ՄՆԱՑՈՐԴԱՑ ԵՐԿՐՈՐԴ 36 - Գրաբար Աստվածաշունչ (1895)1 Եւ ա՛ռ ժողովուրդ երկրին զՅովաքազ որդի Յովսեայ, եւ օծին զնա եւ՝՝ կացուցին զնա թագաւոր փոխանակ հօր նորա յԵրուսաղէմ։ 2 Որդի քսան եւ երից ամաց էր Յովաքազ ի թագաւորելն իւրում. եւ զերիս ամիսս թագաւորեաց յԵրուսաղէմ. եւ անուն մօր նորա Ամիտալ, դուստր Երեմիայի ի Ղոբնայ. եւ արար չար առաջի Տեառն՝ ըստ ամենայնի զոր ինչ արարին հարքն նորա։ 3 Եւ կապեաց զնա փարաւոն Նեքաւով ի Դեբղաթայ՝ յերկիրն Եմաթայ, ոչ եւս թագաւորել նմա յԵրուսաղէմ. եւ տարաւ զնա արքայն յԵգիպտոս՝՝. եւ արկ ի վերայ երկրին հարկ հարեւր տաղանդ արծաթոյ, եւ տաղանդ մի ոսկւոյ։ 4 Եւ կացոյց փարաւոն Նեքաւով զԵղիակիմ որդի Յովսեայ արքայի Յուդայ փոխանակ Յովսեայ հօր նորա՝՝. եւ փոխեաց զանուն նորա Յովակիմ. եւ զՅովաքազ եղբայր նորա ա՛ռ փարաւոն Նեքաւով, եւ տարաւ յԵգիպտոս. եւ մեռաւ անդ։ Եւ զարծաթն եւ զոսկին ետուն փարաւոնի. յայնմ հետէ սկսաւ տալ հարկս երկիրն. եւ ետուն զարծաթն ըստ բերանոյ փարաւոնի. եւ յիւրաքանչիւր ումեքէ ըստ զօրութեան իրոյ պահանջէին զարծաթն եւ զոսկին ի ժողովրդենէ երկրին, տալ զայն փարաւոնի Նեքաւովայ։՝՝ 5 Էր քսան եւ հինգ ամաց Յովակիմ ի թագաւորելն իւրում, եւ զմետասան ամ թագաւորեաց յԵրուսաղէմ. եւ անուն մօր նորա Զեկքովրայ դուստր Ներեայ ի Ռամայ. եւ արար չար առաջի Տեառն ըստ ամենայնի զոր ինչ արարին հարքն նորա։ Յաւուրս նորա ել Նաբուքոդոնոսոր արքայ Բաբելոնի յերկիրն. եւ ծառայեաց նմա ամիսս երիս, եւ ապստամբեաց ի նմանէ։ Եւ առաքեաց Տէր զՔաղդեացիսն եւ զաւազակսն Ասորեաց, եւ զաւազակսն Մովաբացւոց եւ որդւոցն Ամոնայ եւ Սամարիայ։ Եւ ի բաց կացին յետ բանիցս այսոցիկ ըստ բանի Տեառն ի ձեռն ծառայից իւրոց մարգարէից. սակայն սրտմտութիւն ի Տեառնէ էր ի վերայ Յուդայ, ի բաց բառնալ զնա յերեսաց իւրոց, վասն մեղացն Մանասէի յամենայնի զոր ինչ արար, եւ անպարտ արեանցն զոր եհեղ Մանասէ, եւ ելից զԵրուսաղէմ անպարտ արեամբ. եւ ոչ կամեցաւ Տէր սատակել զնոսա՝՝։ 6 Եւ ել ի վերայ նորա Նաբուքոդոնոսոր արքայ Բաբելոնի, եւ կապեաց զնա պղնձի կապանօք եւ տարաւ՝՝ զնա ի Բաբելոն։ 7 Եւ մասն ինչ ի սպասուց տանն Տեառն տարաւ ի Բաբելոն, եւ եդ զայն ի տաճարին իւրում որ ի Բաբելոն։ 8 Եւ մնացեալ բանքն Յովակիմայ եւ ամենայն ինչ զոր արար՝՝, ո՞չ աւանիկ գրեալ են նոքա ի գիրս բանից աւուրց թագաւորացն Յուդայ։ Եւ ննջեաց Յովակիմ ընդ հարս իւր, եւ թաղեցաւ ի Գանովզայ՝ ընդ հարս իւր.՝՝ եւ թագաւորեաց Յեքոնիա որդի նորա փոխանակ նորա։ 9 Որդի ութեւտասն ամաց էր Յեքոնիաս ի թագաւորելն իւրում, եւ ամիսս երիս եւ աւուրս տասն թագաւորեաց յԵրուսաղէմ եւ արար չար առաջի Տեառն։ 10 Եւ ի դառնալ տարւոյն առաքեաց արքայն Նաբուքոդոնոսոր եւ տարաւ զնա ի Բաբելոն, հանդերձ ցանկալի սպասուք տանն Տեառն. եւ թագաւորեցոյց զՍեդեկիաս եղբայր հօր նորա ի վերայ Յուդայ յԵրուսաղէմ։ 11 Ամաց քսան եւ միոյ էր Սեդեկիաս ի թագաւորելն իւրում, եւ մետասան ամ թագաւորեաց յԵրուսաղէմ։ 12 Եւ արար չար առաջի Տեառն Աստուծոյ իւրոյ. ոչ պատկառեաց յերեսաց Երեմիայի մարգարէի եւ ի բանիցն՝՝ Տեառն։ 13 Եւ յապստամբելն նորա ի Նաբուքոդոնոսորայ արքայէ, եւ անցանելոյ զերդմամբքն զոր երդմնեցոյց զնա յԱստուած իւր, խստացոյց զպարանոց իւր, եւ զսիրտ իւր կարծրացոյց՝ ոչ եւս դառնալ առ Տէր Աստուած Իսրայելի։ 14 Եւ ամենայն փառաւորքն Յուդայ, եւ քահանայք՝՝ եւ ժողովուրդք երկրին յաճախեցին անօրինել անօրէնութիւնս ըստ գարշելեաց ազգացն, եւ պղծեցին զտունն Տեառն յԵրուսաղէմ։ 15 Եւ առաքեաց Տէր Աստուած հարցն նոցա ի ձեռն մարգարէիցն կանխեալ առաքեաց զհրեշտակս իւր՝՝. վասն զի խնայէր ի ժողովուրդն իւր եւ ի սրբութիւնն իւր։ 16 Արհամարհէին զհրեշտակս նորա, եւ անգոսնէին զբանս նորա, եւ խաղ առնէին զմարգարէսն. մինչեւ եղեւ բարկութիւն Տեառն ի վերայ ժողովրդեան իւրոյ, եւ ոչ եւս գոյր այնուհետեւ նոցա բժշկութիւն։ 17 Եւ ած ի վերայ նոցա զթագաւորն Քաղդէացւոց. կոտորեաց զերիտասարդս նոցա սրով ի տան սրբութեան իւրոյ, եւ ոչ խնայեաց ի Սեդեկիաս. կուսանաց նոցա ոչ ողորմեցաւ, եւ զծերս նոցա զամենեսեան մատնեաց ի ձեռս նոցա՝՝։ 18 Եւ զամենայն սպաս տանն Աստուծոյ զմեծամեծս եւ զփոքունս, եւ զամենայն գանձն՝՝ արքային եւ մեծամեծացն, զամենայն տարաւ ի Բաբելոն։ 19 Եւ այրեաց զտունն Տեառն, եւ կործանեաց զպարիսպն Երուսաղեմի, եւ զապարանսն որ ի նմա այրեաց հրով, եւ զամենայն անօթ գեղեցիկ ապականեաց։ 20 Եւ գերեաց զմնացորդսն ի Բաբելոն. եւ էին անդ՝ նմա եւ որդւոց նորա ի ծառայութիւն, մինչեւ ի թագաւորութիւնն Մարաց. 21 առ ի լնուլ բանին Տեառն ի բերանոյ Երեմիայի, մինչեւ ընկալաւ երկիրն զշաբաթս իւր. եւ շաբաթանալով զամենայն աւուրս աւերածոյն իւրոյ, շաբաթացաւ ի կատարումն ամացն եւթանասնից։ 22 Յառաջնում ամին Կիւրոսի արքայի Պարսից, յետ լնլոյ բանին Տեառն ի բերանոյ Երեմիայի, զարթոյց Տէր զհոգի Կիւրոսի Պարսից արքայի. եւ պատուիրեաց քարոզել յամենայն թագաւորութեանն իւրում գրով եւ ասել։ 23 Այսպէս ասէ Կիւրոս արքայ Պարսից. Զամենայն թագաւորութիւնս երկրի ետ ինձ Տէր Աստուած երկնից. եւ նա պատուիրեաց ինձ շինել իւր տուն յԵրուսաղէմ ի Հրէաստանի։ Որ ոք ի ձէնջ յամենայն ժողովրդենէ նորա իցէ, Տէր Աստուած իւր եղիցի ընդ նմա, եւ ելցէ։ |