ՄՆԱՑՈՐԴԱՑ ԵՐԿՐՈՐԴ 31 - Գրաբար Աստվածաշունչ (1895)1 Եւ իբրեւ կատարեցաւ այն ամենայն, ել ամենայն Իսրայէլ գտեալքն՝ ի քաղաքսն Յուդայ, եւ փշրեցին զարձանսն եւ կոտորեցին զանտառսն եւ կործանեցին զբարձրաւանդակսն եւ զբագինսն յամենայն Հրէաստանի եւ Բենիամինի եւ յԵփրեմի եւ ի Մանասէի մինչեւ ի սպառ. եւ դարձաւ ամենայն Իսրայէլ իւրաքանչիւր ոք ի ժառանգութիւն իւր, եւ ի քաղաքսն իւրեանց։ 2 Եւ կարգեաց Եզեկիաս հանապազորդեան պաշտօնեայս քահանայից եւ Ղեւտացւոց, զհանապազօրեայս իւրաքանչիւր ուրուք ըստ պաշտաման իւրում, քահանայից եւ Ղեւտացւոց, յողջակէզսն եւ ի զոհսն փրկութեան, եւ յօրհնելն եւ խոստովան լինել եւ պաշտել ի դրունս սրահից տանն Տեառն։ 3 Եւ մասն թագաւորին յընչից իւրոց յողջակէզսն առաւօտու եւ երեկորին, եւ յողջակէզսն շաբաթուցն եւ ամսամտիցն եւ ի տօնսն գրեալս յօրէնս Տեառն։ 4 Եւ ասաց ժողովրդեանն որ բնակէին յԵրուսաղէմ, տալ զմասն քահանայիցն եւ Ղեւտացւոց, զի զօրասցին ի սպասու տանն Տեառն։ 5 Եւ որպէս հրամայեաց բանն, յաւելին եւս որդիքն Իսրայելի զպտուղ ցորենոյն եւ գինւոյ եւ ձիթոյ եւ մեղու, եւ զամենայն արմտեաց անդաստանաց, եւ զտասանորդսն զամենայն բերին բազում յոյժ։ 6 Եւ որդիքն Իսրայելի եւ Յուդայ, որք բնակեալ էին ի քաղաքսն Յուդայ, եւ նոքա ածին զտասանորդս զուարակացն եւ ոչխարաց, եւ՝՝ բերեալ կուտեցին շեղջս շեղջս։ 7 Յամսեանն երրորդի սկսան շեղջքն սկիզբն առնուլ, եւ յեւթներորդում ամսեանն կատարեցան։ 8 Եւ եկն Եզեկիաս եւ իշխանքն եւ տեսին զշեղջսն, եւ օրհնեցին զՏէր եւ զժողովուրդ նորա զԻսրայէլ։ 9 Եւ հարցանէր Եզեկիաս ցքահանայսն եւ ցՂեւտացիսն վասն շեղջոցն։ 10 Եւ ասէ ցնա Ազարիաս քահանայ՝ իշխան ի տանէն Սադովկայ. Յորմէ հետէ սկսան զպտուղսդ բերել ի տուն Տեառն, կերաք եւ արբաք եւ թողաք զմնացորդսդ. վասն զի Տէր օրհնեաց զժողովուրդդ իւր, եւ մնաց եւս յոլովութիւնդ այդ։ 11 Եւ ասէ Եզեկիաս. Պատրաստեցէք եւ այլ եւս շտեմարանս ի տանն Տեառն։ Եւ պատրաստեցին։ 12 Եւ բերին անդր զպտուղսն եւ զտասանորդսն հաւատովք. եւ էր նոցա վերակացու Քովքենիաս Ղեւտացի, եւ Սեմէի եղբայր նորա փոխանորդ նորին, 13 եւ Յէքիէլ եւ Ոզիաս եւ Նաթան եւ Ասայէլ եւ Յերիմովթ եւ Յովզաբադ եւ Եղիէլ եւ Սամաքիա եւ Մաաթ եւ Բանեա, եւ որդիք նորա՝՝ որք կային անդ ի ձեռն Քովքենեայ եւ Սեմեայ եղբօր նորա, որպէս եւ հրամայեաց արքայ Եզեկիաս, եւ Ազարիաս առաջնորդ տանն Տեառն։ 14 Եւ Կորէ որդի Յեմնայ Ղեւտացի՝ դռնապանն ընդ արեւելս կողմն ի վերայ տանեացն տալ զպտուղսն Տեառն, եւ զսրբութիւն սրբութեանցն, 15 ի ձեռն Ոդոմայ եւ Մինիամինի եւ Յեսուայ եւ Սեմեայ եւ Մարիսայ եւ Սեքինեայ, ի ձեռն քահանայիցն հաւատարմութեամբ, տալ եղբարցն նոցա ըստ հանապազորդեան պաշտօնէիցն, ըստ մեծի եւ փոքու, 16 բաց ի ծննդոց՝՝ արուացն յերեմենիցն եւ ի վեր. եւ ամենայնի որ մտանէր ի տուն Տեառն ի համարի աւուրցն յաւուրս, ի պաշտօնն հանապազորդեան ըստ կարգին իւրեանց։ 17 Եւ այս էր համար՝՝ քահանայիցն ըստ տանց տոհմիցն, եւ Ղեւտացիքն ի հանապազորդեան պաշտամանն ի քսանամենից եւ ի վեր, ի կարգի ըստ համարուն. 18 յամենայն ծնունդս՝՝ ուստերաց նոցա եւ դստերաց, հանդերձ ամենայն յոլովութեամբ. վասն զի հաւատովք սրբեցին զսրբութիւն՝՝։ 19 Եւ որդւոցն Ահարոնի, որք լինէին քահանայք. եւ ի քաղաքացն նոցա՝՝, յամենայն քաղաքի արք անուանիք որք անուանեցան տալ զբաժին ամենայն արուի քահանայիցն, եւ յամենայնի որ մտեալ էր ի թիւ Ղեւտացւոցն։ 20 Եւ արար այնպէս Եզեկիաս յամենայն Յուդա. եւ արար բարի եւ ուղղութիւն առաջի Տեառն Աստուծոյ իւրոյ։ 21 Եւ ամենայն գործովք որովք սկսաւ գործել ի տանն Տեառն՝՝, ըստ օրինացն Տեառն եւ ըստ հրամանաց, խնդրեաց զԱստուած իւր յամենայն սրտէ իւրմէ, արար եւ յաջողեցաւ։ |