Biblia Todo Logo
Bìoball air-loidhne

- Sanasan -

ԹԱԳԱՒՈՐՈՒԹԵԱՆՑ ԱՌԱՋԻՆ 21 - Գրաբար Աստվածաշունչ (1895)

1 Եւ եկն Դաւիթ ի Նոմբա՝ առ Աքիմելէք քահանայ. եւ զարհուրեցաւ Աքիմելէք ի պատահել նորա, եւ ասէ ցնա. Զի՞ է զի դու միայն ես՝ եւ ոչ ոք է ընդ քեզ։

2 Եւ ասէ Դաւիթ ցԱքիմելէք քահանայ. Բան ինչ հրամայեալ է ինձ արքայի այսօր, եւ ասէ ցիս՝ Մի՛ ոք գիտասցէ զբանն վասն որոյ առաքեցի զքեզ, եւ վասն որոյ պատուիրեցի քեզ. եւ հրաման ետու մանկտւոյն ի տեղւոջն որ կոչի Աստուծոյ հաւատարմութիւն, փելմոնի ելմոնի՝՝։

3 Եւ արդ եթէ իցեն ի ձեռին քում հինգ նկանակ հացի, տուր ի պէտս իմ, թէ որչափ եւ գտանիցի։

4 Պատասխանի ետ քահանայն Աստուծոյ եւ ասէ ցԴաւիթ. Ոչ կայ հաց պիղծ ընդ ձեռամբ իմով, այլ հաց սրբութեան. եւ եթէ իցեն զգուշացեալ մանկտին ի կանանց, կերիցեն։

5 Պատասխանի ետ Դաւիթ քահանային եւ ասէ ցնա. Ի կանանց մեկուսի եմք յերեկէ եւ յեռանդէ, յելանել ինձ ի ճանապարհս սրբեցան եւ մանկտին, զի եւ ճանապարհս իսկ պիղծ է. եւ վասն այնորիկ այսօր սրբեսցի գործովս իմով՝՝։

6 Եւ ետ նմա Աքիմելէք քահանայ՝՝ ի զառաջաւոր հացէն. զի չգոյր անդ հաց, բաց ի հացէն երեսաց, առեալ յերեսաց Տեառն, դնել առաջի հաց ջերմ յաւուրն յորում առ զայն։

7 Եւ անդ էր մի ի ծառայիցն Սաւուղայ յաւուր յայնմիկ նեղեալ նեսարաւ՝՝ առաջի Տեառն. եւ անուն նորա Դովեկ Ասորի, արածէր զջորիս՝՝ Սաւուղայ։

8 Եւ ասէ Դաւիթ ցԱքիմելէք. Եթէ իցէ՞ աստ ընդ ձեռամբ քով գեղարդն կամ սուսեր. զի զսուսեր իմ եւ զկազմած իմ ոչ առի ի ձեռին իմում. քանզի բանն արքայի ստիպեաց զիս։

9 Եւ ասէ քահանայն. Ահա սուսերն Գողիադու այլազգւոյ Փղշտացւոյ զոր սպաներ ի հովիտսն Եղայ. եւ այն պատեալ կայ ձորձով յետոյ վակասին. եթէ զայն առնուս ընդ քեզ՝ ա՛ռ, զի ոչ գոյ աստ բաց յայնմանէ։ Եւ ասէ Դաւիթ. Չիք իբրեւ զնա, տուր ցիս զայն։ Եւ ետ նմա զայն։

10 Եւ յարեաւ Դաւիթ եւ փախեաւ յաւուր յայնմիկ յերեսաց Սաւուղայ, եւ եկն Դաւիթ առ Անքուս արքայ Գեթայ։

11 Եւ ասեն ծառայքն Անքուսայ ցնա. Ո՞չ սա է Դաւիթ թագաւոր երկրին. ո՞չ սմա նուագէին պարաւորքն եւ ասէին՝ Եհար Սաւուղ զհազարս, եւ Դաւիթ զբեւրս։

12 Եւ եդ Դաւիթ զբանսն ի սրտի իւրում, եւ երկեաւ յոյժ յերեսաց Անքուսայ արքայի Գեթայ.

13 եւ այլակերպեաց առաջի նոցա զերեսս իւր, եւ պատճառեցաւ յաւուր յայնմիկ. եւ կաքաւէր առ դուրս քաղաքին՝՝, եւ ծորեցուցանէր զլորձունս իւր ի վերայ մօրուաց իւրոյ, եւ յափսիթերս խաղայր։՝՝

14 Եւ ասէ Անքուս ցծառայս իւր. Ահա տեսէք զայրն այսահար, եւ ընդէ՞ր մուծէք զնա առ իս։

15 Միթէ կարօ՞տ ինչ իցեմ ես այսահարօք, զի ածէք զդա այսահարել առաջի իմ. մի՛ մտցէ՝՝ դա ի տուն։

Հայաստանի Աստվածաշնչային Ընկերություն, 2018

Bible Society of Armenia, 2018

Bible Society of Armenia
Lean sinn:



Sanasan