ՄՆԱՑՈՐԴԱՑ ԵՐԿՐՈՐԴ 2 - Գրաբար Աստվածաշունչ (1895)1 Եւ ասաց Սողոմոն շինել զտուն անուան Տեառն, եւ զտուն թագաւորութեան իւրոյ։ 2 Եւ ժողովեաց Սողոմոն եւթանասուն հազար արանց բեռնակրաց, եւ ութսուն հազար քարահատաց ի լերինս. եւ վերակացուք նոցա երեք հազար եւ վեց հարեւր։ 3 Եւ առաքեաց Սողոմոն առ Քիրամ արքայ Տիւրոսի եւ ասէ. Որպէս արարեր ընդ հօրն իմոյ Դաւթի, եւ ետուր նմա մայր փայտս՝ շինել իւր տուն բնակելոյ ի նմա, 4 եւ արդ ահա ես որդի նորա՝՝ շինեմ տուն անուան Տեառն Աստուծոյ իմոյ, սրբել զնա նմա, ծխել առաջի նորա խունկս եւ առաջադրութիւնս յամենայն ժամ, եւ մատուցանել ողջակէզս հանապազ առաւօտուց եւ երեկորին, եւ ի շաբաթս եւ յամսամուտս եւ ի տօնս Աստուծոյ մերոյ, յաւիտեան զայն յԻսրայելի։ 5 Եւ տունս զոր ես շինեմ՝ մեծ է. վասն զի մեծ է Աստուած մեր քան զամենայն աստուածս. 6 եւ ո՛ կարասցէ շինել նմա տուն. զի եթէ երկինք եւ երկնից երկինք ոչ տանին զփառս նորա, եւ զի՞նչ ես՝՝ շինեցից նմա տուն, այլ զի ծխեսցեն խունկս առաջի նորա։ 7 Եւ արդ առաքեա ինձ այր իմաստուն, որ գիտիցէ գործել զոսկի եւ զարծաթ եւ զպղինձ եւ զերկաթ եւ զծիրանի եւ զկարմիր եւ զկապուտակն եւ զբեհեզն՝՝, եւ որ գիտիցէ քանդակել զքանդակս ընդ իմաստունս իմ, որք են ի Հրէաստանի եւ յԵրուսաղէմ, զորս պատրաստեաց Դաւիթ հայր իմ։ 8 Եւ տուր բերել ինձ փայտս մայրս եւ սարոյս եւ թեղօշս ի Լիբանանէ. վասն զի ես գիտեմ, իբրեւ զծառայս քո ոչ ոք գիտէ հատանել փայտ ի Լիբանանէ. եւ արդ ծառայք քո երթիցեն ընդ ծառայս իմ, 9 պատրաստել ինձ փայտ բազում. վասն զի տունս զոր ես շինեմ, է մեծ եւ փառաւոր։ 10 Եւ գործօնէիցն որք հատանեն զփայտն՝ ի կերակուր ետու հաց ռոճիկ ծեռայից քոց, քսան հազար քոռ ցորենոյ, եւ քսան հազար քոռ գարւոյ, եւ քսան հազար չափ գինւոյ, եւ ձէթ քսան հազար չափ։ 11 Եւ ասաց Քիրամ արքայ Տիւրոսի գրով, եւ արձակեաց առ Սողոմոն. Վասն սիրելոյ Տեառն զժողովուրդ իւր՝ ետ զքեզ ի վերայ դոցա թագաւոր։ 12 Եւ ասէ Քիրամ. Օրհնեալ է Տէր Աստուած Իսրայելի որ արար զերկինս եւ զերկիր, որ ետ Դաւթի արքայի որդի իմաստուն՝ գիտել զհանճար եւ զիմաստութիւն, որ շինեսցէ զտունն Տեառն եւ զտուն թագաւորութեան իւրոյ։ 13 Եւ արդ ահա առաքեցի քեզ այր իմաստուն, որ գիտէ զհանճար զՔիրամ զծառայ իմ. 14 մայր դորա է ի դստերացն Դանայ, եւ հայր դորա՝ այր Տիւրացի. գիտէ գործել զոսկի եւ զարծաթ եւ զպղինձ եւ զերկաթ եւ զքարինս եւ զփայտս, եւ անկանել զծիրանին եւ զկապուտակն եւ զբեհեզն եւ զկարմիրն եւ քանդակել քանդակս, եւ իմանալ զամենայն հնարս զորս տացես ցդա՝ ընդ իմաստունս քո եւ ընդ իմաստունս Դաւթի տեառն իմոյ հօր քո։ 15 Եւ արդ զցորեանն եւ զգարին եւ զձէթն եւ զգինին, զոր ասաց տէր իմ, տացէ ծառայից իւրոց. 16 եւ մեք հատանեմք փայտ ի Լիբանանէ ըստ ամենայն պիտոյից քոց. եւ ածցուք զնոսա ընդ ծով լաստս ի Յոպպէ, եւ հաւաքեսցես զայն յԵրուսաղէմ։ 17 Եւ ժողովեաց Սողոմոն զամենայն արս պանդուխտս յԵրուսաղէմ զկնի թուոյն զոր թուեաց զնոսա Դաւիթ հայր նորա, եւ գտան հարեւր յիսուն հազար եւ երեք հազար եւ վեց հարեւր. 18 եւ արար ի նոցանէ եւթանասուն հազար բեռնակրաց եւ ութսուն հազար քարահատաց եւ զերիս հազարսն եւ վեց հարեւրսն՝ գործավարս ի վերայ նոցա։ |