ՄՆԱՑՈՐԴԱՑ ԵՐԿՐՈՐԴ 8 - Գրաբար Աստվածաշունչ (1895)1 Եւ եղեւ յետ քսան ամաց յորս շինեաց Սողոմոն զտունն Տեառն եւ զտունն իւր, 2 եւ զքաղաքսն զոր ետ Քիրամ Սողոմոնի, շինեաց զնոսա Սողոմոն, եւ բնակեցոյց անդ զորդիսն Իսրայելի։ 3 Եւ եկն Սողոմոն յԵմաթ Սովբայ, եւ զօրացոյց զնա. 4 եւ շինեաց զԹադմոս յանապատին, եւ զամենայն քաղաքսն ամուրս շինեաց յԵմաթ. 5 եւ շինեաց զԲեթորոն վերին եւ զԲեթորոն ներքին, քաղաքս ամուրս պարսպօք եւ դրամբք եւ նգօք. 6 եւ զԲաղաաթ, եւ զամենայն քաղաքսն ամուրս որք էին Սողոմոնի, եւ զամենայն քաղաքս կառացն եւ զամենայն քաղաքս ձիոց. եւ զոր ինչ ցանկացաւ Սողոմոն ըստ ցանկութեան իւրում շինել յԵրուսաղէմ եւ ի Լիբանան եւ յամենայն թագաւորութեան իւրում։ 7 Ամենայն ժողովուրդ որ մնացեալ էր ի Քետացւոցն եւ յԱմովրհացւոցն եւ ի Փերեզացւոցն եւ ի Խեւացւոցն եւ ի Յեբուսացւոցն, որք ոչ էին յորդւոցն Իսրայելի, 8 այլ էին յորդւոց այնոցիկ որք մնացեալ էին ընդ նոսա՝՝ յերկրին զորս ոչ սատակեցին որդիքն Իսրայելի, եւ ած զնոսա Սողոմոն ի հարկատուս մինչեւ ցայսօր։ 9 Եւ յորդւոցն Իսրայելի ոչ ա՛ռ Սողոմոն ի ծառայս թագաւորութեան իւրոյ. վասն զի նոքա էին արք պատերազմողք եւ իշխանք զօրաւորք եւ իշխանք կառաց եւ երիվարաց, 10 եւ սոքա էին իշխանք հրամանաց թագաւորութեանն Սողոմոնի, երկերիւր եւ յիսուն գործավարք ժողովրդեանն։ 11 Եւ զդուստրն փարաւոնի եհան Սողոմոն ի քաղաքէն Դաւթի ի տունն զոր շինեաց նմա. վասն զի ասաց. Ոչ բնակեսցէ կին իմ ի քաղաքին Իսրայելի արքայի Դաւթի՝՝, վասն զի սուրբ է ուր եմուտ անդր տապանակն Տեառն։ 12 Յայնժամ եհան Սողոմոն ողջակէզս Տեառն ի վերայ սեղանոյն նորա զոր շինեաց յանդիման տաճարին, 13 եւ ըստ բանին աւուրց յաւուրս մատուցանել ըստ պատուիրանացն Մովսիսի ի շաբաթսն եւ յամսամուտսն եւ ի տօնսն. երիս ժամանակս ի տարւոջ, ի տօնի բաղարջակերացն, եւ ի տօնի եւթներորդացն, եւ ի տօնի տաղաւարահարացն։ 14 Եւ կացոյց ըստ իրաւանցն Դաւթի զդասս քահանայիցն ըստ պաշտաման նոցա. եւ Ղեւտացիքն ի վերայ պահպանութեանն իւրեանց, օրհնել եւ պաշտել առաջի քահանայիցն ըստ օրինին օր ըստ օրէ. եւ դռնապանք ըստ որոշմանն իւրեանց ի դրունս դրունս. վասն զի այսպէս էր պատուիրանն Դաւթայ առնն Աստուծոյ։ 15 Եւ ոչ անցին զպատուիրանօքն արքայի յաղագս քահանայից եւ Ղեւտացւոց, յամենայն բանի եւ ի գանձարանս։ 16 Եւ պատրաստեցաւ ամենայն գործն յօրէ յորմէ սկսաւ մինչեւ յօրն յորում կատարեաց Սողոմոն զտունն Տեառն։ 17 Յայնժամ գնաց Սողոմոն ի Գասիոնգաբեր, եւ յԵլաթ՝ որ առ ծովեզերն Հրէաստանի էր։ 18 Եւ առաքեաց Քիրամ ի ձեռն ծառայից իւրոց նաւս, եւ արս որ գիտէին նաւել ընդ ծովն, եւ գնացին ընդ ծառայսն Սողոմոնի ի Սովփերա. եւ առին անտի չորեքհարեւր եւ յիսուն տաղանդ ոսկւոյ, եւ եկին առ արքայ Սողոմոն։ |