ԱՌ ԿՈՐՆԹԱՑԻՍ ԱՌԱՋԻՆ ԹՈՒՂԹ 15 - Գրաբար Աստվածաշունչ (1895)1 Ցուցանեմ ձեզ, եղբարք, զաւետարանն իմ, զոր աւետարանեցի ձեզ, զոր եւ ընկալարուք, յոր եւ հաստատեալդ էք. 2 որով ապրեցէքն, որով բանիւ աւետարանեցի թէ ունիցիք. բայց եթէ ի զուր ինչ հաւատացէք։ 3 Զի ես ձեզ զայն նախ աւանդեցի՝ զոր եւ եսն ընկալայ, եթէ Քրիստոս մեռաւ վասն մեղաց մերոց ըստ գրոց, 4 եւ զի թաղեցաւ, թէ՝ եւ յարեաւ յաւուր երրորդի ըստ գրոց. 5 եւ թէ՝ երեւեցաւ Կեփայի, եւ ապա երկոտասանիցն. 6 ապա երեւեցաւ աւելի եւս քան զհինգ հարեւր եղբարց միանգամայն. յորոց բազումք կան մինչեւ ցայժմ, եւ ոմանք ննջեցին. 7 եւ ապա երեւեցաւ Յակովբայ, ապա առաքելոցն ամենեցուն։ 8 Հուսկ յետոյ քան զամենեսին իբրեւ անարգի միոջ՝ երեւեցաւ եւ ինձ։ 9 Զի ես իսկ եմ տրուպն առաքելոց, որ չեմ իսկ արժանի թէ կոչեցայց առաքեալ, զի հալածեցի զեկեղեցին Աստուծոյ։ 10 Այլ շնորհօքն Աստուծոյ եմ զինչ եւ իցեմ. եւ շնորհք նորա որ յիս՝ ընդունայն ինչ ոչ եղեն. այլ առաւել քան զնոսա ամենեսին վաստակեցի, եւ ոչ եթէ ես՝ այլ շնորհքն Աստուծոյ որ ընդ իս։ 11 Արդ եթէ՛ ես եւ եթէ՛ նոքա այսպէս քարոզեցաք, եւ դուք այսպէս հաւատացէք։ 12 Ապա եթէ Քրիստոս քարոզի թէ ի մեռելոց յարուցեալ է, զիա՞րդ ասեն ոմանք ի ձէնջ եթէ՝ Յարութիւն մեռելոց չիք։ 13 Եթէ յարութիւն մեռելոց չիք, ապա եւ Քրիստոս չէ յարուցեալ։ 14 Եւ եթէ Քրիստոս չիցէ յարուցեալ, ընդունայն է քարոզութիւնն մեր, ընդունայն են եւ հաւատքն ձեր. 15 եւ գտանիցիմք սուտ վկայք Աստուծոյ. զի վկայեցաք զԱստուծոյ թէ՝ Յարոյց զՔրիստոս. զոր ոչն արդեւք յարոյց, եթէ մեռեալք ոչ յառնիցեն։ 16 Իսկ եթէ մեռեալք ոչ յառնեն, ապա եւ Քրիստոս չէ յարուցեալ։ 17 Եւ եթէ Քրիստոս չիցէ յարուցեալ, ընդունայն են հաւատքն ձեր. եւ տակաւին ի նմին մեղս՝՝ կայցէք։ 18 Իսկ արդ որ ննջեցինն ի Քրիստոս, կորեա՞ն արդեւք՝՝։ 19 Եթէ այսու կենօքս միայն յուսացեալ եմք ի Քրիստոս, ողորմելի եմք քան զամենայն մարդիկ։ ԶԴ. 20 Այլ արդ Քրիստոս յարուցեալ է ի մեռելոց, առաջին պտուղ ննջեցելոց. 21 քանզի մարդով եղեւ մահ, եւ մարդով՝ յարութիւն մեռելոց։ 22 Որպէս Ադամաւն ամենեքին մեռանին, նոյնպէս եւ Քրիստոսիւ ամենեքին կենդանասցին։ 23 Իւրաքանչիւր յիւրում կարգի. նախ Քրիստոս, եւ ապա Քրիստոսեանք ի գալստեան նորա։ 24 Եւ ապա կատարած, յորժամ տացէ ի ձեռս զթագաւորութիւնն Աստուծոյ եւ Հօր, յորժամ խափանեսցէ զամենայն իշխանութիւնս եւ զամենայն պետութիւն եւ զզօրութիւն։ 25 Զի պարտ է նմա թագաւորել մինչեւ դիցէ զամենայն թշնամիս ի ներքոյ ոտից իւրոց։ 26 Յետին թշնամին խափանի՝ մահ. եւ զամենայն ինչ հնազանդ արար ի ներքոյ ոտից նորա։ 27 Այլ յորժամ ասիցէ թէ՝ Հնազանդեալ է նմա ամենայն, յայտ է թէ բաց յայնմանէ որ հնազանդեցոյց նմա զամենայն։ 28 Այլ յորժամ հնազանդեսցի նմա ամենայն՝ յայնժամ եւ ինքն Որդի հնազանդեսցի այնմ, որ հնազանդեցոյց նմա զամենայն. զի եղիցի Աստուած ամենայն յամենայնի։ 29 Ապա թէ ոչ՝ զի՞նչ գործիցեն որ մկրտիցինն վասն մեռելոց, եթէ արդարեւ մեռեալք ոչ յառնիցեն. ընդէ՞ր իսկ բնաւ մկրտին վասն նոցա. 30 ընդէ՞ր եւ մեք ճգնիմք յամենայն ժամ. 31 եւ հանապազ մեռանիմք՝՝, ի պարծանս ձեր երդնում, եղբարք, զոր ունիմ ի Քրիստոս Յիսուս ի Տէր մեր։ 32 Եթէ վասն մարդոյ ի գազանամարտի լիեալ էի յԵփեսոս, զի՞նչ օգուտ էր ինձ, եթէ մեռեալք ոչ յառնեն. կերիցուք՝՝ արբցուք, քանզի վաղիւ մեռանիմք։ 33 Մի՛ խաբիք. ապականեն զբարս քաղցունս բանք չարք։ ԶԵ. 34 Սթափեցարուք արդարութեամբ եւ մի՛ մեղանչէք, զի զգիտութիւն Աստուծոյ ոչ ունին ոմանք. առ ամօթոյ ձերոյ ասեմ։ 35 Այլ ասիցէ ոք. Զիա՞րդ յառնեն մեռեալք, կամ որո՞վ մարմնով գայցեն։ 36 Անմիտ, դու զոր սերմանեսն՝ ոչ կենդանանայ, եթէ ոչ մեռանիցի։ 37 Եւ զոր սերմանեսն, ոչ զնոյն մարմին որ ծնանելոցն իցէ սերմանես, այլ հատ մերկ, եթէ՛ ցորենոյ իցէ եւ եթէ՛ այլոց սերմանեաց։ 38 Եւ Աստուած տայ նմա մարմին որպէս եւ կամի, եւ իւրաքանչիւր սերմանեացն՝ զիւր մարմին։ 39 Ոչ ամենայն մարմին նոյն մարմին է, այլ՝ այլ մարմին է մարդկան եւ այլ մարմին անասնոց, այլ մարմին թռչնոց եւ այլ մարմին ձկանց։ 40 Ե՛ւ մարմինք երկնաւորք, ե՛ւ մարմինք երկրաւորք. այլ՝ այլ փառք երկնաւորաց են, եւ այլ փառք՝ երկրաւորաց։ 41 Այլ փառք արեգական եւ այլ փառք լուսնի, եւ այլ փառք աստեղաց. եւ աստղ քան զաստղ առաւել է փառօք։ 42 Նոյնպէս եւ յարութիւն մեռելոց. սերմանի ապականութեամբ եւ յառնէ առանց ապականութեան. 43 սերմանի անարգութեամբ եւ յառնէ փառօք. սերմանի տկարութեամբ եւ յառնէ զօրութեամբ. 44 սերմանի մարմին շնչաւոր եւ յառնէ մարմին հոգեւոր. եթէ գոյ մարմին շնչաւոր, գոյ եւ հոգեւոր. 45 այսպէս եւ գրեալ է. Եղեւ մարդն առաջին Ադամ ի շունչ կենդանի, երկրորդ Ադամ՝ ի հոգի կենդանարար։ 46 Բայց ոչ նախ հոգեւորն. այլ շնչաւորն, եւ ապա հոգեւորն։ 47 Առաջին մարդն՝ յերկրէ հողեղէն, իսկ երկրորդ մարդն՝ Տէր յերկնից։ 48 Որպէս հողեղէնն, նոյնպէս եւ հողեղէնքս. եւ որպէս երկնաւորն, նոյնպէս եւ երկնաւորքն։ 49 Եւ որպէս զգեցաք զպատկեր հողեղինին, զգեցցուք եւ զպատկեր երկնաւորին։ ԶԶ. 50 Բայց զայս ասեմ, եղբարք, եթէ մարմին եւ արիւն զարքայութիւնն Աստուծոյ ժառանգել ոչ կարեն. եւ ոչ ապականութիւն զանապականութիւն ժառանգէ։ 51 Արդ խորհուրդ մի ասեմ ձեզ. Ամենեքեան ննջեսցուք, այլ ոչ եթէ ամենեքեան։ 52 Նորոգեսցուք յանկարծակի՝՝ յական թօթափել ի փող յետին, քանզի փող հարկանի, եւ մեռեալք յարիցեն առանց ապականութեան, եւ մեք նորոգեսցուք։ 53 Զի պարտ է ապականութեանս այսմիկ զգենուլ զանապականութիւն, եւ մահկանացուիս այսմիկ՝ զգենուլ զանմահութիւն։ 54 Այլ յորժամ մահկանացուս այս զգեցցի զանմահութիւն, եւ ապականութիւնս զանապականութիւն, յայնժամ եղիցի բանն որ գրեցաւ եթէ՝ Ընկլաւ մահ ի յաղթութիւն։ 55 Ո՞ւր է, մահ, յաղթութիւն քո. ո՞ւր է, դժոխք, խայթոց քո։ 56 Խայթոց մահու մեղք են, եւ զօրութիւն մեղաց՝ օրէնք։ 57 Այլ շնո՛րհք Աստուծոյ, որ ետ մեզ զյաղթութիւն ի ձեռն Տեառն մերոյ Յիսուսի Քրիստոսի։ ԱԴ. 58 Այսուհետեւ, եղբարք իմ սիրելիք, հաստատուն եղերուք, անշարժ կացէք, առաւել լերուք ի գործ Տեառն յամենայն ժամ. գիտասջիք զի վաստակքն ձեր ոչ են ընդունայն առաջի Տեառն։ |