ՊԵՏՐՈՍԻ ԱՌԱՋԻՆ՝՝ 1 - Գրաբար Աստվածաշունչ (1895)ԲԶ. 1 Պետրոս, առաքեալ Յիսուսի Քրիստոսի, ընտրելոցդ՝ նժդեհից որ ի սփիւռս Պոնտացւոց, Գաղատացւոց եւ Կապադովկեցւոց եւ Ասիացւոց եւ Բիւթանացւոց, 2 ըստ կանուխ գիտութեանն Աստուծոյ Հօր, սրբութեամբ Հոգւոյն, ի հնազանդութիւն եւ ի հեղումն արեանն Յիսուսի Քրիստոսի. շնորհք ընդ ձեզ եւ խաղաղութիւն բազմասցի։ 3 Օրհնեալ է Աստուած եւ Հայր Տեառն մերոյ Յիսուսի Քրիստոսի, որ ըստ բազում ողորմութեան իւրում ծնաւ զմեզ վերստին ի յոյսն կենդանի ի ձեռն յարութեանն Յիսուսի Քրիստոսի ի մեռելոց, 4 յանեղծ եւ յանարատ եւ յանթառամ ժառանգութիւնն որ պահեալ է յերկինս ձեզ, 5 որ զօրութեամբն Աստուծոյ պահեալ էիք հաւատովք ի պատրաստեալ փրկութիւնն, յայտնել ի յետին ժամանակս. 6 որով ուրախ լինիջիք որք այժմ սակաւիկ ինչ ըստ պատշաճի իրացդ տրտմեալ էք ի պէսպէս փորձութիւնս. 7 զի հանդէս ձերոց հաւատոցն առաւել քան զոսկի կորստական պատուական է, որ հրով փորձեալ գտաւ՝՝ ի գովութիւն եւ ի փառս եւ ի պատիւ ի յայտնութեանն Յիսուսի Քրիստոսի, 8 զոր ոչն տեսէք եւ սիրեցէք, ընդ որ այժմ ոչ հայեցեալք բայց հաւատացէք, եւ ուրախ էք անճառ եւ փառաւորեալ խնդութեամբն. 9 ընկալեալ զկատարումն հաւատոցն ձերոց՝ զոգւոցն փրկութիւն։ 10 Վասն որոյ փրկութեան խնդրեցին եւ քննեցին մարգարէքն, որք վասն որոյ ի ձեզ լինելոց էին շնորհքն՝ մարգարէանային. 11 քննէին յորում եւ յորպիսի ժամանակի գուշակէր ի նոսա Հոգին Քրիստոսի, որ նախ չարչարանացն Քրիստոսի վկայէր, եւ յետ այնորիկ զփառացն։ 12 Որոց եւ յայտնեցաւ իսկ զի ոչ եթէ անձանց, այլ մեզ մատակարարք լինէին նոցին, որք այժմ պատմեցան այնոքիւք որ աւետարանեցինն ձեզ Հոգւովն Սրբով, որ առաքէրն յերկնից. զոր ցանկային տեսանել գոնեայ ընդ աղօտ հրեշտակք։ ԲԷ. 13 Որով պնդեալ զմէջս մտաց ձերոց, զուարթացեալք, բովանդակ սպասեցէք հասելոց ձեզ շնորհացն ի յայտնութեանն Յիսուսի Քրիստոսի, 14 իբրեւ զորդիս հնազանդութեան, մի՛ կերպարանեալք առաջին ձերովք անգիտութեանն ցանկութեամբք. 15 այլ ըստ Սրբոյն որ կոչեաց զձեզ՝ եւ դուք սուրբք յամենայն գնացս ձեր լինիջիք։ 16 Վասն որոյ գրեալ է եթէ՝ Եղերուք սուրբ, զի ես սուրբ եմ։ 17 Եւ եթէ Հայր կոչիցէք զայն որ առանց ակնառութեան դատի ըստ իւրաքանչիւր գործոց, ապա երկիւղիւ զձերոյ պանդխտութեան ժամանակդ գնասջիք։ 18 Գիտասջիք զի ոչ ապականացու արծաթեղինօք եւ ոսկեղինօքն փրկեցարուք ի ձերոց ունայնութեան հայրենատուր գնացիցն, 19 այլ պատուական արեամբն Քրիստոսի, իբրեւ անբիծ եւ անարատ գառին. 20 որ յառաջծանօթն էր նախ քան զիսկզբանէ աշխարհի, եւ երեւեցաւ ի վախճան ժամանակաց վասն ձեր, 21 որք նովաւ հաւատացէք յԱստուած որ յարոյց զնա ի մեռելոց, եւ ետ նմա փառս. զի հաւատքն ձեր եւ յոյս իցեն յԱստուած։ 22 Զանձինս ձեր սրբել հնազանդութեամբ ճշմարտութեան, յեղբայրսիրութեան առանց կեղծաւորութեան, ի սուրբ սրտէ սիրել սերտիւ զմիմեանս։ 23 Ծնեալք վերստին ոչ յապականութեան սերմանէն, այլ յանապականացուէն՝ կենդանի եւ մշտնջենական բանիւն Աստուծոյ։ 24 Քանզի ամենայն մարմին իբրեւ զխոտ է, եւ ամենայն փառք մարդոյ իբրեւ զծաղիկ խոտոյ. խոտն ցամաքեցաւ եւ ծաղիկն թօթափեցաւ. 25 եւ բան Տեառն մնայ յաւիտեան, այսինքն է բանն որ ի ձեզ աւետարանեցաւ։ |