արանցն՝՝ յորոց ձեռս տային զարծաթն, տալ գործաւորաց գործոյն, զի յաւատ գործէին։ 16 Եւ արծաթ վասն մեղաց եւ վասն յանցանաց ոչ մտանէր ի տուն Տեառն, այլ քահանայիցն լինէր։ 17 Յայնժամ ել Ազայէլ արքայ Ասորւոց, եւ ետ պատերազմ ընդ Գեթայ եւ առ զնա. եւ եդ Ազայէլ զերեսս իւր ելանել ի վերայ Երուսաղեմի։ 18 Եւ ա՛ռ Յովաս արքայ Յուդայ զամենայն զսրբութիւնսն զոր սրբեաց Յովսափատ եւ Յովրամ եւ Ոքոզիա հարք նորա եւ թագաւորք Յուդայ, եւ զիւր սրբութիւնսն եւ զամենայն արծաթ գտեալ ի գանձս տան Տեառն եւ ի տան թագաւորին, եւ առաքեաց Ազայելի արքայի Ասորւոց, եւ գնաց յԵրուսաղեմէ։ 19 Եւ մնացորդք բանից Յովասու եւ ամենայն ինչ զոր արար, ո՞չ աւանիկ գրեալ են ի գիրս բանից աւուրց թագաւորացն Յուդայ։ 20 Եւ յարեան ծառայք նորա եւ եդին նմա դաւաճանութիւն, եւ հարին զՅովաս ի տան Մաաղոնայ բնակեալ ի Գաղաադ՝՝։ 21 Եւ Յովազաքար որդի Յեմաւութայ եւ Յեզեբութ որդի նորա, պանտանդք՝՝ ծառայք նորա, հարին զնա եւ սպանին. եւ թաղեցին զնա ընդ հարս իւր ի քաղաքի Դաւթի. եւ թագաւորեաց Ամասիա որդի նորա ընդ նորա։ |