ՄՆԱՑՈՐԴԱՑ ԵՐԿՐՈՐԴ 9 - Գրաբար Աստվածաշունչ (1895)1 Եւ թագուհին Սաբայ լուաւ զանուն Սողոմոնի, եւ եկն փորձել զՍողոմոն առակօք յԵրուսաղէմ, յոյժ ծանր զօրութեամբ, եւ ուղտուք որ բարձեալ բերէին խունկս եւ ոսկի բազում եւ ականս պատուականս. եւ եկն առ Սողոմոն, եւ խօսեցաւ ընդ նմա զամենայն որ ինչ էր ի միտս իւր։ 2 Եւ պատմեաց նմա Սողոմոն զամենայն բանս նորա, եւ ոչ վրիպեաց բան մի ի Սողոմոնէ զոր ոչ պատմեաց նմա։ 3 Եւ ետես թագուհին Սաբայ զիմաստութիւնն Սողոմոնի. եւ զտունն զոր շինեաց, 4 եւ զկերակուրս սեղանոցն, եւ զաթոռս՝՝ ծառայից նորա, եւ զկարգս պաշտօնէից նորա, եւ զպատմուճանս նոցա, եւ զմատռուակս նորա, եւ զզգեստն նոցա, եւ զողջակէզսն զոր մատուցանէր ի տանն՝՝ Տեառն, ի զարմացման եղեւ, եւ ասէ ցարքայ. 5 Ճշմարիտ էր բանն զոր լուայ յերկրին իմում յաղագս բանից քոց, եւ վասն իմաստութեան քո. 6 եւ ոչ հաւատացի բանիցն մինչեւ եկի եւ տեսին աչք իմ. եւ ահա ոչ է ի կէս զոր պատմեցինն, ի բազմութենէ իմաստութեանս քո զորս յաւելեր ի համբաւն զոր լուայ։ 7 Երանելիք են արքդ եւ երանելի կանայք քո, եւ՝՝ ծառայքդ այդոքիկ որք կան առ քեզ հանապազ եւ լսեն զիմաստութիւնդ քո։ 8 Եղիցի Տէր Աստուած քո օրհնեալ որ հաճեցաւ ընդ քեզ, տալ զքեզ յաթոռ թագաւորութեան իւրոյ՝ ժողովրդեան քում՝՝. զի յաղագս սիրելոյ Տեառն Աստուծոյ քո զԻսրայէլ եւ կացուցանելոյ զնա յաւիտեան՝ եդ զքեզ ի վերայ դոցա թագաւոր, առնել իրաւունս եւ արդարութիւն։ 9 Եւ ետ արքայի հարեւր եւ քսան տաղանդ ոսկւոյ, եւ խունկս բազում յոյժ, եւ ականս պատուականս. եւ ոչ գոյր իբրեւ զխունկսն զայնոսիկ զորս ետ տիկինն Սաբայ արքայի Սողոմոնի։ 10 Եւ ծառայքն Սողոմոնի եւ ծառայքն Քիրամայ բերին ոսկի Սողոմոնի ի Սովփերայ, եւ փայտս նոճս եւ ականս պատուականս։ 11 Եւ արար արքայ զփայտն նոճ՝ աստիճանս տանն Տեառն եւ տանն արքայի, եւ քնարս եւ տաւիղս երգեցողացն. եւ ոչ երբեք երեւեցաւ այնպէս յառաջագոյն յերկրին Յուդայ։ 12 Եւ արքայ Սողոմոն ետ տիկնոջն Սաբայ զամենայն զոր ինչ կամեցաւ նա եւ զոր ինչ խնդրեաց, բաց յայնցանէ զոր ետ արքայի Սողոմոնի. եւ դարձաւ յերկիրն իւր։ 13 Եւ էր կշիռ ոսկւոյն զոր բերին Սողոմոնի ի միում տարւոջ, վեց հարեւր եւ վաթսուն եւ վեց տաղանդ ոսկւոյ, 14 առանց արանցն կարգեցելոց եւ վաճառականացն որք բերէին. եւ յամենայն թագաւորութեանցն Արաբացւոց եւ յիշխանաց երկրին բերէին ոսկի եւ արծաթ արքայի Սողոմոնի։ 15 Եւ արար արքայ Սողոմոն երեք հարեւր՝՝ վահան ոսկի կռածոյ, վեց հարեւր դահեկան մաքուր ոսկի՝՝ ի մի վահան. 16 եւ երեք հարեւր նիզակ ոսկի կռածոյ, երեք հարեւր դահեկան ի մի նիզակ յիւրաքանչիւր ոք ի նոցանէ. եւ ետ զայն՝՝ արքայ ի տուն անտառին Լիբանանու։ 17 Եւ արար արքայ աթոռ ի ժանեաց փղաց մեծ, եւ պատեաց զնա մաքուր ոսկւով։ 18 Եւ վեց աստիճանք էին աթոռոյն կապեալք ոսկւով. եւ անկիւնք՝՝ աստի եւ անտի յաթոռն նստելոյ. եւ երկու առեւծք կային առ ոտս անկեանցն՝՝։ 19 Եւ երկոտասան առեւծք կային աստի եւ անտի առ վեց աստիճանսն. եւ ոչ երբեք եղեւ այնպիսի յամենայն թագաւորութեան ուրուք։ 20 Եւ ամենայն սպաս արքայի Սողոմոնի ոսկեղէն, եւ ամենայն սպաս տան անտառին Լիբանանու ոսկւով բեւեռեալ՝՝. եւ ոչինչ էր համարեալ արծաթ յաւուրս Սողոմոնի։ 21 Վասն զի նաւ արքայի Սողոմոնի երթայր ի Թարսիս ընդ ծառայսն Քիրամայ, եւ միանգամ յերիս ամս գայր նաւն ի Թարսսայ արքայի, լի ոսկւով եւ արծաթով եւ ժանեօք փղաց եւ կապկօք եւ սիրամարգօք։ 22 Եւ մեծացաւ Սողոմոն քան զամենայն թագաւորս ընչիւք եւ իմաստութեամբ։ 23 Եւ ամենայն թագաւորք երկրի խնդրէին զերեսս Սողոմոնի տեսանել, եւ լսել զիմաստութիւն նորա զոր ետ Աստուած ի սիրտ նորա։ 24 Եւ նոքա բերէին իւրաքանչիւր ոք ընծայ նմա՝ անօթս արծաթեղէնս եւ անօթս ոսկեղէնս եւ պատմուճանս, եւ ստաշխն եւ խունկս եւ ձիս եւ ջորիս ամի ամի։ 25 Եւ էին Սողոմոնի չորք բեւրք մատակ ձիք ի կառս, եւ երկոտասան հազարք երիվարք՝՝. եւ ետ զնոսա ի քաղաքս կառացն, եւ էին ընդ Սողոմոնի յԵրուսաղէմ։ 26 Եւ էր իշխան ամենայն թագաւորացն ի գետոյն Եփրատայ մինչեւ յերկիրն այլազգեաց, եւ մինչեւ ի սահմանս Եգիպտոսի։ 27 Եւ եդ արքայ զոսկի եւ՝՝ զարծաթ իբրեւ զքարինս յԵրուսաղէմ, եւ զփայտս մայրս իբրեւ զմոլաթզենիս ի դաշտս բազում։ 28 Եւ ելք ձիոցն Սողոմոնի յԵգիպտոսէ եւ յամենայն երկրէ։ 29 Եւ մնացորդք բանիցն Սողոմոնի առաջինք եւ վերջինք ահա գրեալ են ի բանս Նաթանայ մարգարէի, եւ ի բանս Աքիայ Սիլովնացւոյ, եւ ի տեսիլն Յովելայ տեսանողի վասն Յերոբովամայ որդւոյ Նաբատայ։ 30 Եւ թագաւորեաց արքայ Սողոմոն՝՝ ի վերայ ամենայն Իսրայելի ամս քառասուն։ 31 Եւ ննջեաց Սողոմոն, եւ թաղեցին զնա ի քաղաքին Դաւթի հօր իւրոյ։ Եւ թագաւորեաց Ռոբովամ որդի նորա փոխանակ նորա։ |