ՄՆԱՑՈՐԴԱՑ ԵՐԿՐՈՐԴ 17 - Գրաբար Աստվածաշունչ (1895)1 Եւ թագաւորեաց Յովսափատ որդի նորա փոխանակ նորա. եւ զօրացաւ Յովսափատ ի վերայ Իսրայելի։ 2 Եւ ետ զօրս յամենայն քաղաքսն Յուդայ յամուրս, եւ կացոյց իշխանս յամենայն քաղաքսն՝՝ Եփրեմի, զորս ա՛ռ արքայ Ասա հայրն նորա։ 3 Եւ եղեւ Տէր ընդ Յովսափատայ. վասն զի գնաց ի ճանապարհս հօր իւրոյ յառաջինս, եւ ոչ խնդրեաց զկուռսն, 4 այլ զՏէր Աստուած հօր իւրոյ խնդրեաց, եւ ի պատուիրանս հօրն իւրոյ՝՝ գնաց. եւ ոչ էին իբրեւ զԻսրայելի գործք նորա։ 5 Եւ յաջողեցաւ թագաւորութիւնն՝՝ ի ձեռս նորա. եւ ետ ամենայն Յուդայ ընծայ Յովսափատայ, եւ եղեն նորա մեծութիւն եւ փառք բազումք. 6 եւ բարձրացաւ սիրտ նորա ի ճանապարհս Տեառն. եւ այլ եւս եբարձ զբարձաւանդակսն, եւ զանտառսն յերկրէն Յուդայ։ 7 Եւ յերրորդ ամի թագաւորութեանն իւրոյ առաքեաց զիշխանս իւր եւ զորդիս զօրութեանցն՝՝ զԱբդիաս եւ զԶաքարիաս եւ զՆաթանայէլ եւ զՄիքիաս՝ ուսուցանել ի քաղաքսն Յուդայ. 8 եւ ընդ նոսա Ղեւտացիքն Սամուիաս եւ Նաթանաաս եւ Զաբդիաս եւ Ասիէլ եւ Սեմիրամովթ եւ Յովնաթան եւ Ադոնիաս եւ Տոբադոնիաս՝ Ղեւտացիք. եւ ընդ նոսա Եղիսամա եւ Յովրամ քահանայք. 9 եւ ուսուցանէին զՅուդա, եւ ընդ նոսա գիրք օրինացն Տեառն, եւ անցանէին ընդ քաղաքսն Յուդայ, եւ ուսուցանէին զժողովուրդն։ 10 Եւ եղեն արհաւիրք ի Տեառնէ ի վերայ թագաւորաց երկրին որ շուրջ զՅուդայիւ, եւ ոչ պատերազմէին ընդ Յովսափատայ։ 11 Եւ յայլազգեացն բերէին Յովսափատայ ընծայս ոսկի եւ արծաթ եւ պատարագս՝՝, եւ Արաբացիքն ածէին նմա խոյս յոչխարաց՝ եւթն հազար եւ եւթն հարեւր, եւ նոխազս եւթն հազար եւ եւթն հարեւր։ 12 Եւ երթալով Յովսափատ մեծանայր ի բարձրութիւն. եւ շինեաց տունս ի Հրէաստանի քաղաքս ամուրս՝՝։ 13 Եւ գործք բազումք եղեն նորա ի Հրէաստանի. եւ արք զօրաւորք պատերազմօղք ուժով յԵրուսաղէմ։ 14 Եւ այս էր թիւ նոցա ըստ տանց տոհմիցն իւրեանց. ի Յուդայի հազարապետք՝ Եդնաս իշխան, եւ ընդ նմա որդիք զօրաւորք զօրութեամբ երեք հարեւր հազար. 15 եւ ընդ նոսա՝՝ Յովնան իշխան, եւ ընդ նմա երկերիւր ութսուն հազար. 16 եւ ընդ նմա՝՝ Ամասէաս որդի Զաքարեայ յօժարեալն ի Տէր, ընդ նմա երկերիւր հազար զօրաւորք ուժով։ 17 Եւ ի Բենիամինէ զօրաւոր ուժով Եղիադա, եւ ընդ նմա աղեղնաւորք եւ պարսաւորք երկերիւր հազար. 18 եւ ընդ նոսա՝՝ Յովզաբադ, եւ ընդ նմա հարեւր եւ ութսուն հազար զօրաւորք ի պատերազմի։ 19 Սոքա էին պաշտօնեայք արքային, բաց յայնցանէ զորս եդ արքայ ի քաղաքսն ամուրս յամենայն Հրէաստանի։ |