ԹԱԳԱՒՈՐՈՒԹԵԱՆՑ ԵՐՐՈՐԴ 14 - Գրաբար Աստվածաշունչ (1895)1 Ի ժամանակին յայնմիկ հիւանդացաւ Աբիա որդի Յերոբովամայ։ 2 Եւ ասէ Յերոբովամ ցկին իւր. Արի եւ այլակերպեաց, եւ մի՛ գիտասցեն թէ դու կին Յերոբովամայ իցես, եւ երթիցես ի Սելով. ահա անդ է Աքիա մարգարէ. նա խօսեցաւ վասն իմ թագաւորել ի վերայ ժողովրդեանս այսորիկ. 3 եւ ա՛ռ ի ձեռին քո առնն Աստուծոյ՝՝ հաց, եւ բլիթս որդւոց նորա, եւ չամիչ՝՝ եւ ստոման մի մեղու, եւ երթիցես առ նա, եւ պատմեսցէ քեզ զինչ լինելոց իցէ մանկանն։ 4 Եւ արար այնպէս կինն Յերոբովամու, եւ յարեաւ եւ գնաց ի Սելով, եւ եմուտ ի տուն Աքիայ. եւ այրն ծերացեալ ի տեսանելոյ. եւ վատեալ աչք իւր ի ծերութենէ իւրմէ։ 5 Եւ ասէ Տէր ցԱքիա. Ահա կինն Յերոբովամայ գայ հարցանել բան ի քէն վասն որդւոյ իւրոյ, զի հիւանդ է. զայս ինչ եւ զայս ասասցես նմա. եւ եղեւ ի մտանելն նորա, եւ ինքն յանծանօթս լինէր։ 6 Եւ եղեւ իբրեւ լուաւ Աքիա զձայն ոտից նորա, ի մտանելն նորա եւ ի բանալ՝՝, ասէ. Մուտ, կին Յերոբովամու. ընդէ՞ր իցէ այդ զի յանծանօթս լինիս. եւ ես եմ առաքեալ առ քեզ խստութեամբ։ 7 Երթ եւ ասա ցՅերոբովամ. Այսպէս ասէ Տէր Աստուած Իսրայելի. Փոխանակ զի բարձրացուցի զքեզ ի միջոյ ժողովրդեանդ, եւ ետու զքեզ յառաջնորդ ի վերայ ժողովրդեան իմոյ Իսրայելի, 8 եւ պատառեցի զթագաւորութիւնն ի տանէն Դաւթի, եւ ետու զնա քեզ, եւ ոչ եղեր իբրեւ զծառայ իմ Դաւիթ որ պահեաց զպատուիրանս իմ, եւ եկն զկնի իմ ամենայն սրտիւ իւրով առնել ուղղութիւն առաջի իմ, 9 եւ չարացար առնել քան զամենեսին որ եղեն յառաջ քան զքեզ, եւ գնացեր եւ արարեր քեզ աստուածս օտարոտիս եւ ձուլածոյս բարկացուցանել զիս, եւ զիս ընկեցեր յետս ի մարմնոյ քումմէ, 10 վասն այսորիկ ես ածից չարիս ի վերայ տանն Յերոբովամայ, եւ սատակեցից զՅերոբովամայ որ միզիցէ զորմով, կծկեալ եւ լքեալ ի մէջ Իսրայելի. եւ հաւաքեցից զհետ տանն Յերոբովամայ, որպէս հաւաքիցի աղբ, մինչեւ սպառել զնա։ 11 Զդիակունս Յերոբովամու ի քաղաքի կերիցեն շունք, եւ զմեռեալս յանդի՝ կերիցեն թռչունք երկնից. զի Տէր խօսեցաւ։ 12 Եւ դու արի գնա ի տուն քո, եւ ի մտանել ոտից քոց ի քաղաքն՝ մեռցի մանուկն. 13 եւ կոծեսցին զնա ամենայն Իսրայէլ, եւ թաղեսցեն զնա. զի նա միայն Յերոբովամայ մտցէ ի գերեզման. զի գտաւ ի նմա բան բարի վասն Տեառն Աստուծոյ Իսրայելի ի տան Յերոբովամայ։ 14 Եւ յարուսցէ Տէր իւր թագաւոր ի վերայ Իսրայելի, որ հարցէ զտուն Յերոբովամայ յաւուր յայսմիկ. եւ արդ զի՞նչ եւս։ 15 Հարցէ Տէր զԻսրայէլ որպէս շարժի եղէգն ի ջուր, եւ խլեսցէ Տէր զԻսրայէլ յերկրէս բարութեան յայսմանէ զոր ետ հարց նոցա, եւ հոսեսցէ զնոսա յայնկոյս Գետոյն, փոխանակ զի արարին իւրեանց անտառս բարկացուցանել զՏէր. 16 եւ մատնեսցէ Տէր զԻսրայէլ վասն մեղացն Յերոբովամու, որ մեղաւ եւ մեղոյց զԻսրայէլ։ 17 Եւ յարեաւ կինն Յերոբովամու, եւ գնաց ի Սարիրա. եւ եղեւ իբրեւ եմուտ առաջի դրան տանն, մեռաւ մանուկն։ 18 Եւ կոծեցան զնա, եւ թաղեցին ամենայն Իսրայէլ ըստ բանին Տեառն զոր խօսեցաւ ի ձեռն ծառայի իւրոյ Աքիայ մարգարէի։ 19 Եւ մնացորդք բանից Յերոբովամայ, թէ ո՛րչափ պատերազմեցաւ, եւ ո՛րչափ թագաւորեաց, ահա գրեալ են ի գիրս բանից աւուրց թագաւորացն Իսրայելի։ 20 Եւ աւուրք զորս թագաւորեաց Յերոբովամ, ամք քսան եւ երկու. եւ ննջեաց ընդ հարս իւր, եւ թագաւորեաց Նաբատ որդի նորա ընդ նորա։ 21 Եւ Ռոբովամ որդի Սողոմոնի թագաւորեաց ի վերայ Յուդայ. որդի քառասուն եւ մի ամաց Ռոբովամ ի թագաւորել իւրում, եւ եւթնուտասն ամ թագաւորեաց յԵրուսաղէմ քաղաքի՝ զոր ընտրեաց Տէր դնել զանուն իւր անդ յամենայն ցեղիցն Իսրայելի. եւ անուն մօր նորա Նաամա Ամանացի։ 22 Եւ արար Ռոբովամ չար առաջի Տեառն, եւ նախանձեցաւ ընդ ամենայն զոր արարին հարք նորա, եւ ըստ մեղաց նոցա՝՝ զոր մեղան։ 23 Եւ շինեցին նոքա իւրեանց բարձունս եւ անտառս ի վերայ ամենայն բլրոյ բարձու, եւ ի ներքոյ ամենայն վարսաւոր ծառոց։ 24 Եւ նուէրք եղեն՝՝ յերկրին, եւ արարին յամենայն գարշութեանց ազգացն զորս եբարձ Տէր յերեսաց որդւոցն Իսրայելի։ 25 Եւ եղեւ ի հինգերորդ տարւոջն յորում թագաւորեաց Ռոբովամ՝ ել Սաւսակիմ արքայ Եգիպտոսի ի վերայ Երուսաղեմի, 26 եւ առ զամենայն գանձս՝՝ տան Տեառն եւ զգանձս տանն արքայի, եւ զնիզակսն ոսկիս զոր ա՛ռ Դաւիթ ի ձեռաց Ադրաազարայ արքայի Սուբայ, եւ տարաւ յԵրուսաղէմ զամենայն զոր առ. եւ առ զզէնսն՝՝ ոսկիս զոր արար Սողոմոն։ 27 Եւ արար արքայ Ռոբովամ փոխանակ նոցա զէնս պղնձիս. եւ դիմեցին ի վերայ նոցա զօրագլուխք՝՝ սուրհանդակացն որ պահէին զդրունս տանն արքայի։ 28 Եւ լինէր յորժամ մտանէր արքայ ի տունն Տեառն, բառնային զայն սուրհանդակքն եւ յեցուցանէին զնոսա ի թեւէ՝՝ սուրհանդակացն։ 29 Եւ մնացորդք բանիցն Ռոբովամայ եւ ամենայն ինչ զոր արար, ո՞չ աւանիկ գրեալ են ի գիրս բանից աւուրց թագաւորացն Յուդայ։ 30 Եւ պատերազմ էր ի մէջ Ռոբովամայ եւ ի մէջ Յերոբովամայ զամենայն աւուրս։ 31 Եւ ննջեաց Ռոբովամ ընդ հարս իւր եւ թաղեցաւ ընդ հարս իւր ի քաղաքի Դաւթի. եւ անուն մօր նորա Նաամա Ամոնացի. եւ թագաւորեաց Աբիու որդի նորա ընդ նորա։ |