ԹԱԳԱՒՈՐՈՒԹԵԱՆՑ ԵՐՐՈՐԴ 11 - Գրաբար Աստվածաշունչ (1895)1 Եւ արքայ Սողոմոն էր իգասէր. եւ ա՛ռ իւր՝՝ կանայս օտարոտիս բազումս, եւ զդուստրն փարաւոնի, եւ Մովաբացիս եւ Ամոնացիս եւ Եդովմայեցիս եւ Ասորիս եւ Քետացիս եւ Ամովրհացիս՝՝, 2 Յազգացն յորոց վճարեաց Տէր որդւոցն Իսրայելի չմտանել առ նոսա, եւ նոքա մի՛ մտցեն առ ձեզ թէ գուցէ խոտորեցուցանիցեն զսիրտս ձեր զկնի կռոցն իւրեանց. ի նոսա յարեցաւ Սողոմոն սիրել։ 3 Եւ էին նորա կանայք տիկնայք եւթն հարեւր, եւ հարճք երեք հարեւր. եւ խոտորեցուցին կանայք նորա զսիրտ նորա։ 4 Եւ եղեւ ի ժամանակի ծերութեանն Սողոմոնի կանայք նորա խոտորեցուցին զսիրտ նորա զհետ աստուածոց օտարաց. եւ ոչ էր սիրտ նորա կատարեալ ընդ Տեառն Աստուծոյ իւրոյ իբրեւ զսիրտն Դաւթի հօր իւրոյ։ 5 Եւ գնաց Սողոմոն զհետ Աստարտայ գարշելւոյ Սիդոնացւոց, եւ զհետ Մեղքոմայ գարշելւոյ որդւոցն Ամոնայ։ 6 Եւ արար Սողոմոն չար առաջի Տեառն, եւ ոչ չոգաւ զհետ Տեառն իբրեւ զԴաւիթ զհայր իւր։ 7 Յայնժամ շինեաց Սողոմոն զբարձաւանդակն Քամովսայ կռոցն Մովաբու ի լերինն հանդէպ Երուսաղեմի, եւ Մողքոմայ կռոց որդւոցն Ամովնայ եւ Աստարտայ գարշելւոյ Սիդոնացւոց՝՝։ 8 Եւ այնպէս արար ամենայն կանանց իւրոց օտարոտւոց. արկանէին խունկս եւ զոհէին կռոց իւրեանց։ 9 Եւ բարկացաւ Տէր Սողոմոնի, զի խոտորեցոյց զսիրտ իւր ի Տեառնէ Աստուծոյ Իսրայելի որ երեւեցաւ նմա երկիցս, 10 եւ պատուիրեաց նմա վասն բանին այնորիկ, ամենեւին չերթալ զհետ աստուածոց օտարաց, եւ պահել եւ առնել՝՝ զոր պատուիրեաց նմա Տէր Աստուած։ 11 Եւ ասէ Տէր ցՍողոմոն. Փոխանակ զի եղեւ այդ ընդ քեզ, եւ ոչ պահեցեր զհրամանսն իմ եւ զպատուիրանս զոր պատուիրեցի քեզ, պատառելով պատառեցից զթագաւորութիւնդ ի ձեռանէ քումմէ, եւ տաց զդա ծառայի քում։ 12 Բայց ի քո աւուրս ոչ արարից զայն վասն Դաւթի հօր քո, այլ ի ձեռանէ որդւոյ քո առից զդա։ 13 Սակայն զամենայն թագաւորութիւնդ ոչ առից. գաւազան մի տաց որդւոյ քում վասն Դաւթի ծառայի իմոյ եւ վասն Երուսաղեմի քաղաքի զոր ընտրեցի։ 14 Եւ յարոյց Տէր սատան Սողոմոնի զԱդեր զԵդոմայեցի ի զաւակէ թագաւորութեանն Եդովմայեցւոց։ 15 Եւ եղեւ ի սատակել Դաւթի զԵդոմ՝՝, յերթալ Յովաբայ իշխանի զօրուն թաղել զվիրաւորսն, զի կոտորեցին զամենայն արու յԵդոմ. 16 զի զվեց ամիս նստաւ անդ Յովաբ եւ ամենայն Իսրայէլ յԵդոմ, մինչեւ սատակեաց զամենայն արու Եդովմայեցւոց. 17 եւ փախեաւ Ադեր ինքն եւ ամենայն արք Եդովմայեցիք ի ծառայից հօր նորա եւ մտին յԵգիպտոս. եւ Ադեր մանուկ փոքր էր։ 18 Եւ յարեան արքն ի քաղաքէ անտի Մադիամու՝՝ եւ եկին ի Փարան, եւ առին ընդ իւրեանս արս ի Փարանէ եւ եկին յԵգիպտոս առ փարաւոն արքայ Եգիպտացւոց, եւ եմուտ Ադեր առ փարաւոն.՝՝ եւ ետ նմա տուն եւ կարգեաց նմա հաց, եւ ետ նմա գետին։ 19 Եւ եգիտ Ադեր շնորհս առաջի փարաւոնի յոյժ, եւ ետ նմա կին զքոյր կնոջ իւրոյ՝ զքոյր Թեկեմինայ զերէց։ 20 Եւ ծնաւ քոյրն Թեկեմինայ Ադերայ՝՝ զԳանեբաթ զորդի նորա, եւ սնոյց զնա Թեկեմինա ի մէջ որդւոցն փարաւոնի. եւ էր Գանեբաթ ի տան փարաւոնի ի մէջ որդւոցն փարաւոնի։ 21 Եւ լուաւ Ադեր յԵգիպտոս եթէ ննջեաց Դաւիթ ընդ հարս իւր, եւ եթէ մեռաւ Յովաբ իշխան զօրուն. եւ ասէ Ադեր ցփարաւոն. Արձակեա զիս եւ դարձայց յերկիր իմ։ 22 Եւ ասէ փարաւոն ցԱդեր. Զի՞նչ պակաս է քեզ առ իս զի խնդրես երթալ յերկիր քո։ Եւ ասէ ցնա Ադեր. Զի՝՝ արձակելով արձակեսցես զիս. եւ դարձաւ Ադեր յերկիր իւր։՝՝ 23 Եւ յարոյց Տէր սատան Սողոմոնի զՌազոն զորդի Եղիադայ, որ փախեաւ յԱդրաազարայ արքայէ Սուբայ ի տեառնէ իւրմէ։ 24 Եւ ժողովեցան առ նա արք, եւ էր իշխան գնդին ի կոտորել զնոսա Դաւթի. եւ գնացին ի Դամասկոս եւ նստան ի նմա. եւ թագաւորեաց ի Դամասկոս։ 25 Եւ եղեւ հակառակ Իսրայելի զամենայն աւուրս Սողոմոնի. այս է չարութիւն Ադերայ՝՝. եւ ծանրացասումն եղեւ Իսրայելի, եւ թագաւորեաց յերկրին Եդոմայ։ 26 Եւ Յերոբովամ որդի Նաբատայ Եփրաթացի ի Սարիրայ, եւ անուն մօր նորա Սարուա կին այրի, եւ նա էր որդի կնոջ այրւոյ՝՝ ծառայ Սողոմոնի. եւ ամբարձ զձեռն իւր յարքայ։ 27 Եւ այն իրք էին զի վերացոյց զձեռն իւր յարքայ Սողոմոն. արքայ՝՝ Սողոմոն շինեաց զբարձաւանդակն, եւ եխից զխրամ քաղաքին Դաւթի հօր իւրոյ. 28 եւ այրն Յերոբովամ հզօր զօրութեամբ. իբրեւ ետես Սողոմոն զպատանեակն եթէ այր գործոյ է, կացոյց զնա ի վերայ հարկաց բեռնակրաց տանն Յովսեփայ։ 29 Եւ եղեւ ի ժամանակին յայնմիկ եւ ել Յերոբովամ յԵրուսաղեմէ, եւ եգիտ զնա Աքիա Սիլովնացի մարգարէ ի ճանապարհի եւ մեկուսացոյց զնա ի ճանապարհէն՝՝. եւ Աքիա զգեցեալ էր հանդերձ նոր. եւ երկոքեան ի դաշտին։ 30 Եւ բուռն եհար Աքիա զհանդերձէն իւրմէ զնորոյ որ ի վերայ իւր, եւ պատառեաց զնա յերկոտասան կապերտս։ 31 Եւ ասէ ցՅերոբովամ. Առ դու քեզ զտասն կապերտսդ. զի այսպէս ասէ Տէր Աստուած Իսրայելի. Ահա ես պատառեցից զթագաւորութիւնն ի ձեռաց Սողոմոնի, եւ տաց քեզ զտասն գաւազանսն։ 32 Եւ երկու գաւազանքն եղիցին՝՝ նորա վասն Դաւթի ծառայի իմոյ, եւ վասն Երուսաղեմի քաղաքի զոր ընտրեցի յամենայն ցեղիցն Իսրայելի. 33 փոխանակ զի եթող զիս, եւ երկիր եպագ Աստարտայ գարշելւոյ՝՝ Սիդոնացւոց, եւ Քամովսայ կռոց Մովաբայ, եւ Մողքովմայ զազրոտւոյ որդւոցն Ամոնայ. եւ ոչ գնաց ի ճանապարհս իմ առնել ուղղութիւն առաջի իմ, եւ զճշմարտութիւնս եւ զդատաստանս իմ իբրեւ զԴաւիթ զհայր իւր։ 34 Եւ ոչ առից զամենայն թագաւորութիւնն ի ձեռանէ նորա, զի հակառակութեամբ կացից հակառակ նմա՝՝ զամենայն աւուրս կենաց նորա, վասն Դաւթի ծառայի իմոյ զոր ընտրեցի, որ պահեաց զպատուիրանս իմ եւ զճշմարտութիւնս։ 35 Եւ առից զթագաւորութիւնն ի ձեռանէ նորա, եւ տաց քեզ զտասն գաւազանսն. 36 եւ որդւոյ նորա տաց զերկուս գաւազանսն՝՝, վասն մնալոյ ճրագի ծառայի իմում Դաւթի զամենայն աւուրս առաջի իմ յԵրուսաղէմ քաղաքի զոր ընտրեցի դնել զանուն իմ անդ։ 37 Եւ զքեզ առից եւ թագաւորեսցես որոց եւ ցանկասցի անձն քո. եւ դու եղիցես թագաւոր ի վերայ Իսրայելի։ 38 Եւ եղիցի եթէ պահեսցես զամենայն ինչ զոր ես պատուիրեմ քեզ, եւ գնասցես ի ճանապարհս իմ եւ արասցես ուղղութիւն առաջի իմ, զգուշանալ պատուիրանաց իմոց եւ հրամանաց իմոց, որպէս արար Դաւիթ ծառայ իմ, եւ եղէց ընդ քեզ, եւ շինեցից քեզ տուն հաւատարիմ որպէս շինեցի Դաւթի. եւ տաց քեզ զԻսրայէլ։ 39 Եւ չարչարեցից զզաւակն Դաւթի վասն այնորիկ. բայց ոչ զամենայն աւուրս։ 40 Եւ խնդրեաց Սողոմոն սպանանել զՅերոբովամ. եւ յարեաւ Յերոբովամ եւ փախեաւ յԵգիպտոս առ Սաւսակիմ արքայ Եգիպտացւոց. եւ էր յԵգիպտոս մինչեւ մեռաւ Սողոմոն։ 41 Եւ մնացորդք բանիցն Սողոմոնի եւ ամենայն ինչ զոր արար եւ ամենայն իմաստութիւն նորա ո՞չ աւանիկ գրեալ է ի գիրս բանից Սողոմոնի։ 42 Եւ աւուրք զորս թագաւորեաց Սողոմոն յԵրուսաղէմ ի վերայ ամենայն Իսրայելի ամք քառասուն։ 43 Եւ ննջեաց Սողոմոն ընդ հարս իւր, եւ թաղեցին զնա ի քաղաքի Դաւթի հօր իւրոյ եւ թագաւորեաց Ռոբովամ որդի նորա ընդ նորա։ |